Nederlandse historische bronnen 4

[p. 28]

8 Willem van Oranje aan Jan van Nassau Antwerpen, 14 september 1578^8*

Monsieur mon frère. Il y a quelque temps que j'avois délibéré de faire ung tour vers Hollande, tant pour visiter les Estatz, villes et bons habitans de par dela que pour l'advis desdicts Estatz une fois mecte ung bon ordre aux affaires de ladicte province. Mais comme par les urgens affaires survenuz icy de jour en jour, j'en suis esté tousjours à mon regret empesché, ne m'estant encores pour le présent possible d'entreprendre ce voyaige pour l'estat présent de noz affaires communs et que cependant toutefois j'ay trouvé du tout convenir de donner quelque ordre, tant pour le faict de régime et gouvernement dudict Hollande que pour le regard du revenu et charges d'icelluy pays et aultres choses concernans les contributions illecq, afin de pouvoir tant mieulx faire puis après surtout ung estat asseuré, j'ay convocqué lesdicts Estatz d'Hollande et aussy ceulx de Zeelande, pour estre et comparoir en la ville de Gorichum le sixiesme jour du mois d'Octobre prochainement venant-ayant desjà à cest effect dépesché mes lettres vers lesdicts Estatz. Or désirant illecq faire traicter ces choses par quelque personnaige signallé, d'authorité et bien confident, c'est cause, monsieur mon frère, que j'ay bien voulu vous escripre la présente, pour vous prier bien affectueusement que veuillez prendre la paine de vous trouver audict sixiesme jour d'octobre en ladicte ville de Gorrichum, pour y comparoistre de ma part et faire entendre ausdicts Estatz les choses que je leur veulx proposer. J'ay prié monsieur Van Dorp²², et aussy l'advocat Buys²³, qu'ilz veuillent aussy s'encheminer, pour alors vers ledict Gorrichum pour comparoistre ausdicts Estatz avecq vous et vous assister de leur bon advis et conseil, ainsi que je m'asseure entièrement, qu'ilz feront, suyvant les propos et communications que j'en ay eu avecq ledict advocat Buys qui a esté icy quelques jours, et ne fouldray, Dieu aydant, vous envoyer d'icy à peu de jours bien ample instruction, par laquelle vous apperra bien particulièrement de mon intention et de tout ce que je désire estre proposé et traicté avecq lesdicts Estatz. J'ay choysi ladicte ville de Gorrichum, pour tenir ceste journée et assemblée des Estatz, d'aultant que c'est plus proche de vostre gouvernement. Vous priant aultres fois, Monsieur mon frère, de faire ce voyage au jour susdict, et par dessus le service que toute ceste patrie en recepvra, vous m'en ferez très singulier plaisir, que je seray tousjours bien prest de déservir en vostre endroict d'aussy bonne et prompte volunté, que, me recommandant très affectueusement en vostre bonne grace, je supplieray Dieu vous donner, Monsieur mon frère, en parfaicte santé heureuse et longue vie - - -

8* KHA, Inv. 3, nr. 855. Expeditie.

22 Arend van Dorp, heer van Teemsche, Maasdam en Middelharnis, raad van de Prins.

23 Paulus Buys, raadpensionaris van Holland.