als si Vivien gevonden hadde, dwelck die camerlinc consenteerde. Doe
seyde Benfluer. Als ghi mijn paerden te water rijdet, so sadelter een voor mi
ende een voor u ende laetse buyten der poorten staen al gereet dat wi daer mede
mogen haestelic wech reysen. Ter wijlen ginc si in haer vaders contoor, ende nam
so veel gouts als si in haer boegie dragen mocht, ende ghinc so na den poortier
dien si een somme van penninghen gaf, so dat hi die poorte op dede. Doen si
buyten der poorten quam so vant si daer haren camerlinc met de paerden al
bereyt, ende ginc op sitten ende reden na Akers, ende si was met eenen mantel
vercleet. Doent .ij. dagen geleden was verwonderden de heren waer die coninc
ende zijn dochter mochten zijn. Met dien quam daer geloopen een Sarazijn die van
Akers quam seggende. Ghy heren ic heb Benfluer met haren camerlinc sien rijden
na Akers. De heren dit horende waren seer bescaemt ende seyden. Hoe sullen wijt
maken als de coninc verneemt dat zijn dochter in kerstenrijc is, hoe verstoort
sal hi zijn, ende zijn ghegaen in des conincx camer daer si in ghelaten waren en
seyden. Heer coninck wi souden u een tijdinghe segghen, mer wy sorghen oft ghy u
te seer verstooren mocht. Dye coninck seyde. Ghi heeren om die tijdinghe en
dorsti hyer niet comen, want ick weetse wel, ghy wilt mi seggen dat mijn dochter
wech is, dat weet ick wel, si haddet my gheseyt, maer ic hielt voor vrouwenclap
ende die hier af orsake zijn gheweest en sullent niet meer doen. Met dese
woorden saghen die heeren op die .ij. doden die in de camer laghen die al swart
gheworden waren, so peysden die heren dat de coninck seer ghestoort zijn moeste.
Nyet te min elck sweech, ende si ginghen in dye sale metten coninck
bancketeren.
Auteursrecht onbekend