Noordnederlandse Historiebijbel

27 capittel

Dathan ende Abyron, die doer die aerde soncken om haer sonden willen, die en lieten geen knechten, mer si lieten dochteren, als Maala, Noa, Egla, Melcha ende Tersa. Die begheerden van Moyses te weten: Als si int Lant van Beloften quamen, mit wien dat si geervet souden sijn. Moyses vraechde dat God. Doe seide God: Men soude die maechden erven onder haer geslacht daer si of gecomen waren.

Voert seide God: "Segt den kinderen van Ysrahel: Een man die sterft sonder knecht, sijn dochter sel sijn erf nemen. Ende en heeft hi geen dochter, so sel sijn brueder sijn erf nemen. Ende en heeft hi geen brueder, so sel sijn guet nemen sijns vaders bruederen. Ende en heeft hi geen oemen, so sel sijn naeste maech sijn guet nemen. Dat sel een wet wesen onder die kinder van Ysrahel tot in der ewicheit."

Doe seide God tot Moyses: "Climt op

[fol. 66vb]

den berch Abarim ende besiet vandaen dat lant dat Ic den kinderen van Ysrahel geven sel. Ende als gijt besien hebt, so sel gi gaen tot uwen volc, als Aaron, uwen brueder, gedaen heeft. Ende neemt Josue: dat is een man daer die geest Gods in is. Set hem voer Eleazarus, den priester, ende voer al dat volc ende legt u hant op hem ende geeft hem die geboden die Ic u geseit hebbe. Ende al dat volc van Ysrahel sel hem ontsien. Ende als daer wat te doen is onder dat volc, so sel Eleazer, die priester, God raet vragen. Ende na den woerden Gods so sel hi doen." Moyses dede als hem God geboet. Hi wiede Josue heer over al dat volc ende hi gaf hem die geboden, als hem God bevolen hadde.