Nederrijns moraalboek
(1987)–Anoniem Nederrijns moraalboek–
Auteursrechtelijk beschermd
[pagina 1]
| |
Al die lude begeren bi naturen te wietene. Jnde dar vombe dat nieman al wieten en mag. Al is dat sake dat man al dinc weet. so muot also wesen dat manlik en deel weet Jnde dat dene niene kan dat dander kuonnen. so. dat mant al weet in sulker maniren. dat nieman. al dinc en weet al ene. Mar man weet van al den luden te gadere. Mar iet is also. Want al die lude nit te gadere en leuen. Want dene sin doit er dandere geboren werden. Jnde die giene die gewesen heben hir vormails. Heben suolk dinc gewieten dat nuo nieman begripen en mogte in sinen sinne. Jnde mansoits ak niet wieten. en ware bi den oden die geweest heben. Jnde dar vombe dat got den minsche also sere mint. dat hiene vorsiin wille van al des hie bedarf. so heuet hie den minsche gegeuen ene manire van starkheit van siele die heit gedinchenis. Diese gedinchenis die heuet twe porten dat is siin inde horen. Jnde elkerlik van diesen twe porten heuet enen weg dar man bi gain mag te | |
[pagina 2]
| |
gedinchenis. dat is varwe inde worde. Varwe dient den ogen. Jnde tie worde den oren. Jnde wo man wieder kuomen mag ten huose van gedinchenis. bi varwe inde bi worden dat mag man siin. dar vombe dat gedinchenis. is scat inde huoder van den sinne te geuene. dien man gewint bi cragte van behindigheide. Jnde die duot dat gelieden is. gelik oft vuor vons ware. Jnde tuot den seluen so kuomen bi varwe inde bi worden. Want als man siit gevarwet en storie van troies of en andere. man siit die dait van den guoden luden die hier bevoren waren. regte also of si tegenwordig weren. Jnde regte also iest van den worden. Want als man hort en buok lesen walsg is of duotsg. man verstait dauenture van den guden luden die geweest heben gelik of si tegenwordig weren. Jnde sint dat man makt tegenwordig. mit diesen twe saken dat lieden is. dat is bi varwe inde bi worden. so mag man wel siin dat man mit diesen twe saken kuomen mag te gedinchenisse. Jnde vomb dat ic wille dat mine vriende miens gedinchen als ic nit tegenwordig en bin dat dit buk mi | |
[pagina 3]
| |
tegenwordig make mit der varwen inde mit den worden die hir in gescrieuen sin. Want ic sal v. togen. Wo dit buk heuet varwe inde worde. inde war vombe. Want iet is guot te sieine inde te | wietene dat varwe heuet. dar vombe dat al gescrigt is gemakt vomb varwe te togene. inde vomb dat mant lese. Jnde als mant leest so kuomen wieder ter naturen van worden. Jnde vort dat varwe heuet. dat mag man wel pruouen dar vombe dat gene litter en is man verwese. Dar vombe wil ic setten en deel guoder worde die ic gehort hebe in maniegen steden in gescrigte. Jnde die giene ak die ic seluer gevinden kan vomb dat. dat gedinchenisse is ene lidende sake inde die hastelik vergait. Jnde en genuogt nit tegedinchene viel saken. Want die nie saken die beniemen die gedinchenisse van den oden saken Jnde dar vombe sin si guot gescrieuen. Jnde iet is wonderlik gnuog als suolk | man als ic bin. dat ic mi pine duosgedain buk te scriuene inde te makene. Mar hier tuo so | |
[pagina 4]
| |
bringhen mi twe saken. Dirste is die lieue die hebe tuot minen vrienden die von dar bi beteren mogten. of sit dicke lesen inde siit dan wel woiden behoiden Dander is dangst den ic hebe vor mir vrowen vorledigheit. Want ic was gerakt in ene gevangenisse dar ic | suome wile harde ledig inne was. Jnde vomb dat. dat die viant nieman als gerne ene bekort inde te sunden brinkt. als den gienen den hie ledig vint. Jnde vomb dat. dat vroledigheit is portener. inde dragt den sluotel van den sunden. Jnde nieman als wel in suonden kuomen mag als die giene die ledig is. Want die minsche heuet twerehande beruringhe an vom dene is van den ligame inde dander van der herten. Nuo is die minsche sculdig meister te wesene van sir herten. Jnde dat herte inde den ligame vonmuotig te makene miet guoden saken. Want man segt dat dene nagel den anderen vot drieft. des geliks sal die minsche ledigheit | van vome driuen Jnde vom seluer vonmutig maken mit duogden. Jnde | dar vombe heb ic mi seluer vonmuotig gemakt mit diesen buke te digtene inde te | |
[pagina 5]
| |
scriuene. Jnde vomb dat. dat ic niene wilde dat vroledigheit enege magt ouer mi hadde. Lieue vrient weet dat ic vomb vor eren wille. inde vomb v. lieue hebe gemakt dit bucskien. Jnde dat ikt v geue. Want ic wille dat gi drien siit. vomb v. te wisene inde te leerne wo gi leuen suolt. Mar ic hope dat gi erlik leuen ledet. Jnde dat gier groten vliit an lechet. inde so groten wille. dat diese wereltlike saken v. niet beniemen en muogen den wille erliken te leuene. Want ic wel weet. als diese wereltlike saken v. ligame tuot von trechen. v. herte. dat weet ic wel dat wieder segetse. Jnde dar vombe heb ic grot vontfarmigheit ouer v. inde van vor edeligheit. Jnde wil v geuen vorberliken rait tuor herten inde twoen ligame. Drierehande maniren sin van rade te nemene. dat irste dat is van erliken saken. dat ander van bederfliken saken. dat tirde is als die sake nog erlik nog bederflik en is. Dirste manire van diesen drien die is gedelt in twe. Want man vontsiit dicke van enre saken weder si bederflik si. of dat si noist. Jnde man vraget ak dicke. van twe | |
[pagina 6]
| |
bederfliken saken wilk vor bederfliker si. Aldus sin die twe maniren van rad te nemene gedelt in viren. Jnde die dirde manire dar man bi bescedet die erlike sake inde die bederflike. die en is nit gedelt. Aldus sin viuerhande maniren van rade. dirste dat is dat die sake erlik si. dander is dat die sake erliker si dene dan dandere. tirde dat is | dat die sake bederflike si. dat virde is dat die sake bederfliker si dene dan dandere. Die vifte manire is. als ene erlike sake inde ene bederflik sake nit ouer en en dragen. Jnde dat si sin dene tegens den anderen. Nuo muot ic dan diese viuerhande maniren leren inde wisen. inde ielk suonderlinge. mar die erlike sake alr irst. Erlike sake is die bi vorre cragt inde bi vor edeligheit vons tuot vor trekt. Nuo si wi sculdig te wietene wat duogt is. Duogede is en | vombecleet van guoden sinne. Jnde volget der naturen bi reden. Jnde dar vombe segt die wise man. die duogde is so guot. dat bi huore so kient die quade minsche | |
[pagina 7]
| |
die guode sake. Want en is geen man so quait. hiene wilde te regte heben gewonnen. dat hie tuonregte hait. Erlike sake is gedelt in vir saken. in behagelheit. inde in regtigheit. inde in cragte. inde in getempertheide. Behagelheit is ene duogt. die duot kiennen die guode sake inde die quade. Jnde leert te scedene dene van den anderen. Regtigheit is ene duogt. die al den luoden gieuet vor regt | ten bederue inde ter eren. Cragt is als die man wel gedogen mag. arbeit inde pine die vome tuo kuomet. Getempertheit is ene duogt. die die houerde benemet. die in die lude kuompt vomb die richeit die si heben. Van diesen vir duogeden. is behagelheit die hogeste. Want si gait vuor dander drie inde luogt von. Jnde rait den anderen drien. Jnde die rait is sculdig te gane vor die werke. Want die wise man die seget. er du begiens te wirkene so beraid di. Jnde als du beraden bis. so mag tu kuonliken wirken. Nogt seget die wise man. din ogen sin sculdig te gane vor dine vuotstap. dat is te | sechene. | |
[pagina 8]
| |
din rait is sculdig te gane vor dine werke. Na behagelheit kuompt regtigheit. Nuo sin twe saken die dicke benemen regtigheit. dat is angst inde girigheit. Jnde segh v. wo. weet di enen vruoden man. die v guot sal duon mit sinre vrutscap. Jnde is dat v. en rik man vontbieit. dat gi sinen vuoelen muot heben suolt. of gi den man langer mit v. hoit. gine suldene nit langer hoiden duorren. dar benemt v. angst regtigheit te duone. Vort is dat sake dat ic weet enen man dar ic bin sculdig milde tegen te wesene. Jnde ic dan pinse dat mi beter is dat ic hoide dat ic hebe. vomb dat ic sie dat iks te duone hebe. Jnde vomb dat. dat ikt mit pinen gewonnen hebe. dar benemet girigheit. regtigheit te hodene Jnde dar vombe muot man regtigheit lenen an twe pilernen. man | sal cragt setten tegens angst. inde getempertheit tegens girigheit. Jnde diet aldus duot. die wise man die segt. dat hie nuommer houerdig wesen en sal in sier richeide. Behagelheit heuet vir dugden vnder vom. dat is vorsinigheit inde vorsiin inde scuowen inde leringe. | |
[pagina 9]
| |
Uorsinigheit is ene duogt. die duot kiennen dat tekuomen is. bi der saken die man vor vome heuet. Diese duogt die wille dat man vome berade tegens die quaitheit inde duongeual dat te kuomen is. Jnde | die wise man die segt. En is nit gnuog dat man siit die sake die vor sin ogen sin mar man sal siin dat te kuomen is. Want vorsinigheit mait tinde van der saken. Dar vombe segt die wise man. Die gene is wel behiendig. die vorsiin kan in sir herten wat vome tuo kuomen mag. Jnde wat hi duon sal als vome die sake geuallen is. so dat hie nit sechen en darf. iene huoder mi nit vore. Jnde die giene is en guot raitgeue. die den manne raid. dat hie gene grote hope en hebe in sinen geluok. Jnde dat hie ak nit sieker en si vomb dat. dat vome lange wale gevallen is. Want al ertsche saken sin vergangelik. inde gain hasteliker eweg dan si kuomen. Want al sulk is die manire van der auenturen dat die giene die alrehogeste waint wesen. die valt alrehastelikste. inde niedert mer bin enen dage dan man klimmen mag | |
[pagina 10]
| |
bi enen iare. Mar die valsge vrient die dient van smekene. diene pint vome nit. mar die lude te bedriegene mit sconen worden. Dar vombe | segt die wise man. dat gene sake en is. man muogese duon gelouen den duollen. Want hie waint dat manne te regte prise. dar vombe heuet | manig man gewaint. dat hie beter ware dan hie is. Jnde manig man heuet druombe gewest vondeert inde vontguot. nuo wil ic v sechen wat is vorsiin. Uorsiin is ene duogt. dar man miede scuowet die quaitheit die tegens vons is. Die manire van vorsiine. is sulik. dat man is sculdig tsin also te hodene. is dat man vrecheit vliet. dat man niene valle in dolre miltheit. Jnde in sulker maniren so sal man laten dolle kuonheit. dat man niene valle in dolre bloitheit. Dar vombe segt die wise man. huot di in alre huoden. Js dat du dine porte vor sluots. sie dat dine dure agter di nit opene en si. Nog segt die wise man. die in enre sunden is. hie veld gerne in dandere. en si dat hie vome huot. Nuo wil ic v sechen wat is scuowen. | |
