Het liedboek van Liisbet Ghoeyuaers

[p. *7]

Bijlage 8
Lied XIII

Parijs

Kind' loeft den ingel fijn.
hi vliecht soe hoge vor gods aēsc
Ende es hem soe bequame.
Dat hiten scierde hē seluē gelijc.
Franciscus es sijn name.

Wi vindē alleē van hē bescreuē
Dat hē die gods sone woude geuē
Sijn wapen al ongebroken.
D'om es hi hem meest gelijc.
Heeft ons scriftuere gesprokē.

Nv laet ons eerē dē ingelscē mā.
Die den hemel versieren can.
Met wapenē sonder gelike.
Hi leit ons vor dē ingelē rey.
En ciert dat hoge rike.

Als ic doergae dat hemels lant
En̄ aensie soe menegen sant.
Geciert met duechden scone.
Soe en ha niemā die wōdē dā hi.
Gelijc den sueten gods sone.

Recht armoede was sijn scat.
Wāt hi niet en woude noch niet ē besat
Van genen eertschen dingen.
D'om es hi nv hoechst gecroent
Al daer die ingelen singen.

Niet gelijc den gemeynē sant.
Es sinen loen int hemels lant.
Maer vandē hoechsten steden.
Hi heeft met siere oetmoedicheit
Den hemel al doer treden.

O suete vader o weert patroen.
Bidt uwē broed' den gods soen.
Dat hi ons wil vergeuen.
Ons mesdaden menichfout.
Al in dit broesche leuen.

O suete vad' bewijst v duecht.
Want ghi vor alle mā v'muecht.
Comen ten veegeuier stringe.
Alle iare op uwen dach.
Bewijst aen ons v minne.

Als wi sijn in die groote noet.
En liggen in die bitter doot.
O ingel vol genaden.
Toent ons dā v wondekē roet.
Ghi sijt vol caritaten.

Deu. e. prof. boecxken

Kinderen loeft den enghel fijn
Hy vliecht soe hooghe voer Gods aenschijn
Hi is hem so bequame
Aldaer Gods engelen singhen eewighen lof
Franciscus is sinen name

Als ick doergae dat hemelsche lant
Ende ick daer sie soe menighen sant
Verciert met duechden schone
Soe en heeft daer niemant die wonden dan hy
Ghelijc die soete Gods sone

Rechte armoede is sinē scat
Die nyet en begheerde/noch niet en besat
Van gheenen aertschē dingen
Daer om is hi soe hooghe ghecroont
Aldaer die enghelen singhen

Heylighe vader/heylich patroon
Bidt uwen broeder den Gods soon
Dat hi ons wil vergheuen
Onse sōdē/die sijn menichfout
En̄ brengen ōs int eewich leuē

Heylige vad'/heylich tresoor
Die vā hauē waert alsoe bloot
Eē coorde en̄ eenē grauwē roc
Daer me waerdy d' werlt spot
O prince der Seraphinnen