Den Bybel met groter neersticheyt ghecorrigeert (Liesveltbijbel 1542)

¶ Van die miraculose bekeeringe Pauli, sijnder regeneracie des doopsels, welck Christum preecte ende persecutien daerom leedt, ende van twee miraculen Petri.

Dat .ix. Capittel.

1

⁺PAulus veruolchde noch met dreyghen ende woorden teghen dye discipulen des HEEREN, ende ghinc totten ouersten priester ende badt hem om brieuen, tot Damascum totten scholen,

+ A vers 1

2

op dat, waert dat hy eenige van dyen wege vonde, mannen ende vrouwen, dat hijse gebonden tot Hierusalem leyden soude,

3

Ende reysende, geschiedet, Dat hy Damasco ghenaeckte, ende onuerhuets omscheen hem een licht vanden hemel,

4

ende viel op dye aerde, ende hoorde een stemme seggende tot hem, Saul, Saul, wat veruolchdi my?

5

Hi seyde, HERE wye zijt ghy? Die HERE seyde, Ic ben Iesus dyen ghy veruolcht, het sal v hert vallen tegen den prickel te steken.

6

Beuende ende hem versaghende seyde hi. HERE wat wildi dat ic doen sal? Dye HERE seyde tot hem, Staet op ende ghaet in dye stadt, daer salmen v seggen wat ghi doen sult.

7

Mer die mannen dye met hem reysden, stonden ende waren verbaest, ⁺ wandt si hoorden een stemme ende en sagen nyemanden,

+ B vers 7

8

Paulus rechte hem op vander aerden, ende sijn ooghen opghedaen hebbende, en sach hy nyemande, Mer si namen hem byder handt ende leyden hem tot Damascum,

9

ende hy en sach in drie daghen nyedt, ende hy en adt noch en dranc nyet.

10

Te Damasco was een discipule genaemt, Ananias, ende dye HERE seyde tot hem inden gesichte, Anania. Ende seyde, HERE ic ben hier,

11

Dye HERE seyde tot hem. Staet op ende gaet henen in die strate dye daer heet die rechte, ende vraecht inden huyse Iuda na Saulum geheeten van Tharsen, want siet hy bidt,

12

ende heeft inden gesichte gesien eenen man gheheeten Ananias, tot hem ingaende, ende die hant op hem leggende, op dat hi weder siende soude werden.

13

⁺Ananias antwoorde, HERE Ick heb van velen gehoort van desen man, hoe veel quaets hi uwen heylighen gedaen heeft te Hierusalem,

+ C vers 13

14

ende hi heeft hier machte vanden hoochsten Priester te vanghen al dye uwen name aenroepen.

15

Die HERE seyde tot hem, ghaet henen, want dese is my een wtuercoren instrument, op dat hy mijnen name draghe voor dye heydenen, ende voor dye coninghen ende voor dye kinderen van Israel.

16

Ic wil hem toonen, hoe veel dat hy lijden moet, om mijns naems wille.

17

Ende Ananias ghinc henen, ende quam in dat huys, ende leyde die handen op hem, ende seyde, lieue broeder Saul, dye HERE heeft my ghesonden, dye v openbaerde inden wech, daer ghi door quaemt, dat ghy weder siende sout worden, ende metten heylighen geest veruult,

18

ende terstont vielt van sinen oogen als visch scellen, ende wert weder siende, ende stont op, ende liedt hem doopen, ende nam spijse ende stercte hem.

19

⁺Mer Saulus was sommige dagen by die discipulen te Damasco,

+ D vers 19

20

⁺ende terstont preecte hy Christum inden scholen, dat dye selue Gods sone was.