[pagina 11]
| |
Scuwen is dat man scedet die dugede. van der quaitheit | die dugden geliken. Want die wise man die segt. dat maniren sin van quatheit die heben gelik van duogden. Jnde bedriegen hasteliker. vomb | dat si von decken mit duogden. Want iet is manig man fel inde wreet. den man hoit ouer enen guoden man. Jnde manig man is quait inde trag. den man ouer guodertiren helt. Jnde die wise man die segt. dat gene verradenisse so groit en is. als die giene die man duot in gelikenis van dinste. Nuo heb ic v. geseet. wat vorsinigheit is. Jnde wat vorsiin is. Jnde wat scuowen is. Nuo wil ic v sechen wat lerinche is. Leringe is ene cuonst. dat man lert den gienen die luttel wieten. Die manire van leringe die is suolik. dat die giene die leert. die sal vome seluer alr irst leren. inde dan enen anderen. Jnde dar vombe segt die wise man. aldus. suone drink dat water van dine putte. Jnde dat dar lopt vot dier cisterne. Lat din buorne vot lopen inde spree dat water vop dat velt. Die giene | |
[pagina 12]
| |
drinkt water van sinre cisternen. die die vruotscap | niemet in sir herten. Die manire van al den luden is so geseet. dat en minsche mer priset. ander lude saken dan sins selues. Die giene die lait vot lopen sin buorn. die sine vruotscap sturt in ander lude. Jn dieser wisheit | muot man scuowen twe saken. dat irste dat is dat sulke lude sin. die ene sake wenen kinnen dirre niene kinnen. Jnde volgens dan dwasliken Jnde die. die quatheit scuowen wille. hie sette sin tit in pinsen. vomb die sake te huodene. inde te scuowene. Dander sake die man sculdig is te scuowene. dat man gene grote pine en leche. vomb tuondervindene inde te wietene. die saken die duonker sin inde swar. Jnde die nit vorstrecken en | muogen. Dar vombe segt die wise man. iet is beter dat man lere en deel guoder vruotscap die hie vort trechen mag als hies te duone heuet. dan te pinene te lerne viele saken die di niet baten en muogen. nog verstrechen als ter noit kuomet. Vort segt die wise man. die giene en wuort nummer guot kimpe | |
[pagina 13]
| |
die al die keren leren wille. mar die sinen sin seet in twe guode keren. of in drien dar hie miede verwinnen mag. Want hie kan gnuog scirmens die giene die verwient. Aldus iest mit maniegen die leert saken. die vome luttel vorstrechen. Jc heb v. geseit van den vir duogden. die behoren tuot der behagelheit. dat is vorsinigheit. inde vorsiin. inde scuowen. inde leren. Geregtigheit is ene duogt. die behuoder is al der gemente van den luden. inde van gemenen gescelscap. Geregtigheit huot tgeselscap van den luden in sulker maniren. dat dene viele lants heuet. dander viel haue. dander viele penninge. Jnde en ander en heuet nit. Jnde die soide niemen den gienen die wat heuet iendede geregtigheit. die ilken minsche sin regt gieuet. Jnde die gementogt van den luden huodense in sulker maniren. dat manig man is ridder. manig | man is kopman. inde dene verliest tegen den anderen Jnde die giene die verliest soits heben nit en dede geregtigheit. die vons den quaden wille | |
[pagina 14]
| |
benemt Diese duogt verwient alle felle saken. Want die wise man die segt. dat niemant regtigheit in vome heben en mag. die vome vontsiit torn. of pine. of armuode. Jnde alle saken dar wi bi leuen. waren gemakt bi geregtigheide. regtigheit muoten si heben. die kopen inde verkopen. Jnde die giene die van ambagte leuen. Jnde die giene die stelen inde niemen. die en muogen nit leuen. sine heben en deel van geregtigheide. Want als en dif den anderen iet niemt. hie muot vome wieder geuen. of hie muot sinre gescelscap daruen. Jnde iet gevalt als die rouer van der see iet winnen. is dat die mester die den rof deelt. niet gelik en deelt. iet geualt dicke dat sine eweg iagen. of dat sine doit slain. regtigheit is gedelt in twe saken. in versmanisse. inde in vriigheit. Regte versmanisse is ene duogt. die valsgeit benemet. Die irste manire van versmatheit die is suolk. dat nieman den anderen is sculdig vonregt te duone. die giene en duot vome alr irst. Dander manire is suolik. dat | |
[pagina 15]
| |
wi sculdig sin te niemene. die gemene sake als die gemene. Jnde vons egen als dat vonse. Jnde weet dat. dat gene sake vons egen is bi naturen. mar dat mant al dus geseet heuet. Also als die heren die gewonnen heben dat si heben. mit vorre vruotscap of mit vorre vromigheide. of die giene diet heben. dat von ane kuomen is. van voren oderen. van vore vader of van vore muodere. Al die saken die sin vor bi regte. Jnde waren gemene bi naturen. Jnde dies meer niemt dan vome regt gieuet die. misduot. Jnde duot tgegen die gemene gescelscap. Die dirde manire van versmatheit is suolk. | dat man duon sal vter den luden die dieue inde die giene die die lude doit slain. Jnde alle die giene die sulke manire van leuene leden. Want man | salse nit gedogen int gescelscap van den luoden. Want als en minsche en van sinen lieden vorlist dat hie vome dar miede nit helpen. en mag. hie muot af duon slain. vomb dat hie die andere niene verliese vomb duongemak van dien. Regte also muot man suolke lude duon vter den luden. Want si en sin gene minsche. mar wolue gelike den minsche. Jnde man is si nit sculdig te | |
[pagina 16]
| |
sparne. Want die rigter die verduompt vom seluer. als | hie enen van diesen lait gain. die der doit verdient heuet. Nuo heb ic v. geseet wat regte versmaitheit is. nuo sal ic v. sechen wat regte vriheit is. Regte vriheit is ene duogt. milde van wel te duone. Diese | duogt dat segt die wise man. die is al in geuene inde in lonen. Js dat sake | dat du gieues. sig dat du niet vombequamelik en gieues. Want viele | lude sin die des niene verdienen dat man von enewerue guodertirenlik esche. | Jnde is dat man von eschet. so togen si enen manne lelik gelait. Jnde | kieren dat houet vombe. Jnde geberen of si anders wat te duonne heden. Also en sal man nit duon. Als gerne is man sculdig die gigte te geuene. als manse eschet Jnde nieman en sal gerne wieder geuen. dat vome node gegeuen is. Want en is gene gigte mer genuomen. Vort huot di dat dine gigte nit lange en merren. Want die gigte en is van genen groten lone. die | |
[pagina 17]
| |
lange merret in die hant des giens diese gieuet. Jnde hi | vontsegt gnuog die giene die lange merret mit sinre gigte. Als lange als du bets mit dir gigte. als lange verlis tu die duogt. Jet is ene harde gude sake dat man gieuet er man eschet. Want man eschet luottel suonder wiedermuot. Die giene die en dreget die sake nit vombe nit eweg diese eschet. Want en gene sake en is so dure gekogt. als die giene die man verdint mit biddene. Jnde en gene sake is so nidig als lange tebiddene. Jnde ic hadde lieuer hastelik vontseit te wesene dan lange te bedene. Vort sols du die huoden. dat dine gigte nit en nosen den gienen den mant gieuet. nog anderen miede. Want die wise man die segt. die ene manne gieuet saken die vome nost. hine salne nit hoiden ouer guodertiren. nog ouer | milde. mar hie salne hoiden ouer fel. Mar iet is manig die den enen niemet dat hie den anderen gieuet. Jnde dat is al ene vomb lof te hebene. Jnde dan is gen dienst. Want die wise man segt dat gene sake en is so sere tegens dinst als dat. Mar man sal geuen in suolker maniren. dats die giene den mant | |
[pagina 18]
| |
gieuet ere hebe. Jnde den vriemeden niene scade. Vort sols du di huoden dat dine gigte niet meerre en sin. dan tienre richeit behort. Vort so soits du di ak huoden. dat du dine gigte niet en verwiets. Want tregt van geuene dat is suolik. dat die giene die gieuet sals te hans uergeten heben. Jnde die giene die niemet. die sails altos gedinchen. Want die guode man die en pinst niet. vomb dat hie gegeuen heuet. tint den male dat mant vome wieder gieuet. Vort huod di van tuontsecgene miet quader scalkheit. als die kuoninc antigonus dede. Een arm ministrer bat vome vom ene mark. Jnde hie antwerde dat hie te vuole bade te sulke ministreer als hie ware. Duo bat vome die giene vomb enen penninc. duo seid hie dat hie te luttel bade enen kuoninc. Vonsaliglik vontseide hie vome. Want hie mogte die mark heben gegeuen als en kuoninc. Jnde den penninc als enen armen ministreer. Mar alexander dede bat. Want hie gaf enen ridder en stat. Jnde die giene seide dat si vome niene betemede. Jnde | alexander die | |
[pagina 19]
| |
antwerde. Jc en sie niet vop sulke gigte. als di getemen. mar ic sie vop gigte als mi betemen te geuene. Vort so soits du di huden. dat du | niet en clages van den gienen den du gedient heues al is dat hi di qualiken loint. Want du soits tbeste duon gedogst duot. Jnde wirs. is dat duot clages. Jnde lonit hie den enen dienst qualik. hie sal den anderen lonen. Jnde vergiet hie die twe hie sal des dirden gedinchen. War vombe | sal ic mi belgen tegens den gienen. in wes dinste ic viele mins guots gelagt sal heben. Jc salre so viele ane winnen. dat ic van minen vriende minen viant sal maken. Js dat hie mi qualiken loint. hie duot vome seluer merre vonregt dan mi. Want die dinst die wel geloint is. die wil altos wieder kuomen. inde wieder beginnen. Jnde die giene die man qualik loint. die verdriets gerne. Jnde die giene en is nit van groter herte die geuen dar al ene. mar die giene is van groter herten. die geuen dar. inde sine gigte verliesen. die niene gieuet dat hie gelouet. hie is viele quader dan die giene die qualiken loint. Dar vombe geloues du den quaden manne iet. sig dat | |
[pagina 20]
| |
