Den Bybel met groter neersticheyt ghecorrigeert (Liesveltbijbel 1542)

¶ Hoe Paulus met Thimotheo predicte in Macedonia inder stadt Philippi, Hoe Phitonissa van hem verlost wert vanden duyuel, hoe hi daerom ghegheesselt wert, ende inden kercker gheworpen, ende weder verlost wert.

Dat .xvi. Capittel.

1

⁺HI quam tot Derben ende Lysteren, ende siet, daer was een Discipel met name Thimotheus, eender Iootscher vrouwen sone, dye gheloouich was, maer eens Griecken vaders.

+ A vers 1

2

Dese hadde goede fame byden broeders onder den Lystranen ende te Iconien,

3

dese woude Paulus met hem laten reysen, ende hem tot hem nemende, besneet hi hem, om der Ioden wille, die in dien seluen plaetsen waren,

4

want si wisten alle dat sijn vader een Griecke was geweest. Mer als si door die steden ghinghen, so gauen si haer lieden die insettinghe te houden, dye vanden Apostelen ende ouders te Hierusalem besloten waren.

5

Doen worden dye ghemeynten int ghelooue gheuesticht, ende namen daghelicx toe aent ghetal.

6

Mer doen si door Phrigiam ende dat lant Galatie reysden, wert haer lieden vanden heyligen gheest beledt dat woort in Asia te spreken.

7

⁺Mer doe si tot Misiam quamen, leyden si toe na Bithiniam te reysen, ende den gheest en liets haer lieden niet doen. Doen si voorby Misiam reysden, quamen si af tot Troade,

+ B vers 7

8

ende Paulus openbaerde een gesicht byder nacht, dat daer een man van Macedonia was, die stont, ende badt hem segghende. Comt neder tot Macedonien, ende helpt ons

10

Mer doen hi dat gesicht gesien hadde, terstont deden wi neersticheyt tot Macedoniam te reysene, seker sijnde, dat ons die HEERE derwaerts gheroepen had-

[p. *]

de hen lieden dat Euangelium te prediken.

11

Doen braken wi op van Troada, ende rechts oft stracx loops quamen wi tot Samothraciam, des anderen daechs tot Neapolim,

12

ende van daer tot Philippis, welc die hootstat des lants van Macedonien is, ende een vrye stadt

Wi vertoefden somige dagen in dese stadt,

13

Op den sabbaths dach gingen wy wt buyten der stadt aen dat water daermen plach te bidden, ende sittende spraken wy totten vrouwen die daer tsamen quamen.

14

⁺Ende een aendachtige vrouwe, met name Lydia, een purpur vercoopster wt der stat der Thiaterers hoorde toe, der welcker die HERE dat hert op dede, also dat si des aenmercte dat van Paulo ghesproken wert.

+ C vers 14

15

Als si ende haer huys gedoopt was, vermaende si segghende, Ist dat ghi mi gheloouich acht inden HEERE, soo coemt in mijn huys, ende blijft daer, ende si dwanck ons

16

Mer het gheschiede doen wy totten ghebet gingen, ⁺ dat ons een meysken ontmoete hebbende eenen waersegghenden gheest, ende droech veel profijts tot haren heeren met waerseggen.

+ D vers 16

17

Die selue volchde Paulum ende ons ouer al na, ende riep seggende. Dese menschen sijn knechten des alder hoochsten Gods, die v den wech der salicheyt vercondigen.

18

Dat dede si menigen dach, Mer dat dede Paulo wee ende keerde hem om ende seyde tot den geest. Ic gebiede v inden naem Iesu Cristi, dat ghi van haer wt gaet, ende hi voer ter seluer vren wt.

19

Mer doen haer heren dat sagen, dat de hope haers profijts was wtgeuaren, ⁺ namen si Paulum ende Sylam ende trockense op die merct voor die ouersten, ende leidense voor die wet, ende seyden.

+ E vers 19

20

Dese menscen verstooren onse stadt, ende sijn Ioden

21

ende vercondighen een wijse, die welcke ons niet en betaemt aen te nemen, noch te doen om dat wi Romeynen sijn,

22

ende dat volc liep tegen hen, ende die wethouders scoerden haer cleederen, ende hietense met roeden slaen.

23

Ende doen sise wel geslagen hadden, worpen sise inden kercker, ende gheboden den kerckermeester, dat hise neerstelic bewaren soude,

24

die nam sulc gebot aen, ende worpse inden binnensten kercker, ende sloot haer voeten inden stock.

25

⁺Maer te middernacht Paulus ende Silas biddende loofden God, ende die geuangen hoordense.

+ F vers 25

26

Snellic wert een groote aertbeuinge, also dat die fundamenten des kerckers beweecht worden, ende terstont worden alle doren op gedaen, ende al haer banden ontbonden

27

Als die kercmeester wt den slaep ontspranck, ende sach die dueren des kerckers opgedaen, track hi een sweert wt, ende woude hem seluen dooden, want hi meynde dat die gheuanghen ontloopen hadden gheweest.

28

Maer Paulus riep luyde seggende, En misdoet v seluen niet, want wi sijn alle hier.

29

Hi eyschte licht, ende spranc daer in, ende beuende viel hi Paulo ende Sila te voeten,

30

⁺ende hi leydese daer wt, ende seyde, Lieue heeren, wat sal ic doen dat ic salich werde

+ G vers 30

31

Si seyden, Gelooft inden HERE Iesum, so sult ghi ende v huys salich sijn,

32

ende seyden hem dat woordt des HEREN, ende alle die in sinen huyse waren,

33

ende inder seluer vren der nacht nam hijse tot hem, ende wiesscen die stramen af, Ende hi liet hem, ende alle die sine terstont doopen,

34

ende hi leydese in sijn huys, ende settese aen die tafel ende hi verblijde hem met alle sinen huyse, dat hi in God geloouich geworden was.

35

Ende doent dach wert, seynden dye wethouders der stadt dienaers, seggende, Laet dese menschen gaen,

36

ende die kerckermeester vercondichde Paulo dese redene. Die borgemeesters hebben hier geseynt datmen v los soude laten gaen, daerom gaet henen in vrede.

37

Paulus seyde tot hen. Si hebben ons verdoemt ende openbaerlic geslagen, Wi die nochtans Romeynen sijn, ende inden kercker geworpen, ende souden ons nv heymelick wt stooten? Also niet, mer laetse selue comen ende ons hier wt leyden.

38

Der stat dienaers vercondichden dese woorden den borgemeesteren, ende si vreesden, gehoort hebbende dat si Romeynen waren,

39

ende quamen, ende vermaendense, ende leydense daer wt, ende baden haer dat si wt der stadt wouden gaen. Doen gingen si wten kercker, ende ghinghen tot Lidiam,

40

ende die broeders gesien hebbende, hebben sise getroost, ende reysden wech.