Den Bybel met groter neersticheyt ghecorrigeert (Liesveltbijbel 1542)

¶ Hoe die enghel Iohannes leerde vanden val van Babylonien ende van haer verdriet, ende vander verblijdinge des hemels.

Cap. xviij

¶ Die achtiende Figuere.

[afbeelding]

1

⁺ENde daer nae sach ic eenen anderen engel neder comen vanden hemel, hebbende groote macht, ende die aerde wort verlicht van zijnder claerheyt,

+ A vers 1

2

Ende riep wt macht met luyder stemmen, seggende. Die grote Babylon is gheuallen, si is gheuallen, ende is een wooninghe der duyuelen gheworden, ende een bewaringe aller onreynder gheesten, ende een bewaringhe alder onreynder ende hatelijcker vogelen,

3

want alle heydenen hebben vanden wijn der gramscappen haerden hoererije ghedroncken, Ende die Coningen der aerden hebben met haer hoererije bedreuen, ende haer cooplieden sijn rijc geworden vander cracht haerder weelden.

4

Ende ic horde een ander stemme vanden hemel, seggende. ⁺ Mijn volc gaet wt van haer, op dat ghi haerder sonden niet deelachtich en wert, ende dat ghy nyet van haren plaghen en ontfanct.

+ B vers 4

5

Want haer sonden sijn totten hemel toe ghecomen, ende die HERE heeft haerder boosheyt gedacht,

6

Betaelt haer so si v betaelt heuet, ende tweeuuldiget hair tweeuuldige na haren wercken, Ende metten kelc daer si v lieden mede inghescenct heeft, schencket haer tweeuuldich in,

7

alsoo vele als si haer heerlic heeft ghemaect, ende in weelden geweest is, also veel pijnen ende leedts schenct haer in, Wandt si seyt in haerder herten. Ick sitte een Coninginne ende en sal geen weduwe sijn, ende ick en sal geen leedt sien,

8

Daerom sullen haer plagen op eenen dach comen, die doot, weenen, ende honger, ende si sal met vier verbrant werden, want God die HERE is sterc, diese sal ordeelen.

9

Ende si sullense beweenen, ende haer ouer haer beclaghen, die coningen der aerden, die met haer gehoereert ende in lusten geleeft hebben, wanneer si den roock haers brants sien sullen, van verre staende,

10

om der vreesen wille haerder qualen seggende, ⁺ Wee wee die grote stadt Babylon, die stercke stadt, op een vre is v oordeel ghecomen,

+ D vers 10

11

Ende die cooplieden der aerden sullen weenen ende leedt dragen, want nyemant en coopt haer ware meer,

12

die ware des gouts ende siluers ende edel ghesteents, ende peerlen, ende siden, ende purpur, ende schaerlaken, ende alderhande Tynum hout, ende alderleye

[p. *]

yuoren vaten, ende alderley vaten van costelijcken houte, ende van eerne oft metalen, van ysere ende marmoere,

13

ende caneel, ende thimiaen, ende salue, ende wierooc, ende wijn, ende olye, ende bloeme van meele, ende tarwe, ende vee, ende beesten ende schapen, ende peerden, ende wagenen, ende lichamen ende sielen der menschen.

14

Ende die appelen der begerten uwer sielen sijn van v wech gegaen, ende wat vet ende sonderling was, is van v vergaen, ende ghi en sultse nv niet meer vinden,

15

Die cooplieden sulcker ware, die van dien rijc sijn gheworden, sullen verre staen om die vreesen haerder qualen wille, weenende, ende rou dragende, ende seggende.

16

Wee, wee dye groote stadt die ghecleet was met siden ende purper, ende schaerlaken, ende vergult met goude, ende met edele ghesteente ende peerlen.

17

Want sodanighe rijckheden sijn in eender vren verwoest.

18

Ende alle schipheeren, ende alle die met schepen omgaen ende sciplieden die in dye zee arbeyden stonden van verre,

19

⁺ende riepen, siende den rooc haers brants seggende. Wie is deser groter stadt gelijc, Ende si worpen stof op haer hoofden, ende riepen weenende, ende rou dragende, ende seggende.

+ D vers 19

20

Wee, wee, die grote stadt, in welcke alle, die schepen in die zee hadden, van hare ware, rijck sijn geworden, want in eender vren is si verwoest.

21

Verblijt v ouer haer ghi hemel ende ghy heylighe Apostelen ende Propheten, want God heeft v oordeel van haer gherecht, Ende een sterc Engel hief eenen grooten steen op als eenen grooten molensteen, ende werp dyen in die zee seggende. Met sodanigen storm sal dye groote stadt Babilon verworpen worden, ende si en sal nv niet meer gheuonden werden.

22

Ende die stemme der herpenspeelders ende musijcspeelders, ende pijpers, ende basuynders en sal niet meer in v gehoort worden, ende geen hantwercxman eenichs hantwercx en sal meer in v geuonden werden,

23

ende die stemme der molen en sal niet meer in v gehoort worden, ende die stemme des bruydegoms ende der bruyt en sal niet meer in v gehoort worden, want dye cooplieden waren vorsten der aerden, want alle heydenen hebben gedoolt in v toouerien,

24

Ende dat bloet der propheten ende der heylighen is in haer gheuonden gheweest ende alder gheender die opter aerden gedoot sijn.