Memorye

Kroniek van godsdienstige en politieke twisten in Alkmaar, 1618-1621

56

Den drieentwintichsten negentienden januariius is dese voorschreven man wederom van den schout met sijn dienaers uut den huys gehaelt ende weder ghevangen gheset omdat hij die voorschreven 425 gulden niet binnen die tijt van vierentwintich uren niet op gebracht en hadde, ghelijck sijn sentency ghegaen was. Nou dese man en was

[p. 4343]

⁺
sijn middel soo groot niet, dat hij dat voorschreven gelt opbrengen mochte. Maer den voorschreven man heeft gepresenteert voor schout en schepens dat hij met sijn huysvrou en kint met haer aentrecken de kleren. Soo sij gingen en stonden wel begeerden uut sijn goet te gaen en laten mijn heren voort met sijn goet doen soo 't haer beliefden. Maer mijn hereen den schout en schepens en waren daer niet mede tevreden, want sij sagen wel als sij het goet al deden verkopen dat daer soo veel niet en was. Dat den officier aen die voorschreven 425 gulden niet en soude mogen komen, soodat schout en schepens begeerde dat die voorschrevenen man sijn goet selve soude laten verkoopen en besien wat gelt dat hij daer-

+ 4344

[p. 4344]

van maken mocht ende wat ghelt datter dan noch aen tekort quam dat het voorschreven goet soo veel niet ghegouwen en hadde dat den officier die voorschreven 425 gulden daer van krijgen mochte. Daer mocht dese voorschreven man ofte sijn huysvrou raet om soecken want het voorschreven gelt most er eerst wesen eer den man uut die ghevanckenisse koomen mocht ende indien het voorschreven gelt niet opghebracht en worden soo seyden die schepens dat sij den man uut die stat bannen souden. Soo isser een goet burger C.C. ghenaempt en was een kuyper van sijn ambacht ende was dese voorschreven ghekondemneerde sijn buerman voor schout en schepens ghegaen en heeft haer ghevraecht om oorlof of

[p. 4345]

⁺
hij met noch een goet burger mochte gaen om dit voorschreven gelt van enige goetwillige burgers te halen en dat den officier te geven. Maer den schout en schepens en wilden daer geen konsent toe geven, want sij wisten wel dattet het hof hadden laten verbieden. Wie dat daer enich ghelt toe gaf soude twiehondert gulden verbeuren van boeten, want het hof en begeert niet dat men die armianen enighe bijstant sullen doen om daer wat toe te geven als sij in boeten ghevallen zijn.

+ 4346