Nederlandse historische bronnen 4

98 Willem van Oranje aan Jan van Nassau Middelburg, 17 april 1580^98*

Welgheboren grave, vrientlijcke lieve broeder. Ons sijn sedert onse aencompste in desen eijlande van Walcheren verscheijden brieven van weghen U.L. ghecomen, hebbende oock ghisteren morghen ontfangen denghenen die U.L. op den 12den dach deser maent heeft gescreven, bij denwelcken ons aenghenaem is gheweest te verstaen die veroveringhe der stede van Oldenzeel; verhopende, dat de saecke van Linghen des te beteren voortganck sal hebben, ende dat die van Groeninghen, aenmerckende ter eenre, hoe Godt almachtich binnen zekeren tijt belieft heeft zijnen seghen over dese saecke te seijnden, ende ten anderen die cleijne hope ende ghereetschepe, dier is, dat zij in corten tijde souden moghen ontset worden, des te lichtelijcker tot een redelijck appoinctement sullen ver-

98* HHSA, ADA, Abt. 170 III, Korrespondenzen 1580. Expeditie.

[p. 107]

staen. Wij sijn gheheelijcken versekert, dat bij U.L. ende onsen vrientlijcken lieven neve den grave van Hohenloo, mitsgaders den ghedeputeerden van de naerdere gheunieerde provinciën alsulcke neersticheijt ende goede offitiën in der saecke sullen ghedaen wordden, dat wij alle goede tijdinghe daervan hebben te verwachten.

U.L. sal bij zekere andere onse brieven op ghisteren ghescreven, soe aen U.L. als aen den bovengenoemden grave van Hohenloo, vernemen, tgene wij in den saecken van Linghen hebben gheresolveert, nijet twijffelende oft den drossaert en sal hem tot alle redene voeghen.

Belangende tghene U.L. ons schrijft van der stede van Straelen, souden wij goet ende raetsaem vinden, dat daerup eenen goeden aenslach ghemaeckt wordde, behoudens dat alle ghereetschepe, daertoe noodich wel secretelijcken worde gheprepareert, ende sunderlinghen alsoe 't gheschut nijet wijt van daer en is, dat 'tselve ghereet ende veerdich ghemaeckt, ende behoorlijcken met cruijt, coghelen ende andersins wordde versien, aleer men eenich ghelaet thoone deselve stadt te willen overvallen.

Ende inghevalle die stadt inneghenomen wordt (soo wij verhopen door Godes hulpe, dat tselve sonder groote swaricheijt sal connen gheschieden) souden wij wel van meijninghe ende opinie sijn, dat men stracx daernaer voort huijs van Blijenbeeck¹³⁴ ruckte om tselve insgelijcx te belegheren. 't Welcke ons bedunckens des te eer waere te overcomen, soe overmits dat stelve huijs, siende Straelen alreede verloren, nijet en sal willen houden teghens vijf oft zes grove stucken gheschuts; als oock dat den vijandt daerbij nijet en sal ghelockt wordden om met groot ghewelt soe haest eenich ontset te comen doen, ghelijck als hij wel doen soude, even verre dat men die stadt van Remunde¹³⁵ belegherde, diewelcke hij ontwijffelick wel eer bij alle middelen soude soecken te ontsetten, sijnde dezelve stadt groot, sulcx dat den vijant soe van binnen als van buijten hem aldaer beter can behelpen. Ende ofmen die stadt aen die eene zijde hadde beleghert, soe soude men evenwel een goet ghetal volcx aen die andere zijde van der riviere moeten hebben, aenghesien dat anderssins die van binnen tot allen tijden versch volck souden connen becomen. Sulcx dat ons dunckt, dat denselven aenslach op Remunde voor dese reijse noch nijet gheraeden en waere, maer dat men voor d'eerste die saecken van Straelen ende Blijenbeke int werck stellen. Dewelcke gheluckende sal het lant van Ghelre evenwel voor alle affloopinghen ende plunderinghen der vijanden seer bevrijdt sijn. Hoewel nochtans wij nijet en weeten wat goede middelen, 't waere van eenich heijmelick verstandt ofte anderssins dat U.L. op Remunde mach hebben, stellende daeromme zulcx tot U.L. goede discretie.

Wij sullen met ghelegentheijt letten op de obligatie van den heeren landtgrave, alsoe ons jeghenwoirdelijcken, overmits die cortheijt des tijts ende dat wij in

134 Kasteel Bleijenbeek onder Bergen in Limburg.

135 Roermond.

[p. 108]

diligentie den brengher deser wel hebben willen afveerdighen, tselve nijet mogelijcken en is gheweest.

Ghesien hebbende tghene bij U.L. hooffmeester aen dezelve is ghescreven, beroerende de saecke van Saltbommel ende de weijgeringhe die sij sijn doende om hen met den furstendom Ghelre te conjugeren, soo scrijven wij jegenwoirdelijck andermael aen die van Bommel bij onse brieven, hierbij ghevueght, ten eijnde zij het innehouden van onse voorgaende volbringen; verhopende, dat zij sulcx naercomen sullen - - -