Den Bybel met groter neersticheyt ghecorrigeert (Liesveltbijbel 1542)

Die Apostel vermaent den Corintheren tot duechden, ende inwendige conuersatie, ende wtwendighe deuocie, ende die ongheloouighen te schouwen.

Dat .vi. Capittel.

1

⁺WI vermanen v als medehulpers, dat ghi die gracie Gods niet te vergeefs en ontfanct, Want hi spreect

+ A vers 1

2

Ic heb v inden aengenamen tijt verhoort ende inden dach der salicheyt geholpen Siet nv is ^a den aengenamen tijt, nv is den dach der salicheyt.

a den aengenamen tijt, dat is onsen tijt der cristenen van cristus verrisenisse aen ende voort

3

En laet nv nyemanden erghernisse gheuen, op dat ons ambacht niet gelachtert en worde,

4

mer latet ons aen allen dingen bewisen, als die dienaers gods

Met groter gedoochsaemheit, met tribulatien, met ancxsten,

5

met slagen, met geuanckenissen, met oprueringe, met arbeyt, met waken, met vasten,

6

met cuyscheit, ⁺ met kennissen, met lancmoedicheit, met vriendelicheyt, met den heyligen gheest, met ongheueynsder liefden,

+ B vers 6

7

metten woorde der waerheyt, metter cracht Gods, door wapen der gerechticheit, ter rechter ende ter slincker hant,

8

door prijs ende smaet, door quaet gerucht ende goet gerucht gelijc verleyers, ende nochtans warachtich,

9

als die onbekende, ende nochtans bekent, als die ghene die steruen, ende siet wi leuen, als die gecastijt zijn, ende nochtans niet gedoot,

10

als die trueren, mer altoos vrolic, als die arme, mer vele rijcmakende, als die niet en hebben, ende alle dinc besitten. *

11

O ghi van Corinthen, onsen mont heeft hem open gedaen tot v, ende ons herte heeft hem wtghebreyt.

12

⁺Om ons en dorft ghi niet benaut werden, mer wert benaut wt herteliker meyninge,

+ C vers 12

13

Ic spreke met v, als met kinderen, die ghelijcken loon met ons hebben, daerom bereyt v ook wt.

14

† En trect niet aen een vreemt iock metten ongelouigen, Want wat geniet heeft die gerechticheyt metter ongerechticheyt?

15

wat gemeynscap heuet licht metter donckerheit? oft wat gelijcheit heuet cristus met Belial? oft wat deel heeft die gelouige metten ongelouigen?

16

wat gelijckenisse heeft den tempel Gods metten afgoden? Ghi sijt den tempel vanden leuenden God, gelijc als God spreect, Ic wil in haer wonen ende in haer wandelen, ende ic wil haer God sijn, ende si sullen mijn volc zijn,

17

Daerom gaet wten middel van hen ende sceydet v af spreect de HERE, ende en ruert niet dat onreyn is, also sal ic v ontfangen,

18

ende uwe vader zijn ende ghi sult mijn sonen ende dochteren zijn, spreect die almachtige God. *