duot vome gieues nit vombe gigte. mar vomb dine geloffenis tequitene. Vort soits du siin segt die wise man. dat die giene den du gieues dat hies werdig si. Jnde sine sieden inde sinen muot. Jnde van wat gescelscap hie is. Jnde wat duogden van vome kuomen den gemente van den luden. Want nieman en is te versmane dar man ienege duogde an siit. Mar wi sin sculdig meer tegeuene. den gienen die vons minnen. inde lif heben. Jnde iet sin viele luode die geuen vonuersien die nit en ruoken wene. Jnde die gigte en sin nit also sere te prisene. als die gegeuen sin mit vorsinigheide. Jnde dar miede sin suolke lude geuallen in groit armude. Ander lude sin die hoger dincken te klimmene dan si sin. Tegens die giene die in armude geuallen sin. si wi sculdegere milde te wesene. ensi dat si darmuode verdient heben. Jnde tegens die giene die hoge klimmen willen. dar en suol wi nit te nawe tegen hoden. Nogtan is man sculdegere te geuene den armen dan den riken. Want di rike die waint. dat mant vome geue vomb sin richeit of vomb siens te hebene. Mar gief man den | |
[pagina 21]
| |
armen iet. alle sine geliken hoident ouer guot. Jnde hopen des selues. Jnde dar vombe pinst die arm man. dat man vome niene gieuet. vomb sin richeit. mar vomb vome seluer. Engeen dinst is so bequamelik. als loin te duone inde dank te tide inde te tiermt. Want dank te sechene te tide inde te tirmte. duot merre ere dan ene grote gigte des man niet en wiste. Mar wat si wi sculdig te duone. tegens die giene dar wi den dienst af heben gehat. Wi sin von sculdig te lonen als vons die erde loint. Want si gieuet vons viele mer dan wi vor geuen. Jnde is dat wi den gienen gerne dienen. dar wi den vrome af wanen heben. so si wi sculdig harde gerne te dinen den gienen. dar wi lange tit den vruome af heben gehait. Js dat man v gedient heuet. siit dat gi des dinst niene verget. Want al die werelt is sculdig te hatene den gienen die dienst vergeet. Want die giene die is en quait minsche die dinst missakt den man vome gedain heuet. Jnde die giene is quader die | |
[pagina 22]
| |
gebert of hies niene hadde gehait. Jnde die giene die is alte quait dies vergiet. Want hie en hadde nie wille. dinst te lonen diet so luottel prisde. dat hies niet gedinchen en woide. Want gedinchenisse vergiet geenre | saken die vor wel behagen. dar vombe siet dat gi dinst niene vergeet. Want iet sin viele lude die en gene grote hope heben. vop loin dat lange merret. Jnde si en wanen niet dat die loin merret. mar dat hie verloren si. Vort sols duo di huoden. dat du al sulke lonre niene sies. als enrehande lude sin. die sechen. als von en man gedient heuet. Jc woide ic vom nog hadde in sulken steden. dar hie miens te duone hadde. ic soide vome harde gerne helpen. hie bid dat hie vallen muote in armuode. vomb | vome te helpene. of in sicheide vomb vome te helpene. Duosdan minne sal man heiten verwuode minne. Want si willen van voren vriende dat vor viant draf wille. Jnde die giene die en mint mi niet sere. die woide dat ic int water viele. te miets dat hi mi vot soide trechen. of dat ic min been brake. te miets dat hiet mi soide duon genesen. Vort soits du di huoden. Js dat man di dinst | |
[pagina 23]
| |
gedain heuet. dat du niene sies alte hastig mit den lone. Want die giene die altehastelik loint. die hoit nit ouer dinst. mar ouer wissel. Vort so soits du siin. dat du den gienen niene danks heme lik. mer openbare vuor den luden. Jnde is dat gi dinst niemet. gi siit sculdig te niemene guodertirenlik. Want iet is ene manire van dancke. nit dar | vombe dat gi quid suolt wesen. vomb dat. dat giet guodertirenlik | niemet. mar vomb dat. dat giet te siekerliker geuet. Want man sal geuen wille vomb wille. inde dienst vomb dienst. Twe maniren sin van dinste. die ene is van wille. die andere vomb guot. Mar die giene van den guode. is ligtelik te duone den riken man. mar die dienst die van den wille kuompt. die is bequameliker den guoden manne. Want ielk man die magen heben. Al is dat sake dat man loin eschet van den enen. inde van den anderen. die ene die kuompt van der | buorsen. die andere van der herten. Jnde den gienen van der buorsen mag wel gebreken. man mager so viele vot duon. mar die giene van der herten. so | |
[pagina 24]
| |
mer meer vot duot so mer meer inne vindet. Mar die giene van der bursen. makt die lude willeger inde gereder den dinste. Twe maniren sin van miltheide. tirste is tsin eweg te werpene. dander is van vruodelik te geuene. Die giene wuorpt tsin eweg. die dar leckere inde quade wiue miede vuodet. Jnde diet in tauernen verduot. Mar die giene gieuet vruodelik dat sine. diet gieuet vomb geuangen te losene inde te helpene die in orloge geuangen sin. of in armen edelen iuncvrowen te huowelik te bringen. of tehelpen den gienen. die von seluer nit gehelpen en muogen. Wel dait is van maniren dat man berait den vonberaden. Jnde dat man bescirme den armen in voren degdinchen. Mar man is sculdig tebesiene. of man den sinen helpen wille. dat man en anderen nit en dere. also dat man dar suonde miede duo. Want iet geualt dicke. dat man den gienen deert. den man nit sculdig en ware te derne. Jnde en gene sake so en is quadere. dan dine tuonge te verkopene. vomb enen | |
[pagina 25]
| |
man tuonderne. Want goet gieuet al den sin. vomb die bederue. van der gemente van den luden. Mar die rigter is sculdig. regtigheit te hoidene inde te bescirmene. Jnde vonregt te scuowene. Jnde alle die giene die rigtere wesen suolen. die sulen wesen suonder minne. inde suonder haitscap inde sunder irheit. inde suonder vontfarmigheit. | Want die giene en mag nit regte deelen. dar en van diesen vir saken herscap ouer heuet Want iet valt dicke dat die rigter niemt den riken manne. vombe nit. inde gieuet den armen vomb vontfarmigheit. Jnde dan is geen reden. Want die minsche die rigter wuort. die is sculdig van vome te duone alle vrintscap als hie rigter wuort. Want beginsel van regten dat quam van naturen. dar na quamen saken in gewonte. Jnde dar vombe dat man draf sag gemene vrmote inde reden. Aldus. di saken die bi naturen quamen. inde wuorden gepruoft mit vfeningen. die wuorden | gestedigt bi regte inde bi godelikheide. Alle die duogde die den guoden saken vor regt | |
[pagina 26]
| |
geuen. die sin liede der naturen. dat is geistelikheit. | inde vonnoselheit. inde vrinsscap inde herlicheit. inde endregtigheit. Jnde. vontfarmigheit. Al dies dugeden gelden vor scoit dar sise sculdig sin. Want gestelikheit gieuet gode die giene diese wel hoden . Vontfarmigheit die gelt den vader inde der muoder. dat si von sculdig is. Want die suone is sculdig vontfarmig te wesene tegens den vader. inde der muoder. Vonnoselheit die duot vor regt. dat is dat man niet deern en sal den gienen die lager is dan hi is. Vrintscap geelt vor regt. Want man sal vrient wesen sinre mage. Erlikheit gelt vor regt. Want man is sculdig teerne die giene die hoger sin dan wi sin. Endregtigheit geelt vor regt. Want wi sin sculdig endregtig te wesene tegens vonse nabure. Barmhertigheit gelt vor scoit. Want wi sin sculdig barmhertig te wesene. ouer die giene dies te duone heben. Nuo siit di sculdig te wietene wat geistelikheit is. Gestelicheit is ene duogt. die gieuet den wille inde den muot gode te minnen. Dat irst ambagt van gestelikheide. is dat man vome | |
[pagina 27]
| |
seluer begripe van der suonden die man gedain heuet. Die guode berowenisse heben wille. hie muot alle girigheit van vome duon. Jnde bedwiinchen alle sinen dollen muot. mit maniegerhande gedogshamheit. Dat ander ambagt van gestelikheit dat is suolik. dat man luttel sal prisen iet verlies van diesen ertschen saken. Want iet quaim al van niete. inde iet muot wieder te niete. inde wie geuen ter doit. vons inde alle vons saken. Tirde ambagt van gestelikheide is. dat man altemale sette sin leuen in die gods hant. Want die wise man die segt. Duos du minen rait. duo soits gode laten bewerden miet di. inde mit dinen saken. Want beitstu vop huome duone sailt nit verlisen. Mar hi sal di beter wieder geuen. Want got mint die lude meer dan si von seluer minnen. So viele salman gode bidden. dat hie therte inde den muot. inde den ligame gesuont make. Jnde dat hi vome geue cragt inde wille. vome te minnen inde te diene. God en helpt nieman vomb engeen bede. ensi dat | |
[pagina 28]
| |
herte dar miede si. na sir magt. Mar man sal waken inde uasten. Jnde den ligame pinen. also beiagmen die minne van gode. dat virde puont van gestelik is dat man waragtig si Waragtigheit is ene duogt. die vaste inde gestade hait. al die saken die sin. inde die waren. inde die wesen suolen. Nogtan sone sal man niet waragtig hoiden al dat man gelouet. swer di enen man of gelouet. dat giene doit suolt slain. giene duot niet tegen waragtigheit laitid. Geuet v en man en sweert of en knief te hoidene. Jnde hie dar na vonsinnig wuort. gien siit vome nit sculdig wieder te geuene. Want hi soider miede vom seluer of enen anderen doden. Jnde gieuet v en man guot te hoidene. Jnde wil hie orlogen beginnen tegens dat gemene lant. gi en siit vome nit sculdig wieder te geuene. Want hi soide scade duon in vwen lande dat gi sculdig siit te huodene. als sere als v. seluer. Aldus is maniege sake vonerlik vop sulke wile. die scinen erlike bi naturen. Nuo heb di gehort die | |
[pagina 29]
| |
manire van gestelikheit. nuo wil ic v sechen wat is vontfarmigheit Uontfarmigheit is ene duogt. dar man bi dient inde mient. sinen vlesgliken vrient. Jnde die guode lude van sinen lande. Alle die maniren van dieser duogt kuomen van naturen. Want manne dwingt nieman en anderen teminnen. Ak en gebit niet tregt. dat man sine mage mint. Mar iet kuompt van vontfarmigheide bi naturen. Want iet ware verloren pine. die mi dede mit kragte duon ene sake. dar ic willig tuo ware. Dar vombe si wi vons sculdig wel te huodene vonregt te duone vonsen magen. Mer dan anderen luden. Want nieman en sal den gienen lif heben. die sin geslegte leet heuet. Wat troist mag ic vop den gienen heben die sinen magen quait duot inde hindert. Die giene soide mi node des siens geuen. diet sinen magen niemt. Jc hebe v geseid wat gestelikheit is. Jnde wat vontfarmigheit. Nuo wil ic v sechen wat vonnoselheit is. Vonnoselheit is ene duogt. van claren sinne. die vor vontsiit losheit te duone. Miet dieser duogt lait vome got genuogen. Want | hie heuet | |
