8 capittel
Doe seide God tot Moyses: "Neemt Aaron ende sijn kinderen ende cleetse mit die ornamenten ende wijtse ende salftse mit heiliger olyen ende vergadert alle dat gemeen volc voer die tabarnakel." Moyses dede also. Doe dat gemeen volc daer vergadert was, doe dwoech hi Aaron ende sijn kinderen ende cledese mit die ornamenten ende wiedse, als hem God bevolen hadde. Doe wiede Moyses die tabarnakel ende al dat daerin was ende dede sulke sacrificie als hem God bevolen hadde. Ende Moyses ende Aaron die bleven seven dagen in die tabarnakel, nacht ende dach. Doe wort eerst die sacrifici voleynt.
Auteursrechtelijk beschermd