955. ¶ Teghen dy grote fistel.
Nemt tsap van rypwort ende wyt van eyn ey ende roggen meel, elx euen woel, ende knetet tsamen ende mact een plaster vanden dege so grot dat het dy wonde bedect ende legt op dy plaester malublader of safte bladeren; dat bynt thoe (fol. 92v) myt ene cleyde hent ten auent, dan doetet af: ghy sult den plaster gescort vinden van den ouel, dan dwatet euel myt lay water of warm ende salue dy wonde myt salue gemact aldus. Nemt herbe uautier, herbe rebeert, sanikel, braggel, wey brode, haeshoeue, fumus terre, auantse, matofoloen, lanselye, matelyue, santwoertel, warmt werc, herten roet, smout van gansen ende honich, dit stampt al tsamen ende legt yn dy wonde ende op dy salue saltu leggen ende vorgesachte plaester ende telken scoen wascen. Ende alle dry dage soe doet yn dy wont puluer van witten glasen, ende ghif den sieke diicke drincken guden dranck, dus gheneestmen dy fistel. Dy dranc salmen maken van auantse ende dy woertel molleyne myt goden wyn.
Auteursrechtelijk beschermd