[pagina 30]
| |
lieuer dat en arm man reine van suonden tuot vome kuompt mit idelre hant. dan en rike suonder mit groter gigte. Die heben wille regte vonnoselheit. hie sal wanen dat alle sine clene suonden groit sin. Dirste puont van vonnoselheit so is. dat man nieman en deer. Want dat segt die vruode man. Hie dreiget maniege manne die ene manne misduot. dat ander puonte is. dat hi en gene wrake en neme. Want hi soide vonnoselheit verlisen. Jnde iet is ene lelieke sake. vonnoselheit te verliesene. vomb ene wrake van enre saken. Jnde man is niet sculdig te geuene misdat vomb misdait. Want manig man is te niete kuomen. vomb dat hi alle sinen toren wreken wilde. Nuo heb die gehort. wat gestelikheit is. Jnde wat vontfarmigheit is. Jnde wat vonnoselheit is. Nuo sal ic v sechen wat regte vrientscap is. Urinscap is als en minsche guoden wille heuet tegens enen man. vomb die vrintscap van enen anderen. Dat irste puonte van vrintscap dat is dat man wille dat sin vrient wille. Jnde dat man wieder seche dat | |
[pagina 31]
| |
hie wider seget. Dat ander puonte. dat man sculdig is | sinen vrient te prisene vuor den luden. Jnde hemelik te kastien. Dat dirde puont is. dat gi nit siit sculdig tuonderuindene van vwen vrient. nog te | besukene die sake die hie nine wille dat gi weet. Want iet is merre guodertirenheit. dat gi gebeert dat gis niene weet. dan tuonderuindene die sake dar v. v. vrient. vombe hait. Jet virde puont is suolik. dat man sinen vrient nien sal laten. vomb en geen vongeval dat vome tuo kuomen mag. Jnde man is sculdig sinen vrint alse sere te minnen in sir armuode als in sir richeide. Dar vombe segt die wise man. die gemint wil wesen. die minne. Erlicheit is ene duogt. dar man bi eert die hoge luode. Dirste ambagt van erlicheit is suolik. dat wi sculdig sin te volgene die dait. inde die werke van den guoden luoden. die magtigere sin dan wi sin. des vor werke redelik sin. Want die wise man seget. dat wi sculdig sin te siene den guoden man. Jnde altois tehebene vuor vons ogen. Jnde wi sulen leuen regte | |
[pagina 32]
| |
of hie vons altois sage. Want werk di na den guoden manne. gi siit dar sculdig groten troist af te hebene iest dat v misvalt. Jnde dar vombe dat gi altois guot suolt duon. so suol di wanen dat v die guode man altois sie. so suol di v. meer vontsiin quait te duone. Nuo heb di gehort. wat gestelikheit is. inde wat vontfarmigheit is. inde wat vonnoselheit is. inde wat vrienscap is. Jnde wat erlicheit is. Nuo suol die horen wat endregtigheit is. Endregtigheit is ene duogt. die hoit in enen sieden inde in enen wesene van gescelscap. die lude die te gadere wandelen. Jnde bi voren guoden wille. Jnde die wise man die segt. dat wi nit al ene en sin in die werelt vomb vons. Mar vomb dat wi helpen suolen dene den anderen. Jnde in diese duogt. si wi sculdig teleuene bi naturen. Want man is sculdig als sere te minnen den vrome van sinen nabure als sins selues. Jnde man sal laten en groit deel van sinen regte. Jnde man heuets dicke vrome. Want die clene saken wassen ouermits | |
[pagina 33]
| |
endregtigheit. Jnde mit qualik ouer een te dragene. gain | die grote saken te niet. Barmhertigheit is ene duogt diet herte muorw maket. inde vontfarmig tegens die giene. die bedruokt sin miet serigheide. Want barmhertigheit en hoit gene minschlike sake. ouer vriemede. Ander lude gewin. inde ander lude verlis hoit si ouer thuore. inde die vontfarmig is inde vol van barmhertigheide. Jnde tegens die serigheit van anderen luden. hie gedinkt sins selues. Jc hebe v geseit twe maniren van regtigheide. dat is versmanisse inde edeligheit Nuo sal ic v sechen twe maniren van scalheide . die tegens diese twe sin. dat is felheit inde vonwerdigheit. Jnde | die hoiden wille regtigheit die muot diese twe saken scuowen. Felheit | is die regt noist. inde vonregt helpt. Vonwerdigheit is. als man mogte inde als man soide hinderen vonregt inde mans niene wille. Jnde vervonwerdet. Aldus is vonwerdigheit tegens versmanisse. Want versmanisse duot | |
[pagina 34]
| |
regtigheit inde huotse inde die giene vervonwertse te | hoidene. Also is felheit tegens edeligheit. Want edeligheit is milde van wel te duone. Jnde felheit die en pinst niet. dan vomb vonregt de | duone. Die liede van felheide. dat is angst. inde vrecheit inde girigheit. Jnde | als en man den anderen deren wille. inde hie angst heuet. sone dar hies nit duon. vomb dat hi vome den scade vontsiit. Vreckheit is als en man begript vonregt teduone. vomb te gewinnene dat hie begeert. girigheit duot manig man vonwittig wesen. Want des girigen herte pinst al anders dan die muont seget. Hie mint vop ene tit inde vop en andere hait hie. niet vomb verradenisse die drinne is. Mar vomb sine bate te duone. inde in dieser maniren so ieser manige quaitheit. Want die kuone inde die | milde vallen dicke in girigheit. tegewinnene baliunscap inde ander hoget. Want vor kuonheit matkse vromig tegewinnene. Jnde vor miltheit die gieuet von grote helpe. Want si wuorden te mildere. vomb dat si hoger climmen willen dan vor genoit. Jnde dar vombe segt die wise man. dat gene trowe | |
[pagina 35]
| |
en is tuoschen den gienen. die gesellen sin in en baliunscap. Felheit is gedeilt in twe saken. in cragt inde in trechingen. Jnde nieman en sal dies twe quatheide an vome heben. Want trecheit hort de vosse tuo. Jnde cragt hort den lewe. Jnde van diesen twen. is man sculdig trechinge meest te hatene. Want man vint viele luode. die el nien duon. mer luode tevorbehindegene. Jnde gelaten nogtan of si guode lude waren. Jnde die giene die regt sin sculdig te hodene. Jnde diet dan laten die duont vomb angst den si heben dat manse haten sal. of vomb pine die si vontsiin. of vomb groten cost. of si sin vonledig mit anderen saken. of si haiten die giene. die si sculdig waren te helpene. Jnde gedogen dat man von vonregt duot. dar sise sculdig waren te bescirmene dat is vonwerdigheit. Mar man soide te regte meer vervonwerden enen riken man dan enen armen. Want die arme die waint altois dat manne veruonwerde vomb | sin armuode Guode willigheit is ene duogt. di eweg duot den quaden wille. die den | |
[pagina 36]
| |
man tuo kuompt van sin vongeual. Die puonte die van willigheide kuomen. dat is kuonheit. inde sikerheit. inde trostigheit. inde gestadigheit. inde gedogsemheit. Kuonheit is. als en man ene grote sake begripet te duone redelik. inde bi sinen guoden wille. Sikerheit is. dat man ten ende bringe die sake die begunnen is. Troistigheit is als man nien vontsiet. den scade die kuomen mag. van den saken die beguonnen sin. Gestadigheit is ene duogt. vaste inde gestade van sinne. inde die vor hoit in vor gedagte. Gedogsemheit is ene duogt dar man bi gedogt die lelicheit. inde die ouerdait. inde tuongeual dat den minsche tuo kuomet. Van kuonheit sprikt die wise man dar hie seget gereid v herte dat iet gedogen muoge al die pine die vome tuo kuomen mag vomb die dugde die gi duot. Jn kuonheide sal man alr irst scuwen vrecheide. Want | iet is en harde lelike sake. als die giene verwonnen miet vrecheide. den man niet verwinnen en mag mit angst nog mit pinen. Darna salman scuowen | |
[pagina 37]
| |
girigheit. Want iet sin viel lude die begripen te duone swar saken. vomb girigheit van lof tehebene. Mar die wise man die hait die dait van sinre vromiegheit in sinen sinne. Jnde die dolle die brinktse vuor die lude. vomb eer te hebene. Mar die regte vromigheit is beter al ene gewieten dan gewaint bi anderen luoden. Jnde dar vombe en sal man nit wanen er heben bi quaden loue. Nuo heb di gehort van kuonheit Nuo | wil ic v sechen van siekerheit Sikerheit is ene duogt inde is al suolk. dat man sculdig is te haistene. die saken die beguonnen sin ten ende tebrinchene. Jnde dat | segt die wise man. Julius cesar die keiser. hiene wainde niet gedain heben. als lange als hie iet te duone hadde. Nuo sal ic v. sechen van troistigheide. Troistigheit is ene duogt. die den minsche troist. tegens | die harde saken van der auenturen. Want int vongeual salman hope heben wel te varen. Vort sal man ak vontsiin. dat na den guoden geluok. vongeual dicke gesciet. Mar die sake die mest tegens troist is. dat is angst Want | |
[pagina 38]
| |
die angst segt tuot den minsche. Duo salt steruen. | troist antweert. mi en ruoks. Want vop sulke vuorwarde quam ic int leuen. dat ic druot soide. Want dat man leent dat is man sculdig wieder te geuene. Jc en sal dirste nit sin. die gestoruen heuet. nog die leste. Jot is dwasheit tuonsiene. des man niet vontgain enmag. Jnde angst die seget. man sal di dat houet af slain. troist antwert. Wo viele wonden dat ic hebe. ien sal mer van enre steruen. Angst die seget. duo salt steruen in vriemden lande. troist antwert. Alse swar is mi die doit in minen huos als druote. Angst die seget duo salt iuong steruen. Troist antwert. mi \ is beter dat ic iuong sterue. dan ic so lange leuede dat ic mins doits begerde. Die giene stiruet ait gnuog. die nit langer leuen en mag. Angst die seget. du salt steruen suonder begrauen. troist antwert. iets klene scade. en bin ic nit gedekt mit der erden. ic sal gedekt sin mit den hiemele. Gragt en wuorden niet gemakt vomb die doden mar vomb die leuenden. Want dene stiruet in water. dander in viere. suolk wuort verslagen. nuo en soiden die | |
[pagina 39]
| |
