Noordnederlandse Historiebijbel

14 capittel

Ende het is gesciet in die tijt, doe hadde elc stede van waerden enen coninc.

[fol. 9va]

Ende die vijf steden hadden elc enen coninc, als Sodoma, Gomorra, Adama, Seboym ende Zegor. Mer si waren alle den coninc Codorlamor onderdanich, die coninc van Elamiten was. Ende si gaven hem 12 jaer lanc tribuyt. Ende int 13de jaer ontseiden si hem ende en wouden hem niet geven. Doe sprac Codorlamor an noch 3 coningen mit hem, als die coninc Antrafel, coninc van Ponten, ende Taal, den coninc van Semer, ende Arioch, coninc van Genlium. Ende si quamen striden jegen die vijf coninghen. Ende die vijf coninghen die setteden hem ter weer ende vergaderden in dat dal van Silvestrem int 13de jaer. Ende die 4 coninghen streden tegen die vijf ende die 4 verwonnen die vijf. Ende si beroefden al dat lant. Ende si slogen ende vingen mannen ende vrouwen. Ende si namen alle die beesten ende alle dat guet van Sodoma ende Gomorra ende wan al dat lant mit hem. Ende Loth, Abrams brueder soen, was mede gevangen. Ende een van sinen knechten ontliep ende boetscapte den Ebreuschen Abraham, dat Loth, sinen neve, gevangen was. Doe vergaderde hi 300 ende 18 cloke mannen van sinen magen ende vrienden, ende vervolgden die 4 coninghen totter Jordanen toe. Doe deelde Abram sijn volc an drien ende bestreetse in der nacht ende versloechse sonder weer. Ende doe nam Abram al den roef die si genomen hadden. Ende hi nam Loth, sinen neve, ende sijn guet

[fol. 9vb]

ende mannen ende wiven die daer gevanghen waren, ende brochtse tot Sodoma.

Doe quam Melschisedech, die overste priester Gods, ende oec was hi coninc van Salem. Hi gaf Abram wijn ende broet ende gebenedide hem ende seide: "Die overste God, die hemel ende aerde gescepen heeft, die gebenedie Abraham. Ende gebenedijt sij die overste God, want Hi een bescermer is sijnre vrienden." Doe gaf Abram God tiende van al den guede dat hi den vianden ontjaget hadde. Ende dat was die eerste tiende die ye gegeven wort. Dat Abel gaf, dat was hantgift: die eerste vrucht van den jaer van beesten of coorn. Doe quam die coninc van Sodoma tot Abram ende seide: "Gheeft mi die menschen die daer gevangen waren ende gi verlost hebt, ende hout gi al dat ander guet." Doe andwoerde Abram ende seide: "Ic heffe op mijn handen tot minen oversten God, die een besitter is der hemelen ende der aerden. Ende ic en sel niet enen draet, noch enen riem van enen scoe nemen van dat den uwen toehoert, opdat gi niet seggen en moecht: `Ic hebbe Abram rijc gemaect.' Mer wes die mannen die mit mi waren, gegeten hebben, dat is daerof gegaen. Mer Amer, Oschel ende Mambre die sellen haer deel ontfanghen."