Noordnederlandse Historiebijbel

16 capittel

Doe Saray out wort ende geen kint en creech, doe seide si tot horen man: "God heeft minen lichaem besloten, sodat ic geen kinder voirt en brenge. Daerom slaept bi Agar, mijn dienstmaecht, op avontueren of gi kinder an haer winnen moecht." Want Saray brocht Agar uut Egypten ende si hadde 10 jaer mit haer gewoent int lant van Canaan. Ende Abram die sliep bi Agar, sijn dienstmaget. Ende doe Agar vernam dat si kint droech, doe versmade si haer vrouwe. Doe seide Saray tot Abram: "Gi doet quaet jegen mi. Ic hebbe u mijn dienstmaecht gegeven tot uwen wille. Nu si siet dat si kint ontfangen heeft, nu versmaet si mi. God die recht dat tusscen u ende mi." Doe seide Abram: "Siet, uwe maecht is in uwen handen. Gi moechtse gebieden." Doe versprac Saray haer maecht. Ende doe liep si wech in der woestinen ende ghinc daer sitten bi

[fol. 10va]

enen bornput. Doe quam daer die engel in der woestinen bi den put ende seide tot Agar: "Waen coem gi ende waer gae gi?" Doe seide Agar: "Ic ben gevlogen van Saray mijnre vrouwen aensicht." Doe seide die engel Gods: "Keert weder tot uwer vrouwen ende veroetmoedicht u onder uwer vrouwen handen. God sel u geslacht so groet maken, dattet ontellic sel wesen. Siet, gi hebt een kint ontfangen ende gi selt een soen voirtbrengen. Ende gi selt sinen naem nomen `Ysmael', want God heeft u verdriet angesien." Agar keerde weder tot haerre vrouwen ende was haer onderdaen. Ende si brocht een kint voert ende noemde dat kint Ysmael. Doe was Abram 86 jaer out.