Noordnederlandse Historiebijbel

28 capittel

Doe seide God tot Moyses: "Gi selt Aaron ende sijn kinderen clederen maken, daer si My in dienen mogen. Eerst sel gi Aaron een lynnen cleet maken ende dat gorden mit enen gordel. Ende dat cleet hiet yoderis. Ende dan sel gi een cleet maken van jacinct, van purpur, van cocce, van bisse ende van gout. Ende dat cleet sel viercant wesen ende dubbelt. Ende dat hiet racionale judici. Ende om die scueren sel gi setten 12 edelstenen. Int eerste sel gi setten sardinis, topasius, smaragdus; int ander carbunculus, saphirus ende jaspis; int dorde lygirus, achates ende ametistus; int vierde crisolitus, onychinus ende berillus. Ende alle die stenen die sellen geset wesen in gout. Ende onder elken steen sel gescreven staen enen naem van den kinderen van Ysrahel. Ende an dien roc sellen banden ende stricken wesen, ende ringen ende hecselen, ende versciert van goude ende van gesteent. Ende dan sel gi noch een cleet maken al van jacinct ende daer midden een caproen an. Ende dat cleet sel lanc wesen tot den voeten. Ende daer sellen beneden omme hangen 72 gulden bellen,

[fol. 47va]

opdat, als die biscop Gode sacrifici doet, dat dan dat volc hem mach horen ende mede bidden. Ende want die biscop alleen was in Sancta sanctorum ende die uren der sacrificien niet en hielt ende die bellen niet en cloncken, so meende dat volc dat die biscop siec of doot was. Ende dat cleet hiet in Ebreeus ephod. Ende gi selt Aaron een myter maken van gout ende van gesteent. Ende an die myter sel hangen een gouden plaet voir dat voirhoeft ende daer sel den naem Gods in gescreven wesen. Ende gi selt maken Aarons kinderen lynnen clederen, daer si Gode in dienen sellen, ende myteren op haer hoeft, ende die vercyeren. Ende die wiven sellen lynnen clederen hebben ende decken haer lichaem daermede, opdat, als Aaron of sijn kinderen in die tabarnakel gaen, of als die wiven ten outaer comen, dat si dan in geen sonden en vallen."