Den Bybel met groter neersticheyt ghecorrigeert (Liesveltbijbel 1542)

Hoe Paulus in Corinthien predicte, ende vander beroerten, ende van die toecoemst in Ephesien, ende van Apollo.

Dat .xviij. Capittel.

1

⁺DAer na ghinc Paulus van Athenen ende quam tot Corinthen,

+ A vers 1

2

ende vant eenen Iode gheheeten Aquila, gheboren wt Ponto, die welcke onlancx wt Italien gecomen was, ende sijn huysurouwe Priscilla, om dat die Keyser Claudius beuolen had, dat alle Ioden wech van Romen souden gaen, tot den seluen ginc hi,

3

Ende want si gelijcx hantwercx waren, bleef hy bi hem, ende wrochten, si waren van tentmakers handtwerc, ende hi preecte alle Sabbath in dese scole,

4

ende hi gaf raet Ioden ende Griecken

5

Doen Silas ende Timotheus van Macedonia quamen, so wert Paulus vanden geest gedrongen den Ioden Iesum te betuygene, dat hi Cristus was.

6

⁺Maer doen si daer tegen seyden ende lasterden, schudde hi sijn cleederen wt, ende seide tot haer lieden, v bloet si op v hooft Ic gae na desen tijt reyn totten heidenen

+ B vers 6

7

Ende maecte hem van daer, ende quam in een huys, ghenaemt Iusti die aendachtich was, ende des seluen huys was naest der scholen

8

Chrispus, die ouerste der scholen geloofde in-den HERE met sinen geheelen huyse, ende veel Corinthen hoorende, ⁺ gheloofden, ende lieten haer doopen.

+ C vers 8

9

Die HERE seyde tsnachts door een gesichte tot Paulum. En vreest niet, mer spreect, ende en swijcht niet

10

want ic ben met v, ende nyemant en sal hem onderwinden v te letten, want ic heb een groot volc in deser stadt.

11

Hy sadt daer een iaer ende ses maenden, ende leerde haer dat woort Gods.

12

⁺Doen Gallio lantuoecht in Achaien was, stonden die Ioden eendrachtelic tegen Paulum op, ende leyden hem voor den rechterstoel, seggende.

+ D vers 12

13

Dese mensce maect den lieden wijs, God te dienen tegen die wet.

14

Doen Paulus den mont op woude doen, seyde Gallio totten Ioden Waert dattet bedroch oft schalcheit ware, lieue Ioden, so soude ic v billicx hooren,

15

mer ist een vrage van woorden, ende vanden namen, ende vander wedt onder v so siet ghi selue toe, ic en dencker gheen rechter ouer te sijn,

16

ende dreefse vanden rechterstoel.

17

Doen grepen alle die Griecken Sosthenen, den ouersten der scholen ende sloeghen hem voor den rechterstoel, ⁺ ende Gallio en tracx hem niet aen.

+ E vers 17

18

Paulus daer noch lange gebleuen sijnde, maecte sijn afscheyden metten broeders, ende sceepte in Syrien ende met hem Priscilla ende Aquila, ende hi bescoer zijn hoot tot Cenchreen, want hi hadde een belofte,

19

ende quam af tot Ephesum, ende hieltse daer. Ende hi ingegaen sijnde in die scole, disputeerde hi metten Ioden,

20

Ende si baden hem dat hi langeren tijt bi hen woude bliuen, mer hi en consenteerdes niet,

21

mer hi maecte sijn afsceyden, seggende. Ic moet bouen alle dinc dat toecomende feeste te Ierusalem houden, wilt God, dan wil ic weder tot v keeren.

22

⁺Ende hi reysde van Ephesien, ende quam tot Cesarien, ende ginc op, ende groete die vergaderinghe, ende reysde af tot Antiochien.

+ F vers 22

23

Ende daer wat tijts vertoeft hebbende, reysde hi wt, ende doorwandelde deen na dander dat Galaetsch lant, ende Phrigiam, ende stercte alle die discipulen.

24

⁺Tot Ephesum quam een man genaemt Apollo, geboren van Alexandrien, een welsprekende man, ende machtich inder scrift.

+ G vers 24

25

Dese was onderwesen inden wech des HEREN, ende sprac vierichlic inden geest, ende leerde neerstelic vanden HERE, ende wiste alleen van Ioannes doopsel.

26

Dese begonst vrylic te spreken inder scolen. Doen hem Priscilla ende Aquila hoorden namen si hem tot henwaerts, ende leyden hem den wech Gods noch neersteliker wt.

27

Mer doen hi in Achaien woude reysen, ghauen hem die broeders bescheet, ende screuen den discipulen dat si hem souden ontfangen.

28

Ende als hi daer gecomen was, halp hi der genen vele die geloouich waren geworden. Want hi verwan dye Ioden stantachtelic, bewisende openlic door de scrift, dat Iesus die Cristus is.