Den Bybel met groter neersticheyt ghecorrigeert (Liesveltbijbel 1542)

Die Apostel leert ons hoe wi voorsichtich sullen sijn int quaet dat gheschien sal, inde tweede toecoemste van Christus, ende scrijft hoe die selue ghebueren sal.

Dat .iij. Capittel

1

⁺SIet alder beminste, desen tweeden brief scrijue ick v, in welcken ick verwecke ende vermane uwen reynen sin,

+ A vers 1

2

dat ghy der woorden ghedenct die voorseydt sijn vanden heyligen propheten, ende ooc aen onse ghebot, wi die sijn Apostelen des HEREN, ende des salichmakers.

3

Ende weet dat ten eersten, dat inden laetsten dagen sullen comen bespotters, ⁺ die na haer eygen begheerlicheden wandelen ende seggen,

+ i.Ti. iiij a. ij.Thi. iij.a.

4

Waer is die belofte sijnder toecoemst? Want sint dat die vaders geslapen hebben, bliuet alle dinc alst geweest is, van aen begin der creatueren,

5

⁺Mer moetwillens willen si niet weten, dat den hemel in voortijden ooc was, daer toe ooc dye aerde wt dat water, ende in dat water bestaende, door dat woort Gods,

+ B vers 5

6

nochtans te dier tijt die werelt door die diluuie verginck.

7

Den hemel dye noch is, ende die eerde sijn door sijn woort onthouden, dat si den viere behouden werden, inden dach des ordeels, ende verdoemenisse der onsaliger menschen.

8

⁺† Mer dit een, en si v niet verborgen ghi beminden, dat eenen dach is gheacht byden HERE, als duysent iaer, ende duysent iaer als eenen dach,

+ C vers 8

9

Die HERE die vertrect sijn belofte, niet als sommige die vertreckinge achten, mer hi is lancmoedich tegen v, ende en wil niet dat yemant verloren bliue, mer dat hem een yegelic tot penitencie geue.

10

Den dach des HEREN sal comen als een dief inder nacht, in welcken die hemelen vergaen sullen met grooten craken, die elementen sullen van hitten smelten, ende die aerde ende die wercken die daer inne sijn die sullen verbrant worden.

11

⁺Als dit nv al sal vergaen, hoe sult ghi dan gheschict wesen met heylige wandelingen, ende Godssaligen wesen, oft Godsdiensticheden,

+ D vers 11

12

dat ghi wachtet, ende haestet tot den dach des HEREN, in welcken die hemelen vanden vier vergaen, ende alle elementen van hitte smelten sullen,

13

Nyeuwe hemelen ende een nyeuwe aerde verwachten wi, na sijnre beloften, in welcken rechtueerdicheyt woont.

14

Daerom mijne lieue, nv ghi dan daer op wachtet, so beneerstiget v, dat ghi geuonden wert voor hem onbeulect ende onstraffelic inden vrede, *

15

ende die lancmoedicheyt ons HEREN Iesu Cristi, achtet voor v salicheyt, also ons alder beminste broeder Paulus v gescreuen heeft, na die wijsheit die hem gegeuen is,

16

also hi ooc in allen Epistelen daer af spreect, in welcken sijn sommige stucken swaer te verstaen, ⁺ welcke verwerren die ongeleerden ende lichtuerdigen, gelijc als ooc die anderen scriften tot haer eygen verdoemenisse,

+ Ro. ij.b.

17

mer ghy mijn beminde, want ghi dit te voren weet, so wacht v, dat ghi niet door dwalinghe der booser, met haer verleyt werdt, ende valt wt uwer eygen vasticheyt,

18

Maer wast inder ghenaden ende kennisse ons HEEREN ende salichmakers Iesu Christi, Den seluen si glorie, nv ende ten eewighen tijden.

AMEN.