Den Bybel met groter neersticheyt ghecorrigeert (Liesveltbijbel 1542)

Hoe dat Paulus dat Iootsche volck toesprac, ende van sijnder bekeeringe in Christo, ende van sinen visioene in Iherusalem, Ende hoe dat hem die Ioden gheesselen wouden ende hoe hi hem excuseerde dat hi een Romeyn was.

Dat .xxij. Capittel.

1

⁺† GHi mannen, lieue broeders ende vaders hoort mijn verantwoorden tot v

+ A vers 1

2

Doen si hoorden dat hi in Hebreeusch tot haer sprac, worden si noch stilder, ende hi seide

3

Ic ben een Iootschman, geboren tot Tarsen in Cilicia, ende in deser stadt opgeuoet biden voeten Gamalielis, geleert met alder neersticheyt in die vaderlike wet, ende was een vierich beminder of nauol-gher Gods, ende ghelijc als ghi alle hedensdaechs sijt

4

ende hebbe desen wech veruolcht totter doot toe, bindende ende leuerende inden kercker, beyde mannen ende vrouwen,

5

also mi die hoochste Priester, ende den geheelen hoope der ouders, ooc getugenisse geeft, van welcken ic brieuen nam aen die broeders, ende reysde tot Damascum op dat ic al die daer waren, gebonden soude brengen tot Hierusalem, op dat si gepinicht soude worden.

6

⁺Mer het geschiede, doen ic wech reysde, ende na bi Damascum quam, dat mi omtrent den middach een groot licht vanden hemel haestelic omscheen,

+ B vers 6

7

ende nederuallende ter aerden, hoorde ic een stemme seggende tot mi, Saul, Saul, wat veruolcht ghi mi?

8

Ic antwoorde, HERE wie sidi? Ende hi seide tot mi, Ic ben Ihesus van Nazareth dyen ghi veruolcht,

9

Mer die met mi waren, sagen dat licht, ende waren veruaert, maer si en hoorden niet de stemme des geens die met mi sprac

10

⁺Ic seyde weder, HERE, wat sal ic doen? Dye HERE seyde tot mi, ⁺ Staet op ende gaet in Damascum, daer salmen v seggen van allen dat v te doen geordineert is,

+ C vers 10

+ gala. v d

11

Mer als ic van claerheyt des lichts niet en sach wert ic metter hant geleyt, van dyen die met mi waren ende quam tot Damascum

12

Mer daer was een aendachtich man Ananias, na der wet, die een goet gherucht hadde bi allen den Ioden die daer woonden,

13

die quam tot mi, ende bi my staende, seyde hi tot mi, Saul lieue broeder, siet op,

14

ende ic sach hem aen ter seluer vren, Hi seyde tot mi, ⁺ God onse vader heeft v te voren gheordineert, dat ghi sinen wille bekennen sout ende sien dat recht is, ende hooren die stemme wt sinen monde,

+ D vers 14

15

want ghi sult sine getuyge tot alle menscen sijn, van die dinghen die ghi ghesien ende ghehoort hebt,

16

ende wat vertoefdi nv noch, staet op ende latet v doopen, ende afwast v sonden, ende aenroept den naem dijns HEREN

17

Mer het gesciede, dat ic weder tot Ierusalem quam ende badt inden tempel, dat ic op ghetrocken wert,

18

ende sach hem seggende tot mi Haest v, ende maect v snellic wt Hierusalem, want si en sullen v getuygenisse van mi niet onfangen,

19

⁺Ende ic seyde, HERE, si wetent selue dat icse geuangen hielt, ende dat icse sloech die in v geloofden in elcken scolen,

+ E vers 19

20

ende doen dat bloet Stephani ws getuygen gestort wert, stont icker oock bi ende hadde welbehagen in sijn doot, ende bewaerde die cleeder, der gheenre die hem dooden,

21

Ende hi seyde tot mi, Gaet henen, want ic wil v verre onder die Heydenen seynden

22

Si hoorden hem tot desen woorde toe, ende hieuen haer stemme op, ende seyden

23

Doet sulcken mensce wech vander aerden, want ten is niet behoorlic dat hi leuen soude.

24

⁺Doen si riepen ende haer cleeder wech worpen, ende dat sant in die locht worpen, hiet hem die hooftman in den leger leyden, ende seyde datmen hem met roeden slaen ende ondersoecken soude, op dat hi bekennen soude, om welcker saken wille si also ouer hem riepen

+ F vers 24

25

Als hi hem met riemen aenbont, seyde Paulus totten onderhooftman die daer bi stont,

26

ist ooc recht, eenen Roomscen mensche, ende onuerdoemden te geesselen, Doen die onderhooftman dat hoorde, ginc hi totten ouerhooftman, ende vercondichdet hem, seggende.

27

Wat wildi maken? dese mensche is een Romeyn.

⁺ Doen quam die ouerhooftman tot hem ende seyde tot hem, Segt mi, sidi een Romeyn. Hi seyde Ia,

+ G vers 27

28

ende die ouerhooftman antwoorde, Ic hebbe dit borgher recht met groter sommen gecocht, Paulus seyde weder Ic ben ooc een Romeyn geboren,

29

Terstont gingen si van hem die hem ondersoecken souden. Ende dye

[p. *]

ouerste hooftman vreesde, doen hi vernam dat hi een Romeyn was, ende dat hi hem gebonden hadde.

30

Dea anderen daechs willende sekerlic weten, waerom hi besculdicht wert vanden Ioden, ontloste hy hem vanden banden, ende liet die hooge Priesters, ende haren geheelen raet comen, ende Paulum voortbrengende, sette hi hem onder haer.