[fol. 4r] 782. Om quaet haer vut te winnen ende van scorftheiden.
Recipe harse, ende pec, ende terre, elcs euen vele, ende smeltet ouer tvier mit soeten vire, ende dan nem een luttel tarwen bloemen, ende temperse mit wat waters ghelijc een wellinghe, ende doet totten voersten dinghen, ende latet sieden ghelijc eenre saluen, ende salue daer mede dat quade seer ende haer, ende des anderen daghes trecket af teghen stroems, ende daer soe salt vut gaen mitten plaester, ende dan salmen thoeft dwaen mit water daer sout in is ghesoden, ende dat maect den gront scoen ende claer, ende dan soe maect dese salue daer toe, ende heilet daer mede, aldus ghemaket:
Recipe ceruse, ende litargium, wel ghepuluert in een mortier, ende dan soe nem raep oly, ende meysche botter, ende smeltse ouer tvier mit soeten vire ende doet den poder daermals cerusse, ende litarginum, ende een luttel was doet daer toe ende een luttel tarwen blomen ende roerent te samen vanden viere ende maken daer af een salue, ende daer mede soe saluet dat hoeft ende die scorftheide, ende het sal helen ende gans werden.
Auteursrechtelijk beschermd