+ D vers 20

21

Si ontsetten hem alle dye dat hoorden, ende seyden. En is dit dye gene nyet dye tot Hierusalem verstoorde alle dye gene dye desen name aenroepen? ende daer toe is hy hier ghecomen dat hijse gebonden totten hoochsten priester soude leyden,

22

Mer Paulus wert meer crachtiger, ende beschaemde dye Ioden, dye tot Damasco woonden, ende hy bewees dat dese is Christus. *

23

Ende na veel dagen hielden dye Ioden eenen raedt te samen dat si hem dooden souden,

24

Mer het wert Paulo te kennen gegheuen dat si hem wachten, Sy bewaerden dye poorten dach ende nacht, op dat si hem souden dooden.

25

⁺Doen namen hem dye discipulen snachts, ende lieten hem ouer die mueren, ende lieten hem af in een mande.

+ E vers 25

26

Mer doen Paulus tot Hierusalem quam, leyde hi toe om hem by dye discipulen te maken, ende si vreesden hem alle, niet geloouende dat hy een discipel ware, ⁺

+ ij co. xi g

27

Barnabas nam hem tot hem, ende leyde hem totten Apostelen, ende vertelde hen, hoe hy den HERE op dye strate gesien hadde, ende dat hy met hem gesproken hadde, ende hoe hy tot Damascum vrylijc ghedaen hadde inden name Iesu,

28

ende hy was by haer lieden, ende ghinck te Hierusalem wt ende in, ende dede stoutelijcken inden name des HEEREN Ihesu,

29

Hy sprack oock ende disputeerde metten Griecken, mer si leyden toe om hem te dooden.

30

Doen die broeders dat gewaer werden, so geleyden si hem tot Cesarien ende lieten hem te Tarsen ghaen,

31

⁺Dus hadde dye vergaderinghe vrede, door gheheel Iudeen ende Galileen, ende Samaria, ende wert ghesticht ende wandelde inder vreesen des HEEREN, ende wert veruult met troost des heyligen geests.

+ F vers 31

32

Mer het gheschiede, doen Petrus ouer al door reysde, ende quam ooc totten heylighen die tot Lidda woonden,

33

daer vant hi eenen man genaemt Eneas, acht iaer lanc opt bedde gheleghen hebbende, die ghichtich was,

34

ende Petrus seyde tot hem, Enea, Iesus Christus make v ghesont, staet op ende verbeddet v seluen, ende terstont, stont hy op, ende si saghent alle,

35

ende die tot Lidda ende Sarona woonden, die bekeerden haer totten HERE.

36

Mer tot Ioppe was een discipulersse geheeten Tabita, welck is geinterpreteert Dorchas. Dese was

[p. *]

vol ^a goeder wercken ende aelmoessen die si dede,

a goede wercken dat sijn diensten der liefden gedaen aen sinen naesten. mat. v.d Ti. v.d.

37

Maer het gesciede op dye selue tijt dat si sieck wert ende sterf. Doen wiesscen si die selfde, ende leydense op den solder.

38

Mer want Lidda na bi Ioppe is, die discipulen hoorende dat Petrus daer self was, seynden si twee mannen tot hem ende vermaenden hem dat hijs hem nyet en liet verdrieten tot hen te comen.

39

Petrus stont op ende quam met haer lieden, ende als si daer gecomen waren, ⁺ leyden si hem op den solder, ende alle dye weduwen stonden om hem weenende, ende toonden hem die rocken ende cleederen dye welcke Dorchas maecte doen si bi hem was.

+ G vers 39

40

Ende doense Petrus al wtgedreuen hadde, knielde hi neder ende badt, ende keerde hem totten lichaem seggende, Thabita staet op. Ende si dede haer ooghen op. Ende doen si Petrum sach, rees si op,

41

ende hi gaf haer die handt ende rechtese op, ende riep die heylighen ende weduwen, ende steldese daer leuendich,

42

ende het wert openbaer door gheheel Ioppen, ende daer wertter vele inden HERE geloouende.

43

Ende het gesciede, dat hi langen tijt tot Ioppen bleef, bi eenen geheeten Symon, die een huydde vetter was.