Mastreecht, 13 Februari 1876.
Lezers!
Es geer aon de redactie van de Momus Program de vraog stélt: ‘Woerum die gazet?’ dan zuut ze zich gedwongen uch daoop en dreivoudig antwoord te geven, en wel:
1o. Al lang deeg zich hei in Mastreecht de behoefte geveulen aon................................ enz. enz. zoedat dan eindelik einige lui op de gedachte kaomen en gazét oet te geven, die veurnaomelik de Momezij, mer in 't algemein ouch hiel Mastreecht op den huidigen daag weurd aongebooien.
2o. Vond et de redactie jaomer, dat zoe mennige schoen veurdracht, zoe mennig schoen concert, zoe mennige schoen comedie, ins gehuurd, weer dadelik vergeten woort, wat, door en herinnering aon die zaken, of wel door de veurdrachten zelf met zwarten ink op wit papier te drúkken, neet mie 't geval zal ziin.
3o. Waos et oetgeven van dees gazet e middelke um den erme maan alweer einige centjes mie te bezúrgen, dao de opbringst daovaan, nao aoftrék van de kosten, in Momus ermekas gestort weurd.
Eus gazet zal zich met alles bemeuien, wat in 't dageliks leven veurkump, behalve mét politiek, religie, landbouw, kunsten en wetenschappen, modes, litteratuur, gezondheid, landHuisHoudKunde, strategie, horticultuur....... behalve dat, mét alles wat naom heet.
Es taol zullen veer veurnaomelik eus moojertaol, d.i. Mastreechts, gebruuken, zonder us nogtans daoaon allein te hauwen, en mooten eus lezers neet te zier verbaasd stoon op te kiken, es ze van tiid tot tiid en artikelke in 't hollands, frans, duits of ingels te lezen kriegen. - Groete geister ziin aon gein taol gebonden, en ouch aon gein spelling. In 't Mastreechts is me euver et léste nog neet good eins; daorum konnen veer eus kollaborateurs allein aonraojen zoeveul meugelik de spelling van de redactie te volgen, umdat die ze zeker 't béste zou mooten kinnen.
En heimét winsen veer uch de gooien aovend! Zou úch dit proofnummerke van eus Momus Program aonstoon, dan blijf úch de redactie hiel erkintelik daoveur; zou 't uch neet aonstoon......... dan is 't ouch al good.
Auteursrechtvrij
