Medische en technische Middelnederlandse recepten

616. Segel was thoe maken ende tweruen.

Soe mactmen dat alrebeeste ende werste ende gheeste nemen tot eyn pont ende snidet aen kleyne stucken ende smeltet yn eyn schoen pannekyn, ende alst gesmouten ys, soe nemet wan wyer, ende doet dar thoe des wynters .vj. loet terpentyns erst warm gemact mer nyetste heete yn eyn panneken, mer des sommers .iiij. loet, spans groen .j. loet, dat cleyn ghepulueresirt ys. Ende roert dat weel myt malcanderen om ende sighet dan doer een lynnen doock yn eyn scottel daer (fol. 43^v) eyn wenich waters yn ys op den badem ende latent dan staen couden, ende snident dan doer aen stucken of ghy wylt. Tot eyn half pont was ys genoch .iij. wirdel loet spans groen, want anders woerdet tbruyn, Item dat was en salmen nyt heet smeelten mer alst gesmouten ys, soe salment van fuer doen op dattet nyt tho hart en warde ende broes. Dat spans groen en doet nyt teffens yn meer yrst een deel ende menghet wael myt dat was ende laet en droppel wallen op wen nagel of op eyn tenne scottel, want soe yst goet twernemen of genoch gegroent ys of nyt, ende scynet dan thoe bleeck, soe doter wat meer spans groen thoe, ende pruft als vorscreuen is, hent w dy werue behaghet. Ende als dat was mytten terbentyn weel ghemenghet ys ende myt dat spans groen, soe latet staen ongerurt een miserere lanck op dat dy drossicheit syncke, ende gietet sachtelic sonder ruren ynden doeck, ende den drosse en ghitet dar nyt mede thoe. Meer dan⁽¹⁹⁶⁾ ghitet yn eyn ander scuttel doer den seluen doeck. Hyr machmen briuen mede segelen.

(196) dan: het Hs. heeft den.