leuenden tuot den doden niet kuonnen geraken en deden die graf. Angst die segt. man sal quait van di spreken. Troist antwert. iet quait spreken van den luden is mi eens loues weert. Sine duont nit vomb min verdiente. Mar vomb dat si niet bed en wieten te sechene. Angst die seget. sie wo man volget den riken man. Troist antwert. Sine volgen den man nit mer sine penninge inde sin guot. also volget die huont den doden parde. Nog seget angst. ic hebe min guot verloren. Troist antwert. duon ruok. En ander verloist er duot gekriegs. Jnde motg gescien du haits di seluer verloren ouer mits huore. Angst die seget ic hebe mine kinder verloren. Troist antwert die giene is dol die screiet den doit van doitliken saken. Aldus muogt di sien dat angst genen guoden raid en gieuet in diese werelt. Jnde die wise man die seget. dat angst maniegen man heuet duon stuorten inde steruen. Jnde dat dar meer saken sin die vons verueren. die niene gescien dan der gienre die | gesciin. Dar vombe huot | |
[pagina 40]
| |
dat gi niene ruopt vor den slag. Want man vontsiit | viele saken die nuommer en gescien. Stedigheit is ene duogt. inde is al sulik dat man sculdig is te wesene. van enre maniren inde van enen gelate. in sir armuode inde in sir richeide. Want die dait van guoder pinsingen is. dat man vome hoit in vrieden. inde in enre maniren. Want die wise man die segt. du bist sculdig te wesene stark inde gehertig tegens die felle saken. Jnde tegens die guode willig. Mar iet sin viele lude also geseit in voren sin. dat si nuo beguonnen heben. dat siet tehans laten Jnde dat si nuo willen. dar en sulen si des anderen dages niet vomb geuen. Jnde in vor richeit sin si vromig inde willig. Jnde als von iet misvalt sone kuonnen si von nit gehelpen. Jnde sulke lude die en sin niets weert. Wo sal | ic den gienen gelouen. die en geen tit vom seluer en hoit in enre gedagte. Dar af kuompt dat man viele ambagt begript. Want hie prist ander lude ambagt inde lastert dat sine. Nuo wil ic v sechen van gedogshamheit. | |
[pagina 41]
| |
Gedogshamheit is ene duogt die gedogt blidelik die harde sake. diese duogt is arsedie van den anderen duogden. Want die giene die is wel genesen. die guodertirenlik gedogen mag. des hie nit gebetern en can Dar vombe segt die wise man. dat man sculdig is tegedogene. mit | guoden sinne al dat dauenture gieuet. Want die sieke die vome seluer nit huoden en wil die makt quaden arseter. Want en is gene sake so ligt. si ensi swar den gienen diese node duot. Getempertheit is ene duogt. inde is herheit van reden tegens vonsuouerheit. inde tegens die quade wille. Jnde dies duoget is sirheit inde hogeit van allen leuene. Jnde swonre van allen vernoie. Van dieser duogt sprikt die wise man dar hie seget aldus. Js dat vat niet rene nog suouer en is. al dat du drin duos dat sal bederuen. Scuowe die genuogte van den vlesche. Want die genuogte is harde quait. die | druofheide bringt. Van getempertheit kuompt mate. | |
[pagina 42]
| |
Mate is ene duogt dar man miede bedwinchet behagelheit. | inde den wille den man heuet van ouerdait te duone. Van dieser duogt sprekt die wise man dar hie seget. Jn allen saken dar is mate. Jnde die ouer mate duot. hiene mag gene sake te regte duon. Wil vome die minsche cleden inde behagel maken. hie sal sien dat hiet duo redelik. Want alle kledinge inde alle behagelheit en sin nit redelik. Js dat die behagelheit van buten nit redelik en is. iet toigt dat therte van binnen niet redelik en is. Jn elken minsche sin twe beruringen. dene van den ligame dander van der herten. Jnde int giene van den ligame. sin wi vons sculdig te huodene van dorperlik te gane. Jnde van saken te duone dar wi vons seluer altesere miede verwermen. Want als man altesere verweermt. dat bluot verruo[rt] vome. Jnde die muot die pint vome. Jnde dat ansigt wuort heet. Jnde in dien saken en mag man gene duogt pruouen. Twe beruringen sin van sinne. dat is gedagte van reden. Jnde wille. | |
[pagina 43]
| |
gedagte duot besuoken die sake. Jnde die wille duotse duon. Jnde nuo muot also sin dat reden vrow si. Jnde dat wille getempert si bi | regte. Want wille en dreget nit ouer en mit reden vonder wien si is bi naturen. Want dat herte dat getornt is. dat slait inde die ligame die | bieuet. inde dat ansigt wuort heet. Jnde suome lude sin so mester van vren herten. dat si dat wel bedechen kuonnen. Jnde dar vombe segt die wise man. dat man niet sieker wieten en mag. wan er ens minschen. herte wel tegemake is of tuongemake bi sinen ansigte. nof bi sinen worden. Want iet sin dusent manire van luden. Manlik heuet sinen wille inde sinen muot. Jnde die wise man die seget. dat wi in diesen saken sculdig sin te volgene [der] naturen. Want is en man krank van ligame. Jnde van ligten sinne inde van guoden. [man] ieser niet sculdig af te makene ridder mer klerk. Jnde is hie stark inde cuone. man ieser beet af sculdig te makene ridder dan klerk. Want man mag huome nit beniemen die manire die vome nature gegeuen heuet. Jnde man is huome nit sculdig | |
[pagina 44]
| |
te settene tuot ambagt dat hie niet leren en mag. Mar is dat geualt dat man vombe noit enen man tanbagt seet dat niene geuoogt tuot sinre vruotscap. of tuot sinen ligame. hie ieser sculdig so groten vliit ane te lechene. is. dat hiet nit erlik duon en mag. dat hiet duo so hie minst mag vonerlik. Want wi en sin nit so viele sculdig te pinsene. tegewinnene dat guot. dat wi nit gekrigen en cuonnen. als wi sculdig sin die quaitheit te scuowene. Scemte is ene duogt. die hoit reden in eten inde in drinken. inde in kledinchen inde in anders wesene. die wise man seget. dat nature wel versag reden in den minsche te makene. Want sie sette te vorscine dat scoinste dat die minsche heuet. dat is dat ansigte. Jnde tander deel van den ligame. dat niet scone en ware te siene. die huot si. dat sin die lieden die gegeuen sin ter naturen. van manne inde van wiuen. Want al die giene die scemte heben. die bergen die liede. die niene betamen te siene. Als man | |
[pagina 45]
| |
sprekt so sal man hoiden scamte. Jnde man sal si nit nuomen. bi voren name en si hemelik. Js dat man spreket van groten saken. man sal niet spreken van saken die man begripen mag. Van dieser scamte van sprekene. segt die wise man aldus. Die man die irre is die sal irliken spreken. Jnde die blide die sal sechen die blide worde. Vort segt hie. dat nieman en is sculdig tuonderuindene den heimeliken rait. van enen anderen. Jnde is dat man tegens v vondekt sinen rait. huot v. dat giet nit vort en sechet. vomb druonckenscap nog vombe ierst. Want die strale die gescaten is. diene mag niet wiederkeren. Uonthadenisse is ene duogt. die bedruokt den quaden wille van eten inde van drinchen. Jet irste puonte dar af dat is. dat man sine spise rede er tit is tetene. Vort sal man huoden dat man nit alte lecker en si vop guode spise. dar vombe segt die wise man. manlik die huode inde vorsiie sine magt inde sine mate. Want die giene die mer enen hellinc en heuet. die en sal niet dinchen. vomb enen visg van vif. scillingen of van | |
[pagina 46]
| |
tienen. Jn anderen steden segt die wise man. A guolsigheit. verwoster van allen saken. Jnde huongerig van guoder spisen. ic wil di wisen van wo luttel die minsche leuen mag van naturen. Nature heuet gnuog an water inde an brode. Vort sols du di huoden. dat du nit te viele en eets. Want die spise die man te girlik iet. die kuomen dicke te vernoi inde sin dar na gehait. Vrient merke als du eets inde als du drinks. dat di die spise nog die drank niet vorder en smakt. dan tuoschen den tanden inde den knop van der kelen. Nuo vint man viele luode die vomb die clene genuogte verlisen vor lif inde vor guot inde vor siele. Cusgheit is ene duogt. die agterwart druokt al voncusgheit. bi getempertheit van reden. Want is dat iet herte vome lait verwinnen vonsuuerheide. Jnde dat si is vrowe van vome. sone heuet die ligame gene magt. Want nieman en mag vonsuouerheit | dienen inde huome. Jnde dies twe saken en muogen nit ouer en dragen. Want | |
[pagina 47]
| |
vonsuouerheit is ene genuogte. der man sere begert. Jnde die luottel duort Jnde als si gedain is. so manse meer begert. so si meer genuogt. Jnde wie so in suonden valt of iet berowt vome te lest. of hie heuets scande. want die dait is lelike. inde dat ende vonrene. Dar vombe iest ene lelike sake vom te settene in den wille van den ligame. Jnde in deigendum van so quaden saken. als die ligame is. Jnde dar vombe sal die scemel man altos pinsen in sir herte wo viele die nature van den minsche beter is. dan die nature van den diren. Want die dire en pinsen nit dan vomb die genuogte van vonkuosgheide. Jnde dat is al uor genuogte. Mar des minschen herte is sculdig te pinsene vop die duogt. Jnde wo hi mest leren mag. Want die minsche die nit en can. is regte als vonnuotte als en bilde dat gesniden of gevarwet is. Jnde is dat en man vonsuuerheit duot. Jnde sin herte dar tuo seet. hiene sal dar vombe nit laten. hiene suole pinsen inde duon ander dugeden. Want en dede hie des nit so wer hie regte gelik den diren die nirgen vomb en pinsen dan vomb voncusgheit. Nog iser ander reden war | |
[pagina 48]
| |
vombe man scuwen sal voncuosgheit. Want iet is ene sake die nit erlik en is te duone openbare. Jnde enis geen sake die so hemelik wil wesen gedan als die. Want is en man vontsteken miet voncusgheide. hie | helt den wille inde die dait. Jnde dat duot hie al vomb scemte. Jnde vomb | te scuowene duolle minne. wil ic v sechen wat duolle minne is. Dulle minne is en vir die vuot int herte. inde is gewonnen bi genuogte van vlesghe. Jnde bi gemak te hebene. Jnde is harde wonderlik. Want iet verderft inde verbirn sine mester. Jnde en genuogt niet den gienen. diet heuet. Dat vir van duolre minnen. kuompt ter herten. bi den gemake van den vlesche. Jnde kuompt duor dogen. Jnde water dat diet vir vot duot. dat kuompt ter herten bi den vlesche te pinene inde te dwingene. Jnde dan is dat water gewonnen. dat diet vir vot duot. Jnde dan so kuompt twater dur dogen. Want anders sins sone ginge dit vir niet wel vot. twater en liepe den weg dat dit vir gegain hadde. Dar vombe sidi v sculdig te huodene. dat die quade genuogte. en gene herscap ouer v en hebe. Want die ligame dar | |
