Den Bybel met groter neersticheyt ghecorrigeert (Liesveltbijbel 1542)

Die Apostel berispt die van Thessalonica in die sonde van oncuysheyt, begheerlicheydt, traecheydt, ende onghetemperde droefheyt der dooden.

Dat .iiij. Cpaittel.

1

⁺VOortaen, lieue broeders, bidden wy v ende vermanen inden HERE Iesu, na dien ghi van ons ontfangen hebt hoe dat ghi sult wandelen, ende God behaghen, dat ghi altijt volder werdt,

+ A vers 1

2

want ghi weet wat gheboden wi v ghegeuen hebben door den HERE Iesum,

3

Want dat is den wille Gods, uwe heyliginghe, op dat ghi v onthoudt van oncuysheyt

4

dat een yegelike wete sijn vat te houden in heyliginge, ende eeren,

5

niet inder begeerte des lusts, gelijc die heydenen die van God niet en weten,

6

⁺ende dat nyemant begrijpe noch en veroordele sinen broeder in die handelinghe, want die HERE is die wraker ouer dat alle, gelijc wi v te voren geseyt ende betuycht hebben,

+ B vers 6

7

Want God en heeft ons niet geroepen tot onreynicheyt, mer totter heyliginge. *

8

Mer wie dat v nv veracht, die en veracht niet eenen mensche, mer God die sinen heyligen geest gegeuen heeft in ons.

9

† Vander broederliker liefden en was ons niet noot te scriuen, Want ghi sijt selue van God gheleert, v onder malcanderen lief te hebben,

10

Ende dat doet ghy ooc tot allen broederen, die in geheel Macedonia sijn,

11

mer wi vermanen v lieue broeders dat ghy noch volder wert, ende staet daer na dat ghi stille sijt, ende dat ghy dat uwe bescict, ⁺ ende arbeyt metten handen, gelijc wy v geboden hebben,

+ C vers 11

12

op dat ghi eerbaerliken wandelt teghen die, die daer buyten sijn, ende niets en behoeuen.

13

† Mer broeders, wi willen dat ghi weet van die daer ^a slapen, op dat ghi niet truerich en sijt, gelijc die andere die geen hopinge en hebben,

a Slapen, dats die ghestoruen sijn.

14

Want ist dat wi gheloouen dat Iesus ghestoruen is, ende verresen is, soo sal God ooc die daer ontslapen sijn door Iesum met hem leyden,

15

Want dat seggen wi als een woort des HEEREN, dat wi die daer leuen ende ouerblijuen inder toecoemst des HEREN, sullen die ghene niet voorcomen, die daer slapen,

16

Want die HERE selue sal in eenen gebieden, ⁺ ende in een stemme des archangels, ende metter basuynen Gods neder comen vanden hemel, ende die dooden in Cristo sullen opstaen ten eersten,

+ D vers 16

17

daer na wi die daer leuen, ende ouerblijuen, sullen te samen met den seluen wech getrocken werden inden wolken, den HEERE te gemoete inder locht, ende sullen also by den HERE sijn alle tijt,

18

Hierom so troost v met desen woorden onder malcanderen. ⁺ *

+ i.Corin. xv.c.