Den Bybel met groter neersticheyt ghecorrigeert (Liesveltbijbel 1542)

¶ Die Apostel vermaent Titum dat hijse onderwijse die oude sijn, ende ionck sijn, ende dienen.

Dat .ij. Capittel

1

⁺SEgghet ghi wat der saliger leere aen gaet.

+ A vers 1

2

Den ouderen, dat si sober sijn, redelic, manierlic, sterc int ghelooue, in dye liefde, in lijdtsaemheyt.

3

Desgelijcken den ouden wijuen, dat si haer houden alst den heyligen vrouwen betaemt,

4

geen valsce beschulderssen, geen wijnsuyperssen, mer goede leererssen, den iongen vrouwen eerbaerheyt leerende, dat si haer mannen lief hebben, haer kinderen beminnen,

5

dat si sedich zijn, cuysch, haer huys bewaren, goedertieren, onderdanich haren mannen, op dat dat woort Gods niet gelastert en werde.

6

Desghelijc ooc die ionge mannen, vermaent dat si sedich willen wesen

7

In alle dingen so bewijst v seluen een exempel der goeder wercken, ⁺ ende hout inder leeringe onscadelic, ende dat woort heelsaem ende onstraffelic,

+ B vers 7

8

op dat die wederpartije haer schame, ende niet en hebben dat si quaets van ons mogen seggen.

9

Den knechten vermaent, dat si haer heren onderdanich sijn, op dat si haer in allen dingen behagelijc sijn, niet wedersprekende,

10

niet bedriegende, mer goede getrouwicheyt in allen dingen bewijsende, op dat si die leeringe Gods des salichmakers mogen verchieren in allen dingen. *

11

⁺† Want die salichmakende ghenade Gods is verschenen allen menschen,

+ C vers 11

12

ende leert ons dat wi sullen verloochenen dat ongodlic wesen, ende den wereltliken lusten mer sober rechtueerdelijc ende godsalichlic leuen in deser werelt,

13

verwachtende die salige hopinge, ende die verschijninge der heerlicheyt des groten Gods ons behouders Iesu Christi,

14

die hemseluen voor ons gegeuen heeft, op dat hi ons verlossen soude van alder onrechticheyt, ende reynigen hem also een volc tot eenen eygendom, dat neerstich waer tot goeden wercken *

15

Dit segghet ende vermaent, ende straft met alder macht. Laet v nyemant verachten.