Den Bybel met groter neersticheyt ghecorrigeert (Liesveltbijbel 1542)

¶ Hoe dat die Ioden keuen teghen Petrum, om dat hi hem keerde tot die onbesneden, ende hoe die discipulen verspreyt worden om te preken den Heydenen, ende hoe van Agabus vercondicht wert den dieren tijt.

Dat .xi. Capittel

1

⁺HEt quam voor die Apostelen ende broeders, die inden Iootschen lande waren, Dat die Heydenen Gods woort hadden ontfanghen.

+ A vers 1

2

Ende doen Petrus opghinc te Hierusalem, so keuense teghen hem die wt der besnijdinge waren, ende seyden,

3

ghi sijt ingegaen totten mannen die onbesneden sijn, ende hebt met haer lieden ghegheten,

4

Mer Petrus beghinnende leyde hen lieden dat een na dander wt seggende.

5

Ic was in dye stadt Ioppen, biddende, ende sach in een opghetrockenheit, een gesicht een vat neder dalende als eenen groten lijnen doeck met vier hoecken, neder ghelaten vanden hemel, ende quam tot mi toe,

6

Daer sach ic inne ende wert gewaer, ende sach vieruoetighe dieren der aerden, ende wilde dieren ende ghewormte oft cruypende dieren, ende vogelen des hemels,

7

Ic hoorde ooc een stemme seggende tot mi. Peeter staet op, slaet doot ende eet,

8

Mer ic seyde, HERE, gheensins, want daer en is noyt gemeyn noch onreyn in mijnen mont gegaen.

9

Mer dye stemme antwoorde mi ten anderen mael vanden hemel, dat God ghereynicht heeft, dat en suldi niet onreyn heeten,

10

Dat gheschiede driemael, ende het wordt weder al inden hemel ghetrocken.

11

⁺Ende siet, van stonden aen, stonden drye mannen inden huyse daer ic in was, van Cesarien tot mi ghesonden.

+ B vers 11

12

Die geest seyde tot mi, dat ic met hen soude gaen nyet twijfelende, Mer dese ses broeders quamen met mi, ende wi ghinghen in dat huys des mans,

13

ende hi vertelde ons hoe hi eenen Engel in sinen huyse hadde ghesien, staende ende seggende tot hem, Seyndt mannen tot Ioppen, ende laet Simon met den toename Petrum roepen,

14

die sal v woorden seggen, waer inne ghi salich sult worden, ende v geheel huys.

15

Mer doen ic begonst te spreken, so viel die heylige gheest op haer lieden, gelijc als hy int eerste op ons viel.

16

Doen dacht ic op dat woort des HEREN, als hi seide. Tis waer, Ioannes heeft met water ghedoopt, mer ghi lieden sult metten heyligen gheest ghedoopt worden.

17

Heeft God dan een gelijcke gaue gegeuen gelijc ooc ons, die daer geloouen inden HERE Iesum Christum. Wie was ick dat ick Gode soude connen beletten?

18

Dit ghehoort hebbende, sweghen si stille ende presen God segghende, So heeft God dan ooc den Heydenen boete ghegheuen totten leuene.

19

⁺Ende die ghene die verstroyt waren midts der tribulatien die ouer Stephanum ghesciede, wandelden alomme tot Phenicen ende Cypren, ende Antiochien toe, ende en spraken dat woort tot nyemanden dan alleen totten Ioden.

+ C vers 19

20

Maer daer warender sommighe onder haer, Cypressche ende Cyreensche mannen, die qua-men tot Anthiochien ende spraken oock totten Griecken, ende predicten dat Euangelium van Iesu Cristo,

21

ende die hant Gods was met haer lieden, ende een groot ghetal wordt gheloouich, ende bekeerde haer totten HERE.

22

Dese redene van hem quam voor die ooren der ghemeynten tot Hierusalem, ende si seynden Barnabam dat hi tot Antiochien soude gaen.

23

Ende doen hy daer ghecomen was, ende sach die ghenade Gods, so wort hi vrolick, ende vermaendese alle dat si wt opsette des herten inden HERE souden blijuen,

24

want het was een goet man, vol vanden heylighen gheest ende gheloofs, ende den HERE wort een groot volc toeghedaen.

25

Mer Barnabas ghinc wt tot Tharsen, om Saulum weder te soecken,

26

ende doen hi hem gheuonden hadde, so leyde hi hem tot Anthiochien, ⁺ Mer het geuiel dat si een heel iaer in dier ghemeynten conuerseerden ende leerden groot volc, ende dat die discipulen tot Antiochien eerst Christen worden ghenaemt.

+ D vers 26

27

In desen seluen dagen quamen Propheten van Hierusalem tot Antiochien,

28

ende een onder hen gheheeten Agabus stont op ende vercondichde door den gheest datter eenen grooten dieren tijt ouer alle aertrijcke comen soude, Het welcke onder den Keyser Claudio gheschiede.

29

Maer die discipulen besloten (na dat yeghelijc vermocht) een hantreyckinghe te seynden den broeders woonende in Iudea,

30

so si ooc deden, bescickende dat totten Ouders door den handen Barnabe ende Sauli.