Medische en technische Middelnederlandse recepten

596. Item om alle gesteenten of glasen thoe ghieten yn formen, hart ende schoen.

So⁽¹⁸⁸⁾ stoet dat glas ofte gesteent al cleyn yn eyn wysel ende doet yn eyn teest dy groet ys, ende nemt soe groet antimoni tpuluer gestoten als een boen, ende alsoe woel weedaschen. Ende stoet dat oeck tpuluer, ende doet yn eyn teest tgader tot den glase ofte gestent, ende latet heet werden, ende rorent wel onder een tot dathet vergaet ende ghitent in wat forme dat ghy wylt ende latet couden. Dan nemt calck water ende legget dat gheghoten dinck dar yn, ende latent en vre daryn ligghen, soe worhet hart.

(188) So: het Hs. heeft Soet.