Den Bybel met groter neersticheyt ghecorrigeert (Liesveltbijbel 1542)

Die Apostel vermaent die menschen tot duechdelijcke wercken, ende ontradet haerlieden die begheerlicheden ende alle ongheloouicheden.

Dat .ij. Capittel

1

⁺MIne kinderkens sulcx scriue ic v, ⁺ op dat ghi niet en sondicht, ende oft yemant sondicht, so hebben wi eenen voorsprake by God, Iesum Cristum, die rechtueerdich is,

+ A vers 1

+ io. xiij.g

2

ende die selue is die versoeninge voor onse sonden, niet alleen voor onse sonden, mer ooc voor die geheele werelt,

3

ende daer aen bekennen wi, dat wi hem bekent hebben, ist dat wi sijn gebot houden,

4

Wie daer seyt, ic heb hem gekent, ende en hout zijn gebot nyet, die is een logenaer, ende in dien en is geen waerheyt.

5

Mer wie sijn woort hout, in dien is voorwaer dye liefde Gods volcomen, Daer aen bekennen wi, dat wi in hem sijn,

6

Wie daer seydt dat hi in hem blijft, die sal ooc wandelen ghelijc hi ghewandelt heeft.

7

Broeders ic en scriue v geen nyeu ghebot, mer dat out gebot, dat ghi van beginsel hebt gehadt, dat oudt gebot is dat woort dat ghi gehoort hebt,

8

⁺Wederom een nieu gebot scriue ic v, dat daer warachtich is bi hem ende bi v,

+ B vers 8

9

want die duysternisse is vergaen, ende dat warachtich licht schijnt nv. * Wie daer seyt, hy is int ^a licht, ende haet sinen broeder, die is noch in duysternissen,

a Licht dat is een verlichtinghe des gheloofs, of die gaue des heylighen gheests.

10

Wie sinen broeder lief heeft, die blijft int licht, ende is geen ergernisse in hem,

11

Maer wie sinen broeder haet, die is in duysternisse, ende wandelt in duysternissen, ende en weet niet waer hi henen gaet, ende die duysternissen hebben sijn ooghen verblint.

12

Kinderkens ic scriue v, dat v die sonde vergheuen wert door sinen name.

13

Ick scriue v ghi vaders, want ghi hebt bekent dien, die van beginsel is, Ic scrijue v ghi iongelingen, want ghi hebt den bosen viant verwonnen,

14

Ic scriue v kinderen, want ghi hebt den vader bekent Ic hebbe v vaderen gescreuen, dat ghi dien bekent hebt, die van beginsel is, Ic hebbe v iongelingen gescreuen, dat ghi sterc sijt, ⁺ ende dat dat woort Gods by v blijft, ende den boosen viant verwonnen hebt.

+ C vers 14

15

Hebt niet lief die werelt, noch die dingen die in die werelt sijn, Ist dat yemant die werelt liefheeft, in dien en is niet die liefde des vaders,

16

Want al dat inder werelt is (namelic, die lust des vlees, ende lust der ooghen, ende hoochmoet der goeden) en is niet vanden vader, mer vander werelt,

17

Ende dye werelt vergaet met haer lusten, Maer wie den wille Gods doet, die blijft inder eewicheyt.

18

Kinder, het is die laetste vre, ende ghelijc ghi ghehoort hebt, dat die Antecrist coemt, ende nv sijn veel Antecristen geworden, Daer aen bekennen wi dat dye laetste vre is.

19

Si sijn van ons wtgegaen, mer si en waren van ons niet, Want waren si van ons gheweest, so waren si ooc bi ons gebleuen, Mer op dat si openbaer souden worden, dat si niet al van ons en sijn.

20

⁺Ende ghi hebt die saluinge van dien die heylich is, ende weet alle dinc,

+ D vers 20

21

Ic en heb v niet ghescreuen, als oft ghi die waerheyt niet en wist, maer ghi weetse. Ende ghi weet dat geen luegen wt der waerheit en coemt

22

Wie is een lueghenaer, anders dan die loochent dat Iesus is Cristus? Dat is die Anticristus, die den vader ende den sone loochent.

23

Wie den sone loochent, die en heuet ooc den vader niet.

24

Wat ghi nv gehoort hebt van beginsel dat bliue bi v, Ist dat bi v bliuet dat ghi van beginsel gehoort hebt, so sult ghi ooc byden sone ende byden vader blijuen,

25

Ende dat is die belofte die hi ons belooft heeft, dat eewich leuen.

26

Dit heb ic v gescreuen, van dien die v verleyden,

27

ende die ^b saluinge die ghi van hem ontfangen hebt bliue bi v, Ende en behoeft niet dat v yemant leere, mer gelijc v die saluinge alderley leert, so ist waer, ende en is geen luegen. Ende so si v geleert heeft, so blijft bi den seluen,

b Saluinge, dat is die heilighe gheests

28

Ende nv kinderkens blijft bi hem, op dat wanneer hy geopenbaert wert, dat wi een betrouwen hebben, ende niet bescaemt en werden voor hem in sijnder toecoemste.

29

Ist dat ghi weet dat hi gerechtich is, so weet ooc, dat wie recht doet die is van God gheboren.