|
| |
| |
| |
Hoe dat de grave Gautier die clachte quam doen binnen Parijs voor
coninck Karel, ende voor alle den iongers van des conincx hove ende voor Aymijn.
DOen die grave Gautier wt Lyons gescheyden was, so is hi gereyst te Parijs daer
hi coninc Karel met zijn genoten vant, ende heeft hem eerlick gegruet also dat
behoort. Die coninc vraechde den grave hoe dat hi also haestich quam sonder
eenigen staet. Daer op de grave antwoorde ende seide. Heer coninc ic come hier
om u te laten weten dat Malegijs gevangen is van coninc Putiblas van Orcanien,
ende hi wil hem doden. Ende in spijte van allen kerstenen soo heeft hi hem twee
iaer tleven verlanget in teecken dat wi niet en souden dorren comen om hem te
verlossen, als of hi seggen wilde, laet die kerstenen comen ic salder noch meer
vermoorden. Nu soe bidt u dese edel Malegijs heer coninck dat ghy sijns wilt
ontfermen der overdaet die si hem doen, ende hi bidt allen den edelen ionghers
datse hem bistant willen doen. Coninck Karel antwoorde terstont ende seide, Ic
en wil mi des tovenaers niet aen trecken, ende ooc en wil ick niet datter yemant
vanden minen reyst op die verbuerte van sinen goede. Aymijn dit horende sey met
spitige woorden totten coninc. Her coninc ghi hoort dat mijn oom gevangen is,
ende ghy ontsegt hem bystant, nu belove ic u dat ic u ende u gheslacht beschaden
sal daer ic can ende mach, ende mettien schiet hi wter sale. Roelant, Ogier,
ende Olivier met die ander iongers belofden Aymijn datse hem te hulpe comen
souden, ende die grave Gautier ende Aymijn reden na Eggermont by den hertoge
Buevijn die veel volcx vergadert hadden. Vrou Aye van Pierlepont coninc Karels
suster en was niet wel te vreden dat Aymijn dus verstoort was, ende dat hi
gesworen had dat hi coninc Karels geslachte bescadigen soude, so sorchde si dat
het | |
| |
huwelick achter bliven soude. Binnen desen middelen tijde, soo
quamen Roelant, Ogier, Olivier ende Danoys elc met .xij. dusent mannen wel
voorsien van wapenen om den coninc Putiblas van Orcanien te bevechten, ende om
Malegijs te verlossen. Dese heren quamen bi vrou Aye met ontploken banieren ende
standaerden daer si haer in verwonderde ende si sach seere op die heren ende
vraechde waer si wilden met alle den volcke. Daer op Roelant antwoorde ende
seide. Ghenadige vrouwe ic Olivier ende Ogier willen gaen verlossen Malegijs
ende helpen den iongelinc Aymijn in spijt alle den genen diet leet is. Ogier
ende Olivier seyden, al heeftet ons de coninc verboden wi sullen nochtans Aymijn
den iongelinc helpen om sinen oom Malegijs te verlossen. Doen die heren dus
bereit waren so quam daer coninck Karel gereden, ende hi vraechde den heeren wat
si bedriven wilden met alle tvolck. Daer op Ogier antwoorde ende seyde. Heer
coninc ghi weet wel waerom wi dit volc vergadert hebben, want ghi weet wel dat
Malegijs in heydenis gevangen is ende dus sullen wi met desen volcke reisen met
Aymijn om Malegijs te verlossen wter gevangenisse. Als die coninck dit hoorde
soo seide hi. Ic wil dat ghi thuys blijft, ende en reyst nieuwers, ende ist dat
ghi wech reyst om Malegijs te verlossen, so verliest ghi mijn vrientscap. Daer
op Ogier antwoorde ende seyde. Heer coninc ghi hebt groot ongelic dat ghi ons
soudet verbieden duecht te doen, souden wi laten verderven ons vleesch ende ons
bloet vanden fellen honden, dat waer ons een eewige schande. Roelant die seyde.
