Noordnederlandse Historiebijbel

6 capittel

Die van Jherico die waren seer vervaert ende si ontsagen die kinder van Ysrahel. Ende si hielden haer steden gesloten. Ende nyement en dorste daer uut- of ingaen.

Doe seide God tot Josue: "Siet, Ic sel in uwen handen geven Jerico ende haren coninc ende al dat gemeen volc. Gaet eens des daechs mit al den vechters om die stede, ses dagen lanc. Ende opten sevenden dach so sellen die priesteren nemen 7 basunen ende gaen voer die arcke seven\warven

[fol. 84ra]

om die stede."

Doe geboet Josue den priesteren dat si die arke souden nemen ende gaen eens des daechs om die stede. Ende daer souden voergaen seven priesteren mit seven basunen. Ende voer die arke ghinc al dat gewapent volc. Ende Josue beval den gemenen volc dat nyement en spraec noch en riep, eer dat hijt beval te ropen. Doe droech men die arke also om Yerico ses dagen lanc. Ende dan set mense weder in Galgala. Opten sevenden dach doe hiet Josue dat volc sevenwarven om die stede gaen. Ende op die sevende reyse so geboet hi dat al dat volc soude lude ropen. Ende dan sel u God die stede opgeven, want die stede is vermaledijt ende al dat daerin is, sonder Raab ende die mit haer in haer huys sijn. Want si verhude ons boden die wi daer gesent hadden. Siet wel toe dat gi wel hout dat ic u segge, want gout of sulver of yser, of coperen vaten die gi daer vint, die sel gi Gode offeren. Ende als men die trompetten blaest ende gi alle roept, so sellen die mueren vallen. Ende so sel een ygelic in die stede gaen vandaer hi staet ende slaent al doot, man ende wijf, jonc ende out, ende oec al die beesten. Ende opten sevenden dach doe ghinc men mit die arke ende mit den volc seswarven om die stede. Ende in die sevende reyse doe riep al dat volc an

[fol. 84rb]

Gode. Ende doe vielen die mueren in die vesten. Ende doe ghinc al dat volc in die stede ende sloecht al doot. Ende die twee mannen ghingen in Raabs huus ende leden Raab mit al haer vrienden die in haer huys waren, uut der steden mit haer goeden onder die kinder van Ysrahel. Ende doet al dootgeslegen was, doe namen si gout, sulver ende yser, ende die coperen vaten ende staken doe die stede an ende verbarndense.

Doe seide Josue: "Vermaledijt is die man die Yerico weder tymmeren sel in sijn eerste groet."

Doe was God mit Josue. Ende sinen naem wort geopenbaert in al dat lant.