701. Aqua calamenti sic fit.
Recipe nepticam dat is eyn krut ende vasset op hogen steden, stampet ende maecter water af. Dyt water ys goet gedroncken teghen allen steecten van quaden wormen ende ys den genen goet dy venyn genut heuet, want het doet het venyn ther kelen wt commen. Het genest dy geele suct .ix. morghen stonden gedroncken ende oeck den korts dy comt van melancolien. Het is seer goet ter lazarien ende teghen dy plecken die den wrouwen bliuen van kynden. Ende dodet dy wormen ynden oren, gietment daer warm yn. Heet genest alle quade gaten, dwaet men sy daer mede ende sy open syn. Mer syn sy geloken, soe salment dryncken. Ende suuert dy boorst, dye longhen ende verwarmet dye nyren dy wercoldet syn, ende ys goet teghent grawe water ende confortirt dat gesychte, dy mage ende alle dy leden.
Auteursrechtelijk beschermd