[pagina 49]
| |
voncusgheit vrowe af is. dar en muogen ander duogden gene grote magt ouer heben. Jc heb v geseit hir beuoren. wat erlike sake is. Jnde alle die partien die van erliken saken kuomen. Mar nog en heb ic v. nit gefeisirt nog geseit. wat saken erliker is dene dan dandere. Mar nuo muot ikt v. sechen. Jc heb v. geseit dat behagelheit keent die saken dar dander dri duogden inne sin. dat is regtigheit. inde cragt. inde getempertheit. Van diesen drien is getempertheit thogste. Jnde sech v. reden war vombe. Bi getempertheit huot die minsche vome seluer. Jnde bi cragte. inde bi geregtigheit. so huot hi inde berigt sin lant inde sine lude. Mar hie is sculdig meer te minnen die herscap van vome seluer dan anders ienege herscap. Want die wise man segt. Duo sols merre herscap heben. mogts du din herte verwinnen inde setten te reden. dan of tu twedel van der werelt heets vnder di. inde du din herte nit bedwinchen en | cuonstes. Wilstu al dies saken vonder di setten. so muots du die seluer alr irst setten | |
[pagina 50]
| |
vnder reden. Jnde so sal tu here wesen van groten guode. Js dat reden vrowe ouer di is. Want geen man en mag geen regt guot heben. hie en si guot alr irst. Nuo heb di gehort van diesen vir duogden. dat getempertheit die hogeste is. inde behagelheit die lageste. Jnde ic hebe v geseit reden war vombe. Nuo si di sculdig te wietene van den anderen twe duogden die dar bliuen. dat geregtigheit die hogeste is. inde cragt die lageste. Jnde sech v reden war vombe. En is gen so grote cragt van herten. nog gene so grote willigheit. Js dat mans niene lede nog en du mit regtigheide. dat mant iet sculdig is te hetene cragt mer felheit. Jnde | regtigheit heuet manigerhande ambagt van dinste. Den irsten dinst is man sculdig te geldene gode. den anderen sal man duon sinen lande. Jet tirde sinen vader inde sinre muoder. Jet ander is man sculdig te duone also als ic v. hir vormails geseit hebe. dar ic sprak van gestelicheide. inde van den ses duogden die van naturen kuomen. Nuo sal ic v sechen van vorberliken saken. | |
[pagina 51]
| |
Urberlik sake ies. als en man ene sake duot. dar hie hopet inde waint vruome af heben. Vorberlike sake is gedeilt in drie maniren Dirste is in duogden van den ligame. dander in die gigte die dauenture geuet. Tirde in duogden van der herten. Also als is guodertirenheit inde vruotscap. inde vriheit. Jnde anders die duogeden dar ic | af gesproken hebe hir vormails. duo ic sprak van erliken saken. Nuo wil ic v sechen die dugden van den ligame. dat is sconheit. inde edelheit inde | dapperheit. Jnde cragt. inde groit te wesene. Jnde diese duogden | bringen dicke merren scade dan vruome. Want sine muogen nit ouer en dragen mit den duogden van der herten. Dar vomb segt die wise man. man vint selden dat sconheit inde suuerheit te gader bliuen. Edeligheit brinkt ak dicke merre vonere dan ere. Want so die man edelre heuet | gewest inde vromieger. inde mildere. als viele is sin suone mer guonart. is dat hi dorper is. inde blode. inde quait. Want die duogt inde die name van den | |
[pagina 52]
| |
guoden manne. die sal wesen spiegel sinre kindere. nog | vor duogt nog vor quatheit en muogen nit verholen bliuen. Mar si muoten vort kuomen. Want so die man hoger man is. so man sine duogt inde sine quaitheit ere weet. Mar wil die wieten wat regte edelheit is. hort wat die wise man draf seget. Edelheit is ene sieker duogt. die gieuet guodertiren herte. inde hoge. inde kuone te verklimmene. alle sake inde alle wonder. Jnde te wirkene bi naturen. Jnde dies saken die en muogen nit | kuomen suonder van duogden van herten. War vombe sal ic den gienen edel heiten. die fel is inde quait inde dorper. diene mager nit af heben dan den name. Jnde ic duo quait geef ic name dar hi nit ane en heuet. Jnde ic hadde lieuer suone te wesene des quaitsten mans van minen lande. Jnde ic als vruomig ware als alexander was. dan ic die quaitste van | minen lande ware. Jnde ic alexanders suone ware. Jnde is. dat in edelheide enege vruome is. dat is dar die wise man af seget. Jc sal v sechen dat beste | |
[pagina 53]
| |
eigen dat des guoden mans kinderen bliuet van vren vadere. nog gen guot en is so rikelik. dat is tlof inde dere. van sir groter vruomigheit. Jnde van sinen scone leuene. Jnde die rowe heuet inde scande. van allen quaitheit te siene. Jnde dit is regt edelheit. Mar van | anders den dugden van den ligame. wat guode kuompt draf. Meer heber draf die dire dan die minsche. Want en is nieman alse stark inde alse groit van ligame als en elpendir. Jnde nieman en is van so groten ligame als die keemel. Jnde en geen man en is alse snel alst re. Mar ic mag sechen als man seget des auents sal man den dag louen. Jnde des morgens den wiert. ter doit so wetman van wat duogden manlik gewest heuet. gi hebt gehort van den duogden. van der herten. Jnde van den duogden van den ligame. Nuo sal ic v. sechen van der gigte van der auenturen. Die gigte die dauenture geuen mag. dat is richeit. inde | hoget. inde | |
[pagina 54]
| |
ere. inde lof. Ter richeit behort. grote masnede. inde groit guot. inde scone cledere. inde grote huosinghe. Jnde wil di huse maken. gi en siit v. nit sere sculdig te bekuommerne. vomb grote huose te makene. Mar hie is sculdig alse viele te hodene dat iet huos erlik dar miede gehoiden si. Want die here en is nit sculdig geert te wesene duors huos wille. Mar dat huos is sculdig geert te wesene duors heren wille. Want en geen huos en is clene dar viele guoder lude in wandelt. Mar dat grote huos wuost duot den here scande. alse die here die te voren was. hilt rike inde vervolt. Jnde heb di en rikelik huos inde en groit lant. gi en suolt te min in pinen nit wesen. nog en suolt vontgain den dag van der doit. Als wale suol di steruen. si di die rikste man van der werelt. als dalr armste. Want grote huse nog groit lant. nog viele gots inde siluers die en scirmen den minsche niet tegens die doit. Regte also guot iest guot den gienen die vol is van girigheide. Jnde van angste. als is ene | rode varwe enen manne. vop te siene die quait ogen heuet. Man sal te maten | |
[pagina 55]
| |
timmeren. Want also scire slait die doit enen kuoninc in sinen torne. als enen armen man in sinen clenen huos. Jc heb. v. geseit van timmerinchen. Nuo wil ic spreken van masneden. Alr irst is die here sculdig den gienen die vome dinen te geuen des si beduoruen. Vort so is die giene dan sculdig den ligame te pinen ins heren vorbur. Jnde vor ligame is sculdig te wesene gereet. tuors heren gebode. Mar therte is so vri. dat die here nit bedwingen en mag. Want die vangenisse van den ligame dart inne besloten is. en bedwinget nit. hiene duo sine wille tegens den ligame. dar vombe suol die siin. dat gi alsuolik siit tegens vwen knape. als gi wilt dat hie tegens v. si. Als dicke als gi dinkt wat magt gi ouer vwen knape hebet. so gedinkt dat v. knape. als sulke magt ouer v. heuet. Alr irst is die knape sculdig te huodene. dat hie | si van sulken muode. Jnde van sulker maniren. als sin here is. Js sin here tornig. hie en sal gene blitscap maken. Jnde sprekt sin here. hie is sculdig te swigene. Vort is die knape sculdig te huodene. dat hie sinen here genen | |
[pagina 56]
| |
man en loue. den hie niet sculdig en is te louene. Dar | vombe segt die wise man. sig dat tu den man wel kins. den du loues. so dat die | giene den duo loues gene scande draf en hebbe. Want en is hie des loues nit wert. so duos du vome scande. inde die seluer miede. Vort so sal die knape van vome duon vrecheit. inde vonsuuerheit. Dar vombe segt die | wise man. Huod di dat du niet girig en sis. want die girige man en kriget nummer gnuog. Jnde dat hie vome huode dat hie nit bedrogen en werde mit dullen gelate van wiuen. Want die giene die sin herte verlist. die mag clene prisen tguot dat vome bliuet. Vort sal vome die knape huoden dat hie vme niene beruome. Huot di dat du dine werke niene pries. Jnde der ander niene lasters. Vort sal hie vome huoden dat hi nit te viele en etsche sinen here. Want die wise man die segt. dat die giene die swiget meer heuet van den guden here. dan die giene die dar esgt. Want die guode man die pinst meer vop sinen knape. dan die knape seluer duot. Jnde die sake dar wi vons druomme huoden sulen. | |
[pagina 57]
| |
die wiest vons die wise man dar hie seget. Groit lof inde groit ere iest den armen manne. als hie is van suolken dinste. dat genuogt den muogenden inde den riken. Die manire van den knapen is suolik. dat hie sculdig is te duone al dat vome sin here gebuot. Want die wise man die seget. Js dat die knape qualik getogen inde geleert is. die scande en is sine nit. mar sins heren. Mar bouen alle dink sal vome die knape huoden. dat hie gen smeker en si. Want tquaitsste liet van den knape. dat is die tuonge die smekt. Mar hie sal sulken here kiesen. des hie ere heuet of hie vome dient. Want die dinst van den knape is geert vomb die duogt van den guoden here. Engene sake sone betemet so wel der quader herten inde der lagere. als richeit te minnene. Jnde en gene sake is erliker dan richeit te versmane. Js dat manre niene heuet. Jnde diese heuet die isse sculdig vrilik te geuene. Jnde sech v war vombe. Dirste is vomb dat. dat tleuen is kuort. dat verbid vons. dat wi gene lange hope en heben. Want alsi wi huden. wine wieten nit of wi morgen wesen suolen. Want gen man | |
[pagina 58]
| |
