Een Nieu geestelijck liedt-boecxken


Iesu dulcis memoria. Overgheset in duytsch, en men singht het op die wijse. JEsus u memorie soet, Ons hertenseer veel deughden doet Boven Heunigh en soetigheyt Is u teghenwoordigheyt, Glorie onse Coningh weest ghegroet Die ons hert met gheneughte voet Men singht niet also lieflijck
[Folio D3v]
Men hoort niet also vreugdelijck, Men peynst oock so soetelijck niet, Dan Gods Sone die Jesus hiet, glorie, etc. Hoope van die benouwigh zijn En int ghebedt eenvoudigh zijn Hoe goet zijt ghy die tot u haken, Maer wat zijt ghy die u raken. glorie, etc. Heer wilt altijt by ons blijven, Laet u licht in ons beclijven, Laet u duysterheyt zijn ghedreven, En wilt de weerelt soetheyt gheven, glorie, etc. O Jesus uwer liefden smaeck Is waerachtigh een soete smaeck, Duysent mael meer aenghenaem, Dan wy te segghen zijn bequaem. glorie, etc. Bekent Jesum seer minnelijck Begheert sijn liefde hertelijck, Soeckt Jesum in alle hoecken, In soecken wilt u vercloecken. glorie, etc. D'Enghelen loven u altijt, Verhalende u lof seer wijt, Jesus verheught de Weerelt seer En maect ons Peys met God den Heer, glorie, etc. Laet ons altijt hem loven net Wt 'thert met sangh en met ghebedt Dat zijn vreught sonder verdrieten, Wy met hem moghen ghenieten. glorie, etc. O Salighmaker van dit dal, Verhoort doch ons ghebeden al, En ons lof sy u aenghenaem Van u knechten seer onbequaem. glorie, etc.