genomen hadde, ende alle die afgoden die si uut Scychem genomen hadden. Doe nam Jacob al die afgoden, wast gout, wast sulver, ende dalft al onder die aerde, omdat nyement van sinen volc dat anbeden en souden. Ende coninc David die vant dat gout daerna ende vergaderde dat om den tempel daermede te verscieren ende te tymmeren.
Doe quam Jacob mit sinen gesin in Betel ende maecte daer Gode een outaer ende noemde die stede `Dat Huys Gods'. Ende op dieselve tijt doe starf Delbora, Rebecken voetster. Ende si wort in Betel begraven onder een akerboem. Doe openbaerde hem God Jacob aldaer ende seide: "Voirtmeer en sel gi niet Jacob hieten, mer Ysrahel sel uwen naem wesen." Voert seide God: "Ic ben die almachtige Heer. Ic sel u geslacht doen wassen ende menichvoudigen. Ende van u gheslacht sellen coningen voirtcomen. Ende dat lant dat Ic Abraham beloeft heb ende Ysaac, dat geef Ic u ende u geslacht." Ende doe sciet God van hem. Jacob die rechte daer een steen ende goet daer oly op in die ere Gods ende noemde die stede Betel.
Vandaen toech Jacob ende quam in Effraten. Ende doe hi daer quam mit Rachel, overmits swaerheit der vruchten die si droech, had si anxt. Doe seide die vroedemoeder tot haer: "Wilt niet ontsien noch vrese hebben, want gi selt verlost worden van enen soen." Ende doe dat kint geboren was, doe
Auteursrechtelijk beschermd