is geluckig in allen saken. Mar wi sin sere bedrogen mit | dien. dat wi niene pinsen vomb die doit. Want die giene die waint wesen int beginsel van sinen leuene. hie is int ingain van sinre doit. Dar vombe soit die minsche pinsen vop dit wort ic sal steruen. dat is dirste reden war vombe nieman richeit begeren en sal. Dander reden is suolik. dat girigheit van guode benemt die duogede. Dar vombe segt die wise man. die giene heuet verloren alle guot. inde heuet die duogde gelaten. die altois pinst inde pint vomb guot te gaderen. dar vombe seg man. dat die giene van groter herten is. die also sere prist goit als loit. in loit als goit. Mar bi auenturen die vrecke sal sechen. guode here gi vrag mi wes ic leue. War dat ic niet en hadde. Jene ware nummer so edel. Jene soide wesen vonwert. na dien dat ic hebe. na dien bin ic gemint. Die nit en heuet. die is qualik gelouet. Mar die gnuog heuet. die heuet ere inde vrinde. Jnde is gehoiden ouer enen guoden man inde ouer wis. Al dit seget die vreke. Mar dat duot vome nit dan | |
[pagina 59]
| |
vonere. Want die wise man seget. dat girigheit van richeit irst benam den guoden wille. Jnde voneerde dere van der werelt. Jc heb v. geseit twe reden. war vombe nieman richeit begeren en sal. Nuo sal ic v. sechen tirde. dat is. dat geen guot dat man gadert. mag veruollen den girigen. Want so hie meer heuet so hie meer begeert. Mar die giene is rike den genuogt dat hi heuet. Js dat din ligame inde din houet. inde dine liede tegemake sin. War vombe soits du meer heben. Want die wise man segt. Als viele als girigen mans guot wast. als viele wast sine girigheit. Jc heb v. geseit drie reden nuo sal ic v. sechen dat virde. dat is. dat die giene nummer sieker en is die viele heuet. Want var die vwen weg. Jnde vuor di viele guodes. gi suolt angst heben. dat man v. doit suol slain, dar vombe segt die wise man. dat die giene die nit en dregt mag kuonliken singen vuor die dieue. Die vifte reden is. dat dat guot altois sin egen wil maken. van | |
[pagina 60]
| |
den gienen diet wient. Dar vombe segt die wise man. ic pine mi min guot vonder mi te lechene. nit mi vonder min guot. Dar vombe wil ic dat gi weet dat die giene en is geen guot vreke. die huoder is van | groten guode. Mar die giene is en guot vreke die erlike leuen kan mit klenen guode. Jnde die erlik dragt sin armuode. Jnde die meer vontsiet scande dan doit. Want iet is en harde erlike sake blide armuode. Jnde die giene en is nit arm die luttel heuet. Mar die giene die meer begert dan hie heuet, die is arm. Wil die wesen rike so pinst nit tegewinnene. Mar girigheit te latene. Want die cuortste weg die ienig is richeit tegewinnene dat is richeit te versmane. En man mag alle dink versmain. Mar hiene mag alle dink nit heben. Dar vombe is rikere darmste man die nit meer en begert. dan die rikste man die meer begeert. Want die arm man. mag meer vontsechen dan die rike geuen mag. Mar wil die wieten die manire van der guoder richeit. die wil ic v sechen Die irste manire is dat die minsche gecrige | inde beiage | |
[pagina 61]
| |
des hi bedarf. dander manire is sulik. dat vome genuoge dat hie heuet. Jc hebe v geseit van richeit. Nuo wil ic v. sechen van hogeide Wi sin sculdig te hebene getempertheit in hogeit tegewinnene. Want so man hoger kliemt. soit vallen swarre is. dar vombe segt die wise man. die niit heuet maniegen magtiegen man duon stuorten. Want die grote saken die vallen bi von seluer. Ligtelik gewinman | dar dauenture helpt. Mar man huot niet ligtelik. dat man gewonnen heuet. | Jnde soit huos hoger is. soit vresliker veld. Jnde iet geveelt alre dikste. dat die duonre slait in die hoge huos. Jet ambagt van den hoge manne is suolik. dat hie sal pinsen te duone. duorbur van den luoden. Jnde vor | minne inde vor vrinscap tegewinnene. Want die man die herscap heuet. vom is geen dink so guot. als gemint te wesene. van den luoden. Jnde en gene sake is so vreslik als gehait te wesene. Want die gemente van den luden | |
[pagina 62]
| |
begeren den doit. van den gienen den si haten. Dar vombe segt die wise man Jene hoide den gienen nit ouer magtig. die gehait is van den gienen die vonder vome sin. Want hie muotse vontsien. Jnde als | die here duot vonregt inde scande den gienen die vonder vome sin. Jet gevalt dicke dat si vallen in wanhope. so dat si setten in auenture. von seluer inde vor guot. Jnde duon sulke saken die nit gebetert en muogen wesen. Jnde manig man heuet dar miede verloren gewest. an liue of an guode. Glorie is en groit lof. van tegewinnene vruomigheit. of van anders ieneger sconre dait. die vermeert is in maniegen anderen | steden. glorie is als viele te sechene. als vermeertheit. Dar vombe segt die wise man. dat vermeertheit. makt den guoden man die doit is wieder leuende. Jn anderen steden segt hie dar tegen. die doit die vervonwert. vermertheit. Want si trekt tuot huor den hogen. inde den lagen. Mar wi | pinen vons so viele vomb glorie te gewinnene. dat wi lieuer heben guot man te scinene | |
[pagina 63]
| |
dan te wesene. Jnde heben lieuer quait man te wesene dan te scinene. Dar vombe segt die wise man. Valgs ere helpet. inde nie lugen helpt. Mar die glorie van der lugene. die kuompt wieder te scanden. | bede in dies werelt inde in dander. Dar vombe segt die wise man. glorie en is el nit dan en wint in diesen sterfliken leuen. Jnde en gene duogde en mag dar af kuomen. En si dat si miet anderen duogden gescelscapt si. Mar die winnen wille die regte glorie. hie sal siin dat hi suolk si als die luode van vome wanen. Want is dat hiese waint gewinnen mit valsger dait. dan mag nit wesen. Want die regte glorie die wuortelt inde wast | altois. Mar die valsge die valt gelike den bladeren van den bome. Jc heb v. geseit wat vorberlik sake is. Nuo sal ic v. sechen wat sake vorberliker is dene dan dander. Jet is manig man die lieuer heuet grote ligame dan richeit. Jnde en ander heuet lieuer richeit dan groten ligame. Jnde also ist van der gigten van der auenturen Jnde van den duogden van den ligame. Want | |
[pagina 64]
| |
van den duogden van den ligame is dene beter dan dandere. Want iet is beter guode cragt. dan groit ligame of dapperheit. Want die gigte van der auenturen is ak beter dene dan dandere. Want iet is beter guode vermartheit dan richeit. Die vifte manire van rade dat heb ic v geseit. dat is. van dien dat tegen bederflik sake is inde erlik. Twe saken sin dene tegens dander. dat is als dene nit ouer een en dragen mit den anderen. Mar so viele wil ic dat gie weet. dat gene sake erlik en is si en si bederflik. nog gene sake is bederflik si en si erlik. Want als ene sake is bederflik dar muot bederue af kuomen. Jnde is ene sake erlike si muot vons tuot vor trechen miet vore hoget. Mar iet sin sulke luode. die wanen dat manige sake bederflik si die harde vonerlik sin. Want si wanen dat bederflik sake si. is dat en man meerret sin guot mit ander mans scade. Mar dats meer tegens nature | |
[pagina 65]
| |
dan die doit. nof armuode nof pine. Want is dat en man en anderen sin guot niemt. vomb sine te meerren. dan vervonwert hie | die minskil gescelscap die van naturen kuompt. Mar als weil als nature gehingt dat manlik lieuer gewint te sir behuof dan ten anderen. als wel | verbit si. dat nieman sin guot en merre mit ander mans scade. Jnde die giene die scade duot en anderen. vomb sinen vruome te duone. of hie waint dat hie nit misduot tegen nature. of hie ordelt in vom seluer. dat man | meer scuowen sal armuode dan scande. Jnde waint hie dat hie nit en misduot. tegens nature. hien is gen man. Jnde waint hi dat man mer scuowen sal armuode dan die suonden van vonregt te duone. so is hie bedrogen inde doit. Want viele vresliker sin die quaitheit van der herten. dat is vonregt te duone. dan die scade van den ligame. nog van der auenturen. dat is die doit of armuode. Mar bi auenturen man sal mi vragen. here duo | ic quait. of ic van huonger sterue. of ic enen manne sine spise nieme. Jc sech ia | |
[pagina 66]
| |
gi. Want gi siit sculdig mer te minnene. die duogden van | vor herten dan v vonsalig leuen. Want also als die quaitheit van der herten sin swarre dan van den ligame. also sin betere die duogt van der herten dan van den ligame. dar vombe en suol di gen guot so sere minnen dar gi miede muoget verlisen den name van den guoden manne. Want en geen erts guot mag v. den naim wieder geuen verlis dine. Mar wo is dat. dat die lude niene kinnen den laster inde die scande die is int gewinnen. of vom duonkt dat si duon dat erlik is. of si duon suonde al willens. Jnde | duon si suonde al willens so sin si verloren. Want si gelaten of si guode luode waren. Want hadde en man en vingeren. dar die steen suolk kragt af hadde. dat man den man niet siin en mogte. dar vombe dede hie quait die suonde en ware nit te mindere. dan of man vome sage. Mar die guode man die en duot gene sake hiene wil wel dat manse wete. Jnde is dat gi v huot van quait te duone. vomb dat gi v vontsiit dat mant wieten sal, giene | lait nit vomb | |
[pagina 67]
| |
duogde. Mar vomb dat. dat gi vontsiit dat die ligame vontgelden sal. Jnde in diesen saken. so si di van den naturen van den diren. Want die wolf die vontsiit al die kuolen. dat hie dar gewagt waint wesen. Jnde die vuogele wanen altois vallen in den strik. Dar vombe seght die wise man. die guode man huot vome van suonden. vomb die minne van vonsen here. Jnde die quade vomb den angst dat hies vontgelden sal. Mar is. dat gi vwen sin seet vop ene sake die vorberlik is. Jnde gi darna siit dat si lelik is te duone. Jene seche nit dat gi lait v. vorbuor te duone. Mar ic wille dat gi verstait. dat gene sake die lelik is te duone. mag vorberlik wesen. | Mar man siit dicke. dat en erlik sake. die nit en schint orberlik te | wesene kuompt tuot suolken ende. dat dar groit vorbuor af kuompt dar man nit vor en huot. Jnde van vonerliken saken nog int beginsel nog in tinde. en kuompt dar nummer vorbur af. Dar vomb segh ic v. die duon wille vorberlik sake. Jnde erlike. die swige van der vorberliker Jnde hoide vome an derlike. | |
[pagina 68]
| |
