Den Bybel met groter neersticheyt ghecorrigeert (Liesveltbijbel 1542)

Die Apostel sterct der Philippensen pacientie haer lieden verweckende tot geestelijcke blijschap ende volstandicheyt der goeder wercken, ende verblijt hem in haer lieder vrijheyt achter na haer lieden groetende.

Dat .iiij. Capittel

1

⁺ALdus mijn lieue ende begheerlijcke broeder, mijn vruechde ende mijn croone, staet also inden HERe

+ A vers 1

2

Euodiam vermane ic, ende Sijntighen vermane ick, dat si eensins sijn

3

Ia ic bidde ooc v, mijn oprechte mede hulpe, neemtse tot v, die te samen met mi gekampt hebben ouer den Euangelie, met Clement ende den anderen minen behulperen, welcker namen zijn

[p. *]

inden boeck des leuens.

4

† Verblijt v inden HERE alle tijt, ende anderwerf segge ic

5

verblijt v, Laet uwe beleeftheyt oft gelijcheyt allen menscen kennelic zijn

6

Die HERE is na hier bi, Sorcht niet, mer in allen dinghen laet v bedinge int ghebet, ende smeecken, met dancsegginge kenlic werden voor God,

7

Ende die vrede Gods, welcke te bouen gaet allen sinnen, beware uwe herten ende sinnen in Christo Iesu. *

8

⁺Voort ane lieue broeders wat warachtich is, wat redelic, wat gerechtich, wat cuysch, wat lieflic, wat wel luyt, ist eenige duecht, oft eenigen lof, daer denct na,

+ B vers 8

9

welc ghi ooc geleert ende ontfangen ende gehoort ende gesien hebt aen mi, dat doet, so sal die HEERE des vreden met v sijn,

10

Mer ic ben hoochlic verblijt inden HERE, dat ghi weder eens ontfunct sijt van my te houden, ⁺ gelijc ghi te voren van mi gehouden hebt, want ghi waert verhaest,

+ C vers 10

11

Niet en segge ic dat om des gebrecs wille, Want ic heb geleert onder welcken ic ben, mi te laten genoeghen,

12

Ic can te niet sine, ende ick weet hooge te varen, Ic ben ouer al, ende in allen dingen geschict, beyde versaet sijn ende hongeren, ouervloeyen ende armoede lijden.

13

Ic vermacht al door dyen die mi machtich maect, Cristus,

14

mer ghi hebt wel gedaen, dat ghi v ooc mijnder tribulatien hebt aengenomen

15

Mer ghi van Philippen weet, dat van beghin der Euangelien, daer ic wt tooch van Macedonia geen gemeynte mi mede gedeylt en heeft, na der rekeninge die innam ende wtgaf dan ghi alleene,

16

⁺Want totten Tessalonicensen sondt ghi tot mijnder noottruften eens, ende daer na noch eens,

+ D vers 16

17

niet dat ic die gaue suecke, mer ic suecke die vrucht, dat si oueruloedich si in uwer rekeninghe.

18

Want ick heb alle dinck ende oueruloeyen, ick ben veruult, doen ick ontfinc door Epaphroditum dat van v quam, eenen rueck der soeticheyt, een offer God aengenaem, ende behaghelic,

19

Mijn God veruulle alle v nootruft, na sinen rijcdom inder claerheyt in Christo Iesu.

20

Dyen God ende onsen vader si prijs van eewicheyt tot eewicheyt Amen. Groet alle heyligen in Christo, Iesu, Het groeten v die broeders die by mi zijn,

21

Het groeten v alle heylighen, sonderlinghe die vant Keysers huyse,

22

Die genade ons HEREN Ihesu Christi si met v allen Amen.