Den Bybel met groter neersticheyt ghecorrigeert (Liesveltbijbel 1542)

¶ Hoe Iesus sijn oogen inden hemel sloech, ende sinen hemelschen vader om sijn verclaringhe, ende voor sijn discipulen ende ghelooue badt.

Dat .xvij. Capittel.

[afbeelding]

1

⁺† DEse dingen sprac Iesus, ende hief zijn ooghen op ten hemel, ende seyde, Vader die vre is hier, dat ghi uwen sone verclaert, op dat hi v ooc verclare,

+ A vers 1

2

Gelijc als ghi hem macht hebt gegeuen ouer alle ^a vleesch, op dat hi dat eewige leuen soude geuen alle den genen die ghi hem gegeuen hebt,

a Alle vleesch, dats alle menscen Matth xiiij.d Esaie xlix.g

3

Mer dat ist eewighe leuen, dat si v, die alleen warachtich God sijt, ende den genen dien ghi gheseynt hebt Iesum Christum bekennen,

4

Ic heb v verclaert opter aerden, ende dat werc volbracht dat ghi mi gegeuen hadt dat ic doen soude,

5

Ende nv verclaert ghi mi vader bi v seluen metter claerheit die ic voor v hadde, eer die werelt was,

6

ic heb uwen naem den menschen gheopenbaert, die ghi mi vander werelt gegeuen hebt, ⁺ Si waren v, ende ghi hebtse mi ghegeuen, ende si hebben v woort ghehouden,

+ B vers 6

7

Nv weten si dat alle dat ghi mi ghegeuen hebt, dat van v is,

8

Want die woorden die ghi mi ghegheuen hebt, heb ic haer gegeuen, ende si hebbense ontfangen, ende bekent warachtelijc dat ic van v wtghegaen ben, ende hebben ghelooft dat ghi mi ghesonden hebt.

9

Ick bid voor haer, ende niet voor die werelt, maer voor die ghene die ghi mi gegeuen hebt, want si sijn v,

10

Ende al wat mijn is dat is v, ende al wat v is, dat is mijn, ende ic ben in haer verclaert,

11

ende ick en ben niet meer in die werelt, ende si sijn in die werelt, ende ic come tot v. *

† Heylighe vader, bewaertse in uwen name die ghi mi gegeuen hebt, dat si eens sijn gelijc als wi.

12

Die wijle ick bi haer was in die werelt, so bewaerde ickse in uwen naem, Die ghi mi ghegheuen hebt, die heb ic bewaert, ende daer en isser geen van hen verloren dan alleen dat verloren kint, op dat dye scriftuere veruult soude worden.

13

⁺Ende nv come ic tot v, ende spreke dit in die werelt, op dat si mijn blijscap in haer volcomen souden hebben.

+ C vers 13

14

Ic heb haer v woort gegeuen, ende die werelt haetse, want si en zijn niet vander werelt,

15

Ic en bidde niet dat ghijse vander werelt neemt, mer dat ghijse bewaert vanden quade,

16

Si en zijn niet vander werelt, gelijc als ic ooc vander werelt niet en ben,

17

^a Heilichtse in uwer waerheit, V woort is die waerheyt.

a Dese sijn gheheylicht vanden vader, die met oprechter herten in Christo geloouen i.co. a et vi.c

18

Ghelijck als ghi mi in die werelt ghesonden hebt, so heb ickse ooc in die werelt ghesonden,

19

Ick heylige mi seluen voor haer, op dat si ooc gheheylicht sijn inder waerheyt.

20

Mer ic en bidde voor hen niet alleene, mer ooc voor de gene die door haer woort in mi gelouen sullen,

21

op dat si alle een zijn, gelijc als ghi vader in mi, ende ic in v, dat si ooc in ons eens zijn, op dat die werelt geloue, dat ghi mi gesonden hebt,

22

ende ic heb hen die claerheyt gegeuen, dye ghi mi gegeuen hebt, op dat si een souden zijn, gelijc als wi een zijn,

23

Ic in haer, ende ghi in my, op dat si volcomen zijn in een, ende dat die werelt bekenne, dat ghi mi gesonden hebt, ende hebtse liefgehadt, gelijc als ghi mi liefgehadt hebt

24

⁺Vader ic wil, ⁺ so waer dat ick ben, die ooc zijn, die ghi mi gegeuen hebt, op dat si die claerheit sien die ghi mi ghegeuen hebt, want ghi hebt mi liefgehadt, eer de werelt gegront wert.

+ D vers 24

+ mat. xi b Luc. x.d

25

Gerechte vader de werelt en heeft v niet gekent, mer ic heb v gekent, ende dese hebben bekent, dat ghi mi ghesonden hebt,

26

ende ic heb haer uwen naem kenlic ghemaect, ende wil haer kenlic maken, op dat die liefde, daer ghi mi mede lief gehadt hebt, in haer si, ende ic in hair *