Urint ic wil di des bidden inde wairn wo groit armuode of vongeual so duo heues dat duo di huots vuor scande. Want die wise man die seget. scande geduort langer dan armuode. Man vint viele luode die geliken den gienen die die stuortkarren vuoren. Want si sorgen suome wile meer. vomb vor karre die nit tinscillinge wert en is. dan vomb vor part dat wel tienpuont wert is. Want si setten vor karre vonder dak. Jnde vor part laten si in den wint inde in den regene. Nuo wil ic v. diesen sin beduden. die karre dat is die ligame van den minsche. Jnde dat part dat is die siele. Also als die karre nit duon en mag suondert part. sone mag nit duon die ligame suonder die siele. Mar iet is en dode sake. Jnde die giene die die karre vonder dak vuort. Jnde sin part druote lait. dait is die gene die meer sorget vomb den ligame dan vomb die siele. Urint ic wil v. troisten in vwen vongeual inde in vwen pinsinghen. also als ic kan. gi wet wel dat wi van niete kuomen Jnde | leuen inde | |
[pagina 69]
| |
sin so lange dat wie wieder te niete kuomen. Jnde dar vombe si wi sculdig meer te sorgene inde veruert te wesene dan vomb ienege sake die vons gescien mag. Jnde sint dat wi vomb die grote saken niene pinsen. nog en sorgen. sone pinst nit vomb die minren. Want die vop dat grote nit en agt. die en sal vopt clene nit agten. Urint antwerde mi. wilk beter is. of vruotscap of reden. Jnde en wiet dis nit. ic wils v berigten. Jc seche dat reden beter is. inde sech v war vombe. Dirste is. dat vruotscap wel is sunder reden. Mar reden en is geen tit suonder vruotscap. Also als die man die gnuog weet. Jnde die sine vruotscap tegenen werke bringen en wille. dan is geen reden. Dander reden is war vombe reden beter is dan vruotscap. Want torne verkirt wel vruotscap. Mar reden die duort altois. Also als die man die in wanhope is. Jnde die wel wet. wragt hie dar miede dat hie verduompt ware. mar reden die en lats vome nit duon. Engen man en kan sinen torne | |
[pagina 70]
| |
bedwinchen. en si dat reden dar miede werke. Tirde war vombe reden beter is dan vruotscap. so is. dat reden beter is \ in allen ordelen inde in allen regten. dan vruotscap. Want iet sin delre gnuog. die altesere hoiden ene side. Jnde regten volget reden. Jnde die hoit huome te twen partien gelik. Jnde duot dat si sculdig is. Jet virde puont war vombe reden beter is dan vruotscap is suolk. Wart also dat reden in den minsche niene ware. sone ware geen vondersceet. tuschen den minsche inde den diren. Want dire heben vruotscap in vom. war bi si kennen inde | wieten. Jnde vuogele war bi si spreken. Dar vombe is die minsche beter dan die dire. vomb dat hie reden in huome heuet. Jnde dar vombe sin die dire ergere. dan die minsche. al heben si vruotscap. Aldus mag man ligtelik pruuen dat reden beter is dan vruotscap. Minsche nuo versta inde merke. wan du kuomen bist. Wart dat adam vome wel gehoiden hadde. also. als vom got seluer seide. dat hi nit | |
[pagina 71]
| |
van enen afte geten en hadde. Jnde hie vome an dander gehoiden hadde. van diesen ertschen paradise. war hi kuomen int | hiemelsche paradis. Jnde vons en ware nummer ouel gesciet. had hi tgebot nit gebroken. Owi war vombe dede hie screien den groten inde den clenen. vomb so clene sake. Jet was grot wonder van enen so starken manne. inde so wisen. dat hi verlois also sine cragt. Jnde bi vome die vons vader was. so sin die kinder nog alle eigen. die alle waren edel inde vri. Jnde dar verdarf vons edelduom. Jnde vons blitscap wart gekirt in groten rowe. Want hie begerde den quaitsten appel van den haue. Hiene vragte nit mit sinre vruotscap. duo hi den bant van horsamigheide brak vomb so clene sake. Owi war vombe en had hi en gene vonthadenisse. got had vome den doit in den appel bescrieuen. want iet was sait van allen vonsen vongeual. Minsche nuo verstant war du bist. Duone muoges in diese werelt enen slap nit sangte slapen. nog gene ruoste heben. dat is vomb die | |
[pagina 72]
| |
suonden van adame inde van euen. Owi dat ander mans suonden vons verslain. nogtan en ait wi van den appel nit. si twe al ene sluogen vor hant drane. Jnde wi muotent vongelden. beide des auents inde | des morgens. Jnde wi verteren vons broit mit groten pinen. inde mit groten arbeide. Minsche duo dets enen quaden spruong. duo du sprunges van den hogen torne. Jnde van den berge van blitscap. Jnde van den gescelscap van den ingellen in dit dal mit den diren. Jnde vomb din broit. inde vomb dine spise. inde vomb dine kledinche so bis tu beide dag inde nagt. in pinen inde in arbeide. Jnde is dat tu anders nit drane en wins. so bestaits tu qualik dinen arbeit. Nuo minsche. Wan duo quaims inde war duo bist dat heb ic die geseit. War du hienen soits des en wet ic nit. Huod di du bist geseet vomb te pruouene. Nuo duo wilk so du wilt of guot of quait. Want duo soits heben dat du verdins. Du siis twe wege die openbare sin. dene is ter hellen dander ten hemelrike. Nuo gank wilker der wege so du wilt. Jnde is dat | |
[pagina 73]
| |
du misgrips man is di nit sculdig te clagene. die giene is stark die den anderen nieder wuorpt. Mar die giene die wieder vop | steet die is nog starkere. Minsche du spruons van hogen nieder. Nuo sprink van nieder wieder hoge Er dat din spruonk mer geniedert wuort. du muges din verlis verkuoueren. Nuo lat siin wat du duon suols. Hoitstu diesen spruong ouer spot. so soits du enen quaden sprung springen. Van diesen lagen soits du int lager springen. so lage dat du nuommer wieder en springs. Want gen minsche van so lagen wieder en springt. Minsche nuo versta inde sette in dir herten die ander drie saken die hir na volgen. Dirste is wat du wars. Wat du wars. dat is so scandelik dat ic mi scame als ic druomb pinse . Minsche pinse of ic di meer sechen sal wat vonreinigheide du meest bist. Vop dit wort so pins altos. Jnde dit wort si in dir herten gehuot. Want dat dar meer ane is. dat lat ic vop di seluer. inde iene dars nit mer sechen. hir miede swig ieks. Minsche nuo versta. du bist sculdig te wietene wat du bist. Jnde duone | |
[pagina 74]
| |
soits dar ak nit miede verbliden. Wat bis du anders dan | en sak vol misg. Du wils die seluer alle dage vollen. Jnde dan idelen. Jnde dan wieder vollen. Jnde als du idel bist so hoits du di qualik. Jnde als du alte vol bist sone kans du di seluer nit gehelpen. Jnde du heues viele vonrenigheit in dinen benden. Duone kuons di seluer nummer so behagel, nog se reine gemake duone maks vonrene al | dat dinen liue genakt. Minsche nuo verstant inde weet vort dat openbare is. Wat | soits du werden du die din vlesg als sere mins. Jnde diet so sere vuot in groter genuogte. so du dar meer ane leges so du mer verluos. Want du vuodes enen ligame di krangk is inde vonrene. Jnde duo soits wesen spise der wuorme. als du in derde beloken bis die eten sulen din stingkede vlesg. Minsche heues du wel verstain dat ic di geseit hebe. so wets du dat van adame inde van euen . die sin wif was. vons viele quaits kuomen is. Nuo verkuouere dat si di namen. Heben si di gewont so genese | |
[pagina 75]
| |
di seluer. Want got heuet wieder gehel gemakt den bant van horsamigheide. den diese twe te broken hadden. Jnde wil wi dan pine dar ane lechen, Horsamigheit brinkt vons wieder dar si vons vot gewuorpen hadde. Minsche nuo sie vuor di. Want din testament is gemakt. Jnde sech di wo. leues du qualik inde du dar inne sterues. die duouel heuet diene siele. Jnde diene mage heben din guot. Jnde die wuorme van der erden heben din ligame. Nuo en is geen van diesen drien. dit quaitste deel heuet dat hi sin deel gaue vomb dander twedel. Die hoden wille inde duon die leringe. dat diet buk leert. Jnde seget. hie sal muogen leuen erlik inde vruodelik. vnder die gementogt van dieser werelt Jnde sal sin leuen muogen leden. bi der riegelen van reden. Want regte als die viedeler. die pruouet als dene van sinen snaren. niet wel en luot nog ouer en en dreget. Rege also muot wi vons leuen setten dat dar en gene sake vonder ensi. diet qualiken duo ouer en dragen. Want is. dat saken sin diet qualik ouer en duon dragen. sone muoge wi | |
[pagina 76]
| |
vons leuen nit regte leiden. regte also als luot van der viedelen. als die snare nit ouer een en dragen. Mar iet is en groit wonder. dat wi so clair nit en siin. in vons quaitheit. als wi duon in die giene van vonsen nabure. dar vombe segt die wise man. Sint dat du so quade ogen heues. dat du dine quaitheit nit siin en muoges. wo sies du dan so clair dat du wel sies die quaitheit van dinen nabure. Dar vombe bid ic den gienen die erlik leuen wille. dat hiet dicke hore inde versta. Want en gene guode reden is te dicke gehort. Want die wise man segt. dat die guode worde tinwerue geseit. die genuogen meer in tinde dan int beginsel. dar | vombe sal man dit buk dicke horen. Dar vombe segt die wise man die ouer al is die en is nirgen. Dar vombe geualt den gienen die in bedevarde uaren. | dat si viele herbergen vinden inde luttel vrint. Jnde also iest van den gienen die von maniegerhande ambagt vonder winden. Jnde en hoiden von te genen. Jnde die spise die vorstrekt luottel den ligame. die man vot wuorpt. als scire als man geten heuet. Jnde en gene sake so en benemet so sere | gesuonde | |
[pagina 77]
| |
als dicke te verwandelen sin leuen. Dar vombe iest dwasheit alte viele saken te begripene. des man nit te houede kuomen en mag. Dar vombe sech ic v. dat gi v. nit en pint. tuonthoidene inde te duone al dat gi siet. mar pint v. te duone dat diet buk seget. beide mit munde inde mit werke. Want gine suolt nuommer siin guoden arseter. Js dat hi dar miede nit dicke en werkt. dat hi dar vommer groten lof miede | verkrigt. Also sin geseet inde gegeuen die guode worde. dat manse nit heben en sal alene vomb te horne. nog vomb te verstane. Mar man is sculdig tuofene dat si sechen. Jnde ak te duone. Vrint inde vomb dat of v. dit buksken is iet te swar of telang te lesene. so heb ic geseet endeel guoder kuorter worde. in gescrigte. Jnde so git dicker lest dirste inde dat leste. soit v. beet bekuomen sal |
|