Noordnederlandse Historiebijbel

8 capittel

Doe seide God tot Yosue: "En ontsiet u niet ende en weest niet vervaert. Ende neemt mit u een grote scaer van volc. Ic sel u Hay ende haer coninc, dat volc ende al dat lant in u hant geven. Ende doet Hay als gi Yerico deet: verslatet al ende verbarnttet al." Doe nam Yosue een groet scaer van volc ende toech bi nacht voer Hay ende leide daer heymelic in een laech 30.000 mannen. Ende Josue toech mit den anderen volc tusschen Hay ende Betel. Ende des morgens doe toech Josue mit een deel volcs voir die stede. Ende doe quam al dat volc van Hay uut ende doe begonde Josue mit sijn volc te wiken verre van der steden. Ende doe hief Josue sijn scilt op. Ende doe dat sagen die in die lage waren, doe braken si op ende liepen in die stede ende wonnense sonder weer. Ende doe staken sise tot menigen steden an ende barndense. Doe Josue den roec sach, doe scicte hi hem mit sinen volc ter weer. Ende die die stede gewonnen hadden, die quamen van afteren. Ende doe dat volc van Hay dat vernamen ende die stede sagen barnen, doe waren si versaecht ende worden sonder weer verslegen. Ende die coninc van Hay die wort levende gevangen ende voer Josue gebrocht.

Ende doe dede Josue den coninc

[fol. 85rb]

voer der poorten hangen tot des avonts toe. Ende doe dede hi dat lichaem van den cruce doen ende bedecte dat mit enen groten hoep stenen. Ende men sloecht al doot dat daer was ende men verbarnde die stede.

Doe maecte Josue een outaer. Ende Josue dede daer sacrificie op ende offerde daer een offerhande des vreden. Ende die priester gebenedide al dat volc van Ysrahel. Ende hi las hem al die wet ende alle die geboden die Moyses bescreven hadde. Ende hi geboetse enen ygelic te houden, man ende wijf, jonc ende out, van binnen ende van buyten, alle die onder hem woenden.