Den Bybel met groter neersticheyt ghecorrigeert (Liesveltbijbel 1542)

Die Apostel berispt ende lastert die ghene die aenhanghende sijn valschen propheten, prijsende die ghene die in warachtighe leeringe stantuastich blijuen, settende achter na een groete

Dat .xiij. Capittel.

1

⁺ICk come nv dye derde reyse tot v.

+ A vers 1

2

In tweer oft drier mont, ⁺ sal bestaen alderley sake, Ic hebt v te voren geseyt, ende segt v noch te voren als tegenwoordich, noch eens, ende scriue nv int afwesen, den genen die te voren gesondicht hebben, ende al den anderen, wanneer ic anderweruen come, so en wil ic niet sparen,

+ De. xvij Matth. xviij.b.

3

om dat ghi suect dat eens gewaer te worden, den genen die in mi spreect, dat is Cristus, die en is onder v nyet cranc, mer hi is machtich onder v,

4

ende oft hi wel gecruyst is inder crancheit, so leeft hi nochtans inder cracht Gods, ende oft wi ooc cranck sijn in hem, soo leuen wi nochtans met hem inder cracht Goodts onder v.

5

⁺Ondersoect v seluen, oft ghi int geloue sijt, proeuet v seluen, Oft en kendy v seluen nyet, dat Iesus Cristus in v is?

+ B vers 5

6

Ten si dat ghi verworpen sijt, Maer ic hope dat ghi bekent dat wi niet verworpen en sijn,

7

Ic wensche voor God dat ghi niet quaets en doet, niet op dat wi beproeft oft volcomen schijnen, mer op dat ghi dat goet doet, ende wi als die verworpen sijn,

8

Want wi en vermogen teghen die waerheyt niet mer voor die waerheyt,

9

Mer wi verblijden ons als wi cranck sijn, ende ghi machtich sijt, ⁺ Ende dat selue wenschen wi ooc namelic uwe volcomenheit.

+ C vers 9

10

Daerom ic ooc dat scrijue, op dat ic niet, wanneer ic tegenwoordich ben, scerpheyt gebruycken moet, nae dye macht die mi die HERE gegeuen heeft tot beteringhe, ende niet tot verderuinghe.

11

⁺Ten laetsten lieue broeders verblijt v, sijt volcomen, troost v, hebt eenderley moet ende sin, sijt vreedsaem so sal God der liefden ende des vreden met v zijn.

+ D vers 11

12

Gruet v onder malcanderen met eenen heyligen cusse. Alle heiligen grueten v.

13

Die genade ons HEEREN Iesu Cristi, ende die liefde Gods, ende dye gemeynscap des heylighen gheests si met v allen Amen.

¶ Hier na volcht die anderde Epistel totten Corinthen, ghesonden van Philippen in Macedonia door Titum ende Lucam.