Den Bybel met groter neersticheyt ghecorrigeert (Liesveltbijbel 1542)

¶ Hoe dat die Engel den duuel bindt.

Dat .xx. Capittel.

¶ Die .xx. Figuere.

[afbeelding]

1

⁺ENde ic sach eenen Enghel vanden hemel dalen, hebbende den slotel totten afgronde, ende een groot teeken in zijn hant

+ A vers 1

2

ende hi greep den draeck die oude slange, welc die Duyuel ende Sathanas is, ende bandt hem duysent iaer,

3

ende worp hem inden afgront, ende sloten toe, ende beseghelden ouer hem, op dat hi die Heydenen niet meer verleyden en soude tot dat duysent iaer voleyndt worden. Ende daer nae moet hy een weynich tijts ontbonden worden.

4

Ende ic sach stoelen, ende si saten daer op, ende haer is dat oordeel ghegeuen, ⁺ ende die sielen dye onthooft waren om die ghetuyghenisse Iesu, ende des wordts Gods wille, ende die beest noch haer beelt nyet aenghebeden en hadden, ende die haer litteekenen niet voor haer voorhoofden noch in haer handen en hadden ontfanghen, dese hebben gheleeft, ende met Christo duysent iaer gheregneert,

+ B vers 4

5

Mer die ander dooden en worden niet weder leuende tot dat duysent iaer voleynt worden, Dit is die eerste verrijsenisse,

6

Salich ende heylich is hi die een deel heeft inde eerste verrijsenisse, ouer sulcke en heeft die ander doot geen macht, mer si sullen priesters Gods ende Christi sijn, ende sullen duysent iaer met hem regneren.

7

Ende wanneer duysent iaer voleynt sijn, so sal die Sathanas los worden wt sijnder gheuanckenisse, ⁺ ende sal wtgaen,

+ C vers 7

8

om die heydenen te verleyden in die vier hoecken der aerden, den Gog ende den Magog, op dat hijse in eenen strijdt soude verghaderen, der welcker ghetal is, als dat sandt der zee,

9

Ende clommen op die breetheit der aerden ende omringden den heyrlegher der heyliger ende die beminde stadt, Ende dat vier viel van Gode wt den hemel, ende verslindese,

10

ende die Duyuel diese verleyde, wort inden vierighen poel ende swauel gheworpen, daer die beeste ende die valsche propheet was, ende sullen dach ende nacht ghequelt worden, van eewicheyt tot eewicheyt.

11

Ende ick sach eenen grooten witten stoel, ende den genen die daer op sadt, van welcx aensicht die aerde ende den hemel vluchten, ende hen en wordt gheen plaetse gheuonden,

12

Ende ick sach die dooden beyde groot ende cleyn, staende in die teghenwoordicheyt Gods, ende die boecken worden opghedaen, ende een ander boeck wort opghedaen, welc des leuens is, ende die dooden worden gheoordeelt wt tgene dat in dien boecken ghescreuen was nae haren wercken,

13

ende die zee ghaf die dooden die daer in waren,

14

Ende die doodt ende die helle gauen die dooden die daer inne waren ende si worden gheoordeelt een yegelic na sine wercken, Ende die doot ende die helle worden gheworpen inden vierigen poel. Dit is die anderde doot,

15

ende dye niet ghescreuen en is gheuonden in dat boeck des leuens, die wort gheworpen inden vierighen poel.