Heer coninc al heeft hi u wat misdaen dat en gaet ons niet aen, ende oock mede
dat hi u dede was wel u schult: want ghi wt waert om hem te bescamen ende hier
mede uwen oorlof, want wi sullen onse crachten also op die heydenen proeven
datmen daer af sal weten te seggen: ende aldus zijn | |
| |
si tscepe
gegaen die daer bereyt lagen. Die coninck waende te verwoeden dat si dus tegen
sinen danck wech voeren, ende hi seyde tot vrou Aye zijn suster. Dits van uwen
bedrijve want ghi hebt dese heren gebeden dat si varen souden bi Aymijn u lief
die ghi waent te hebben, mer tsal u liegen, zijn overmoedich spreken sal in mijn
gedachten blijven, ende daer mede ginc die coninc wech. Vrou Aye was zeer
droevich dat dye coninc Malegijs ende Aymijn so seer hatede, ende sy heeft den
almogenden God gebeden dat hise wilde laten paysen, ende dat die heeren victorie
mochten in heidenisse vercrijgen. Aymijn ende Gautier van Lyons quamen met .xv.
M. mannen by Eggermont, ende Aymijn seide. Mi verwondert al te seer hoe dat
coninc Karel is so wreet op minen oom Malegijs, want hi ontseit hem bistant ende
hi verbiet zijn edelingen datse hem ooc niet bistaen en souden. Daer op Gautier
seide. Mi en twifelt niet, Roelant Olivier ende Ogier sullen ons volgen, dat
weet ic wel. Ende aldus rijdende zijnse gecomen te Eggermont daer si vriendelic
ontfangen waren. Doen vraechde die hertoge Buevijn van Eggermont hoe veel volc
dat coninc Karel wt brengen soude om Malegijs te verlossen. Daer op Aymijn
seyde. Weerde grootheer wat soude hi tvolc wt maken, hi verboot zijn edelen
datter niemant so stout wesen en soude dye hem eenige bistant dede. Daer op die
hertoghe seyde. O Karel coninc ghi hatet Malegijs al te seer dat ghi u edelen
verbiet dat si hem niet helpen en moeten. Doen seyde Gautier. Ick weet nochtans
wel dat Roelant, Olivier ende Ogier met haer volc comen sullen om ons te helpen,
dies die hertoge wat vertroost was. Doen Druwane sach dat die heren tscepe
gingen, so heeft si oorlof genomen, ende badt den heeren dat si wel voor hem
sien souden. De heren seyden. Wi reysen op Gods vianden, ende die God helpen wil
niemant | |
| |
en sal hem deeren. Dye vrouwe seyde. O heeren dats waer, ic
sal dagelicx bidden der moeder ons Heeren dat si u allen bewaren wil van alle
ongeval. Doen seyde Aymijn. O weerde grootvrouwe Druwane wi en sullen niet
rusten voor dat wi in der heidenen landen zijn, ende hebben minen oom verlost
wter vangenisse, ende wrake nemen van al tgeen dat ons misdaen is, ende hier
mede oorlof. Aldus so zijn die heeren tscepe gegaen met alle haren volcke, ende
haelden die seylen op ende sloegen de trompetten, ende zijn so geseylt na
heydenis toe.
Die coninc Putiblas van Torckien was wt bi dage ende bi nachte om Malegijs te
dooden, ende hi seyde totten coninc Yvorijn van Mombrant. Hoe sullen wi leven
met desen tovenaer Malegijs de Glutifax ende Bertelute versloech, ende uwen
vader, dat u een scadelike doot was, als vander misdaet aen ons beiden bedreven.
De coninc Yvorijn van Mombrant seide. Wildi hem lange houden so laet ons hem dan
tormenteren ende pine aendoen die onbegripelic is, want hijt aen ons allen
gelijc wel verdient heeft. De heeren biden coningen seiden. Had hi ons misdaen
tgene dat hi u misdaen heeft hi en soude so lange niet geleeft hebben ende tis
grote scande dat ghi hem so lange levendich hout. Die coningen dit horende
heeten datmen Malegijs wter gevangenis halen soude ende brengen hem voor die
heren. Doen Malegijs voor de coningen gebracht was, so seide coninc Putiblas.
Siet Malegijs ic heb u lanc genoech gracie gedaen, ende hier en coemt niemant
die u verantwoort, dus maect u bereet, ghi moet sterven. Als Malegijs dit
hoorde, so was hi seer droevich in hem selven ende seide. O genadige God en heb
ic nu geen vrienden: wildic mijn tooverie orboren ghi en soudet geen macht
hebben om mi yet te misdoen, ende ic soude u allen | |
| |
wel bescadigen.
