Memorye

Kroniek van godsdienstige en politieke twisten in Alkmaar, 1618-1621

49

Den sestienden, seventienden ende den achtienden september soo sijn alle die schoolmeesters die binnen Alckmaer ende oock die schoolmeesters van alle die dorpen die onder het classis van behoor den Alckmaer behoorden, te Alckmaer in het sakersty ontboden gheweest ende daer sijn twie kommesarissen geweest.

[p. 4336]

met enige predikanten om die schoolmeesters te examineren en om haer voor te houwen ende te vragen, of sij den categissemus ende die Nederlantse confessye ende oock het boeck dat het Dortse Synody ghemaeckt hadde, niet en bekende in alles met Goodts woort te accorderen ende die drie voornoemde boecken conform Goodts woort te wesen ende daervoor te houwen. Daer most nou elck schoolmeester sijn verstant ofte ghevoelen opseggen ende wat schoolmeesters die haer ghevoelen nou met dese voornoemde drie boecken accordeerde ofte overeenquamen, die mochten in haren schooldienst contuniweren ofte blijven. Ende wat schoolmeesters dat haer ghevoelen met dese drie voornoemde boecken in alles niet en accordeerde ende

[p. 4337]

dat sij saeyden dat sij daer enighe swaricheyt in maeckten om die te onderteyckenen. Alwaer 't schoon dat sij prisenteerde ghelijck sij wel gepresenteertet hebben dat sij alle die boecken die haer het classis opleyden ofte begeerden die schoolkinderen wel te leren. Evenwel soo en waren die mannen daer niet mede tevreden, maer sij gaven soodanige schoolmeesters enige tijt haer bedencken daerop of sij haren schooldienst verlaten wilden dan of sij begeerden onderteyckeninge te doen.