Historie van Malegijs

Hoe dat coninc Putiblas Malegijs dooden wilde, ende hoe hem die coninghinne sijn lijf verbadt, dye in hem seer verlieft was.

DIe heydenen liepen terstont in die tente daer Malegijs gebonden was ende hebben hem gebracht voor den coninc Putiblas, ende seyden tot hem. Malegijs ghi toovenaer valt hier onsen coninc te voeten ende doet hem reverencie also zijnre waerden toe behoort. Daer op Malegijs antwoorde ende seyde. Eer ick eenen hont eere oft reverencie doen soude, ic liet mi liever deen lidt vanden anderen schoren. Doen die heidenen hoorden Malegijs noemen so vraechden si hem oft die coninck een hont waer. Daer Malegijs op antwoorde ende seide. Wat is hi beter dan een hont, want hi en kent hem niet die hem geschapen ende gemaect heeft, ende na dyen dat hijt niet en weet so moet hi bat eenen hont gelicken dan een mensche, want even veel kennisse heeft hi van der godlicker mogentheyt gelic een hont. Dye coninc dese woorden horende en achte daer niet seer op, maer hi seyde. Malegijs ghy hebt veel heydenen ghedoot, ende principalic van mijn alder naeste vrienden, wat beteringhe wildy daer voor doen, ist sake dat ghi u kersten wet laten wilt ende houden u aen onse wet so sal ic u alle misdaet vergeven, ende maken u coninc van Alexandrien. Malegijs dit horende wert lachende ende seyde. Heer coninc meendi dat ic om goets wille af gaen soude minen God ende minen schepper ende ghelooven metten honden die niet en weten waer aen dat si ghelooven, noch niet en kennen aen wien si gelooven, ic soude noch liever so menigen Turck vermoor-

[p. 307]

den als icker vermoort heb, in dien ic hier wt geraken mochte. Die coninc dit horende wert so gram dat hi zijn cleederen geschoort soude hebben en haddent die heeren hem niet belet, ende doen liet hi hem binden aen eenen stake om hem te laten doot schieten. Doen die coninginne hoorde dat die coninc haer man wilde dooden Malegijs dien si wtvercoren had, so is si op gestaen wt haren bedde ende heeft haer gecleet: ende quam so daer coninc Putiblas stont, ende si sach dat daer Malegijs al naect stont ende bereet om schieten: so viel si op haer knien voor haren man den coninc, ende seide. O coninc ende here wat wildi doen soudi dusdanigen man die u so veel leets heeft ghedaen aldus gaen dooden dat waer u grote schande, want dese doot waer hem veel te saechte na de misdaet die hi aen u vrienden gedaen heeft. Die coninc siende van zijnder vrouwen dat si sulcken ootmoedicheyt dede voor den kersten, so seyde hi. Eerweerdige vrouwe wat gaet u over dat ghi voor hem bidt die u ende my so veel spijts gedaen heeft aen onser beider vrienden, wat is u meyninghe dat ghi doen wilt. Daer op die coninginne soetelic antwoorde ende seide. Heer coninc in dien ghi minen raet wildet doen, so soude ic u raden dat ghi den gevangen mede na Turckien soudet voeren, ende seynden sinen knape in kerstenrijc aen zijn vrienden, hem lieden ontbiedende: hoe dat ghi Malegijs haren neve gevangen hebt, ende dat ghi hem na heidenis voeren sult, ende willen si hem verlossen dat si comen met machte ende besien oft si hem crijgen mogen ende dat ghi hem daer om noch levendich houden sult twee iaer lanc. Ende ist dat si dan over comen met groter heyrcracht, so mogen wi so vele kerstenen verslaen want ic weet datter veel kerstenen comen sullen, ende dan moecht ghi daer tegen vergaderen alle die macht van heydenisse, so moechdi also veel van zijn

[p. 308]

vrienden verslaen als hi vanden uwen verslaghen heeft, ende dan so moechdi ontbieden den coninc Yvorijn, ende alle die van zijnder partie zijn, dat si comen sien den toovenaer Malegijs sterven in wrake van sinen vader die Malegijs broeder Vivien vander werelt geholpen heeft. Doen die coninc gehoort had den raet van zijnder vrouwen, so heeft hi den knape geroepen van Malegijs ende seide. Ghy knape ghi sult gaen in kerstenric aen die vrinden van desen Malegijs die mijn gevangen is ende segt hem lieden dat hier gevangen is, ende dat ic hem sal voeren in heidenisse, ende hem daer ophouden, ende ist dat si hem willen verlossen so mogen si comen in heidenisse, ende halen hem met cracht daer wt, want ic sal hem noch twee iaer daer nae houden. Malegijs dit horende badt sinen knape dat hi Buevijn van Eggermont sinen vader seggen wilde hoe dat hi van sinen alre meeste viant gevangen waer, ende vermaent doch coninc Karel, Roelant, Olivier ende Ogier, ende alle den iongers van coninc Karels hove, ende bisonder den iongen Aymijn minen neve, ende voort al mijn vrienden datse daer een hant van trooste mi nu willen bieden ende bistaen, twelc die knape belofde te doen. Doen die coninc Putiblas den bode wtgezonden had aen Malegijs vrienden, soo ontboot hi al zijn heren in zijn tente ende hi seide. Ghi heren ghi weet wel dat ic hier gevangen heb die alle mijn vrienden vermoort heeft, wat dunct u best ghedaen, willen wi voort reisen na Lyons, oft willen wi met onse gevangen wederom reysen na onsen landen. Doen antwoorde een heyden ende seide. Heer coninc ghi moet doen wat u belieft, mer ic soude u raden te vertrecken: want ghi hebt eenen bode gesonden aen zijn vrienden ende ontboden dat si hem souden comen verlossen in Orcanen daer suldise verwachten ende gereescap maken tegen haer lieden coemste. Ende oft si dan

[p. 309]

over quamen met groter heyrcracht, ende ghi dan wten lande waert, so souden si alle u landen verdestrueert hebben eer ghi int lant soudet comen, aldus so dunct mi tbeste datmen wederomme na huys reyst, ende die ander heren seiden des gelicx. Die coninc dit horende seynde terstont eenen bode na den coninc Yvorijn dat hi niet laten en soude hy en quame in Orcanien, ende daer soude hi hem thoonen den genen wiens broeder sinen vader versloech. Die bode scheyde van daer ende die coninc beval datmen alle ghereeschap op breken soude, ende dat hem een yegelic bereyden soude om na heydenisse te reysen. Denckt hoe bedruct dat Malegijs moest wesen als hi sach datmen hem na Turckien voerde.