Een Nieu geestelijck liedt-boecxken



[Folio D8v]
Een ander Gheestelijck Liet, Op de wijse: De mey die ons die groente gheeft. DAt ick die zonde dus langh heb ghedaen Dat mach my nu wel rouwen, Ick heb die weerelt so langh ghedient, Sy was mijn vrient // ick vantse noyt getrouwe. Nu wil ick die Weerelt varen laten En mijn van zonden wachten Sy volght mijn nae waer dat ick gae, By daghen en oock by nachten. Die weerelt, die vyant, en het vleysch Sy quellen my soo seere, Die brengen so menigen swaren gheveyns In mijn ghepeyns, dus help rijck Godt Heere. Helpt my dat ick verwinnen mach O Jesus lieve Heere, Al zijn mijn sinnekens mijn dus dwaes O Heer o laes // ick hoop sy sullen eens keeren. Een cruys van vijfthien voeten lanck, Heeft hy voor ons ghedraghen, Men vinter gheen trou aen gheenen Man, Meer dan aen hem, dus sal ickt niemant claghen. Die tacxken zijn wijt uyt ghespreyt, Die rooskens zijn ontloken Mijn lief treckt uyt sijn armen bloot Aent cruys was root // in hem staet al mijn hopen. Wie in hem hoopt, wie aen hem hoopt, Sijn hoop blijft niet verlooren Hy isser alleen die liefste mijn Hy wilt oock zijn // hy is mijn uytvercooren. Calvarien is so schoon playsant Daer wil ick my gaen vermeyen, En rusten mijn onder den cruycen boom Sy is so schoon // daer wil ick mijn lief verbeyen.