Medische en technische Middelnederlandse recepten

258. Tantswere.

¶ Die die tantsweer heeft, hi sal die wortel vander bille sieden in edic, als dat wel ghesoden is so sal hijt doen vanden viere ende laetent staen want het laeu wart, so sel hi nemen dien edic also laeu ende houden in sinen mont dat doet hem dat euel vergaen ist van heter naturen.

¶ Mach hi bet coude dinghen doghen in den mont dan hete, so is dat euel van heter natuer. Mer mach hi bet hete dinghen doghen dan coude so ist van couder naturen.