Als dit coninc Yvorijn hoorde, so waende hi te verwoeden ende seide. Nu suldier
om sterven het coste dat mach. Malegijs seide. O mijn vrienden waer blijfdi,
suldi mi nu laten dooden van desen honden. O Scaerles knape ghi hebt mi al
vergeten dat sie ic wel. Buevijn vader en Aymijn neve, wiste ghy in wat liden ic
waer: sonder twifel ghi soudet keeren, mer ay lacen neen ghi. Doen seide coninc
Putiblas. Hoort Malegijs, hier is den god Belsab, ende die cost mi so veel te
houden, condi mi seggen waer die spise ende die schotelen bliven: ic belove dat
ic u ontslaen sal. Doen beval Malegijs datmen die spise inden tempel dragen
soude gelijcmen plach te doen, ende zijn also inden tempel gegaen, ende men
stelde daer die spijse opten outaer voor den god Belsab. Malegijs seide dat daer
wat anders schuylde, ende hi beval dat een yegelijc wten tempel gaen soude, ende
hi heeft sant gestroyt ontrent den outaer ende der spisen, ende is wten tempel
gegaen ende heeft die dore toe gesloten. Doen die dieven dit sagen, so zijnse
wter duwiere achter den outaer gecomen ende hebben daer die spijse met die
schotelen ende cannen weder inghebracht ende vast toe ghesloten. Dit willen wi
hier laten ende seggen van Roelant Olivier, ende Ogier, hoe datse ghecomen zijn
bi Buevijn ende Aymijn.
Als die heeren voorseyt wten scepe gegaen waren so zijn Buevijn ende Aymijn seer
blide geweest ende hebbense seer vriendelic willecoem heetende ontfangen. Doen
vraechde Ogier oft de heidenen van haer comste niet en wisten. Aymijn seyde. Ic
peyse neen si, mer ic heb eenen bespier heimelic int stadt gesonden om te
vernemen hoe dat si met minen oom leven willen ende daer af so sal hi mi
tijdinge brengen. Aldus so reysden die heeren ter tenten, ende in huysen de si
daer vonden, ende gingen eten ende | |
| |
drincken ende maecten goede
chiere, ende doen si wel gegeten ende gedroncken hadden so stelden si hem om
rusten.
Coninc Karel ende Guwelloen en waren niet wel te vreden dat Roelant, Ogier ende
Olivier sonder consent getogen waren na Turckien, ende Guwelloen ende Macharis
seiden. Heer coninc oft u nu eenigen last van orlogen op quame wie soude u
bistaen, want die bloeme van uwen edelen zijn wech gereist tegen uwen danc, ende
si helpen den genen die u meest schanden gedaen hebben, ende ghi en hebt bi u
niet dan ouderen, als bisscop Tulpijn ende Aymerijn, dit en is geen volc om
sprincreysen mede te doen. Doen seyde bisschop Tulpijn. Ghi Guwelloen wat
ghebreect u aen dese oudelingen si en slachten noch u niet dat si haren here
ontvlien sullen, mer sy blijven bi hem soot wel gebleken heeft Toostervale, ende
in meer ander plecken. Die coninc desen twist horende, beval dat si swijgen
souden, mer ic sie wel seyde die coninc, dat Roelant noch Olivier ende Ogier
niet veel meer op my en passen, mer ic sie wel dat si Malegijs liever hebben dan
si mi doen. Doen seyde bisschop Tulpijn. Heer coninck si en doen anders niet dan
si sculdich zijn te doen, want Malegijs is van Ogiers bloede ende Roelant ende
Olivier doen dit op avontuer wat hem mocht geschien dat men dan weder bistaen
soude. Doen seyde de coninc. Ghi heren ic hoor wel dat ghi alle met Malegijs
zijt: niet temin ic geloove wel dat ghi in zommige redenen waer segt: nu laet
dit bliven ende laet ons gaen ter salen om vrolic te zijn. Mer Guwelloen ende
Macharis met die ander heeren waren seer verstoort, ende seyden dat zijt op
bisscop Tulpijn wreken souden die scandelike woorden die hi geseit had als si
best mochten.
|
|
Auteursrecht onbekend