Medische en technische Middelnederlandse recepten

(fol. 29^v) 547. Hoemen wit leder maken sal.

So salmen eerst nemen een middelbaer of een dicke koei huut na dien datmense dicke of dunne hebbe[n] wil. Dat leer also alst wt den calc comt, niet wt die runne, maer wt die calc. Ende die salmen an beide side die liesen ende dat dunste een voet breet of sniden. Ende dan salmen⁽¹³⁷⁾ die calc striken met een plomp mes dairmen dat haer mede of striket, of men salt wt vringhen ende makent droghe alsmen mach, ende sniden die huut an .iiij. stucken. Ende dan salmen nemen .iij. stoep waters ende anderhalf pont aluyns ende een grote hantvol sauts, ende menget te samen ende makent heet opt vier dat het niet en siet maer dat het heet si dat men dair een hant in steken of doghen mach. Ende ghieten dit in een tobbekijn. Ende nemen dan die stucken ende dopense dair in ende vringhense sterkelic mitten water. Ende als dan dat water cout is, so salment dan weder wermen ende die stucken dair weder in dopen ende wringense ander werf weder wt ende derdewerf. Ende ten vierden werue dat water dattter dan ouer ghescoten is, dat salmen weder wermen. Ende alst ghewermt is, so salment in dat⁽¹³⁸⁾ tobbekijn ghieten ende men sal dair in doen .ij. grote hant vol terwen blomen ende rorent dat te gader om dat het niet en clontert. Ende dan salmen die sticken dair in voughen of vouden dat si onder dat water moghen legghen, ende sullen dair in legghen viertindech lanc. Ende dan salmense in een scone hete sonnen schijn hanghen te droghen.

(137) Na salmen staat an beide side doorstreept.

(138) Na dat staat top doorstreept.

[p. 178]

Ende alst droghe is so salment wriuen ende breken op een tant van een banck ende makent dwe ende saft. Ende ist dat noch stijf ende hart blijft, so salme[n]t met water besprenghen of legghent op een vuchtichge stede.