Den Bybel met groter neersticheyt ghecorrigeert (Liesveltbijbel 1542)

Die Apostel bewijst die cracht des geloofs, in die rechuerdichmakinge der geloouender menschen. Aengesien dat die doot geregneert heeft, Van Adam tot Christum toe.

Dat .v. Capittel

1

⁺DAerom rechtueerdich gemaect sijnde door dat gelooue, so hebben wi ^a vrede met God, ouermits onsen HEERE Iesum Crstum,

+ A vers 1

a Vrede met Gode hebben en is anders niet dan gerust te sijn inder conscientien met Gode dwelc alleen vinden die in hem gheloouen psal. iiij.

2

door welcken wy oock eenen toeganc hebben int geloue, tot deser gratien daer wi in staen, ende beroemen ons vander hopen der toecomender glorien die God gheuen sal.

3

Nyet dat alleen, mer ooc glorieren wi in tribulatien, wel wetende dat tribulatie voort brengt lijdtsaemheyt,

4

lijdsaemheyt, proeuinge, ende proeuinge die hope,

5

maer hope en laet ons niet beschaemt werden. Ende dat daerom, dat die liefte Gods wtgestort is in onse herten, door den heyligen gheest die ons ghegheuen is.

6

† Want Cristus doen wi noch cranck waren na der tijt is hi voor ons godlosen gestoruen.

7

Nv sterft nauwe yemant om rechts wille, voor den goeden derf misschien yemant steruen.

8

Daerom prijst Godt sijn liefde tegen ons, dat Cristus voor ons gestoruen is, doen wy noch sondaers waren.

9

Daerom so sullen wy nv veel meer door hem behouden werden, voor die gramscap na dien dat wi door sijn bloet gerechtueerdicht sijn.

10

Want ist dat wi Gode versoent sijn, door den doot sijns soons, doen wi noch vyanden waren, veel meer sullen wi salich werden, door sijn leuen, als wi nv versoent sijn,

11

ende niet alleen dat, ⁺ mer wi beroemen ons ooc Gods door onsen HERE Iesum Cristum, ⁺ door welcken wi nv die versoeninge ontfangen hebben. *

+ B vers 11

+ heb. ix.a

12

† Daerom gelijckerwijs dat door eenen mensce die sonde is gecomen in die werelt, ende door die sonde die doot, ende also is ouer alle menschen dye doot door gegaen, aengesien dat si alle gesondicht hadden,

13

want die sonde was inder werelt totter wet toe, mer waer geen wet en is, daer en achtmen die sonde niet.

14

Mer die doot hadde heerscappie van Adam tot Mosen toe Ooc in die gene die niet ghesondicht en hadden, met gelijcke ouertredinge gelijc Adam, die welcke een figuere is vanden toecomenden Adam.

15

⁺Ten is nochtans metter gauen niet, alst metter sonde is, want ist dat sake dat door die sonde van eenen, veel gestoruen sijn, so is veel meer die gracie Gods, ende die gifte veel menschen rijckelicker toegecomen, door die gratie, welcke toebehoorde eenen mensche Iesu Cristo.

+ C vers 15

16

Ende niet en is die gaue alleen ouer een sonde, gelijc dat door eens sondaers eenige sonde al bederf, want dat oordeel is gecomen wt eender sonde tot verdoemenisse, mer die gaue dye is wt veel sonden tot rechtuerdicheyt.

17

Want ist dat om eens menscen sonde wille die doot gedomineert heeft, veel meer sullen die gene, die ontfangen hebben die volheit der gratien, ende der gauen totter gherechticheyt, domineren int leuen door eenen Iesum Cristum. *

18

⁺† Gelijc nv door eens menschen sonde gecomen is verdoemenisse ouer alle menscen, also is ooc door eens menscen rechtuerdicheyt, die rechtuerdichmakinge des leuens gecomen ouer alle menschen,

+ D vers 18

19

Want gelijc door eens menschen ongehoorsaemheit veel sondaren geworden sijn, also werden ooc door eens menschen gehoorsaemheyt veel gherechtighe.

20

Mer die wet is neffens ingecomen, op dat die sonde die ouerhant nemen soude, Mer so waer de sonde douerhant genomen heeft, daer heeft ooc de genade noch meer ouerhant genomen,

21

op dat, gelijc als dye sonde geregneert heeft totter doot, also moet oock die genade regneren door die gerechticheyt totten eewigen leuen door Iesum Christum. *