Den Bybel met groter neersticheyt ghecorrigeert (Liesveltbijbel 1542)

Hoe dat Iohannes vanden hemel sach eenen Engel vanden hemel neder comen, die in sijn hant hadde eenen openen boeck, ende hoe die engel swoer dat na desen tijt geen tijt en was, ende hy geboot Ioannem dat hi den boeck verslinden soude

Dat .x. Cap.

¶ Die thiende Figuere.

[afbeelding]

[p. *]

1

⁺ENde ick sach eenen anderen stercken engel vanden hemel af comen, met eender wolcken gecleet, ende eenen reegenboge op zijn hooft, ende zijn aensicht gelijc die sonne, ende zijn voeten als vier pileerenen,

+ A vers 1

2

ende hi hadde in zijn hant een open boexken ende hi sette sinen rechten voet op die zee, ende den slincken op die aerde,

3

Ende hy riep met luyder stemme, gelijc als eenen leeuwe brullet. Ende doen hi gheroepen hadde, spraken die seuen donders haer stemmen,

4

ende ic woudese scrijuen, ende doen die seuen donders haer stemmen, ghesproken hadden, doen hoorde ic een stemme vanden hemel tot mi seggen? Besegelt dat dye seuen donders gesproken hebben, ⁺ ende en scrijft die selue niet.

+ B vers 4

5

Ende den enghel dien ic sach staen op die zee ende op die aerde ende hief zijn hant op ten hemel,

6

ende swoer byden leuenden van eewicheyt tot eewicheyt, die den hemel gescapen heeft, ende datter in is, ende die zee, ende so wat daer in is, datter voortaen geenen tijt meer en sal zijn,

7

Mer inden daghen der stemmen des seuenden engels als hi basuynen sal so sal die verholentheit Gods voleyndt worden, alsoo hi heeft gebootscapt, door zijn knechten die propheten.

8

Ende ic hoorde een stemme vanden hemel weder met my sprekende ende seggende? Staet ende neemt dat open boexken vander hant des engels, die op de zee ende op die aerde staet,

9

⁺ende ic ginc henen totten engel, seggende tot hem? Geuet mi dat boexken. Ende hi seyde tot mi? Nemet wech ende verslindet dat, ende het sal uwen buyc verbitteren, maer in uwen mont salt soete zijn als honich,

+ C vers 9

10

Ende ic nam dat boecxken vander hant des engels ende verslinde dat, ende het was mijnen monde als soeten honich.

11

⁺Ende doen ict gegeten hadde, wort mijnen buyck verbittert, ende hi seyde tot mi Ghi moet weder propheteren den volcken ende den heydenen, ende den tongen, ende vele Coningen.

+ D vers 11