Nederlandse historische bronnen 4

121 Willem van Oranje aan Jan van Nassau Antwerpen, 29 mei 1582^121*

Unser freundtlich dienst undt was wir mehr liebs undt gudts vermogen jederzeidt zuvor. Wolgeborner freundtlicher lieber bruder. E.L. schreiben under dato den 19 maij haben wir empfangen undt thun dieselbige wegen der zugeschickten zeitungen und sunst aller bruderlichen erbietung undt zunaigung gantz freundtlich bedancken.

Soviel nhun unsere person undt den unglucklichen zustandt der unss begegnet, thut anlangen, wollen wir in keinen zweijffel stellen. E.L. werden durch iren dazumal alhie anwesenden diener genugsam vernommen haben wie wunderbarlich unss der Almachtige, undt sonder alle menschliche zuversicht undt hoffnung erhalten hadt, darab wir dan inne genugsam dancken mögen und wolten E.L. darab wie auch sunst von allem andere dieser Niederlanden gelegenheiten gerne weitlauffiger verstendiget haben. Da dasselbige unsere jetzige schwachkeidt¹⁴³, undt neben derselbigen die betruebnis so unss wegenn des absterbens, der hochgebornen furstinnen unserer viel geliebter gemahlinnen frawen Charlotten von Bourbon etc.¹⁴⁴ begegnet nicht verhindert hatte und ob wir schon wol erachten khunnen es werden E.L. derwegen neben uns ein sonderes bruderliches mitleiden undt betruebnis gefhulen. Jedoch wollen wir verhoffen sie werden dasselbige mit unss geduldig verdragen, undt erwegen das wir als Christen, alsolche undt dergleichen zustende unsrem gutigem Godt heimstellen sollen undt seiner Godtlichenn Almachtighaidt vor alsolche heimsuchungen danck sagen.

Newer zeittung wissen wir E.L. dieser orth jetzo anders nicht zu zuschreiben dan das wir verhoffen inwendig wenig tagen einen zimblichen heuffen guter kriegsvolcks beijeinander zu haben. Dero trostlichen zuversicht wir werden unsrem feindt damit wol begegnen mogen.

121* KHA, Inv. 3, nr. 897⁸. Expeditie.

143 Op 18 maart pleegde Jaureguy zijn aanslag op de Prins.

144 Charlotte de Bourbon was 5 mei 1582 overleden.

[p. 125]

Wolten darzu nichts liebers begegnen dan das E.L. alhie beij unss verschinen undt uns neben andere mit dero guten rath undt thadt beijwonen undt behulfflich sein mochten, wollens aber E.L. geschefften undt zeidtangelegenheiten heimstellen - - -