Den Bybel met groter neersticheyt ghecorrigeert (Liesveltbijbel 1542)

¶ Hoe Christus die wech, die waerheyt ende dat leuen is, ende wie hem lief heeft, die houde sijn ghebodt, ende vanden vrede die Ihesus sinen discipulen ghaf.

Dat .xiiij. Capittel

[afbeelding]

1

⁺† ENde hy sprac tot sinen discipulen, V herte en verscricke niet, Gelooft ghi in God, so gelooft ooc in mi,

+ A vers 1

2

In mijns vaders huys sijn veel woningen,

3

Waert dat also niet en ware, so woude ict seggen, dat ic henen gae v die stede te bereyden, Ende oft ic henen ga, v die stede te bereyden, so wil ic nochtans weder comen, ende v tot mi nemen, op dat ghi sijt so waer ick ben,

4

Ende waer dat ic henen gae, dat weet ghi, ende den wech weet ghi ooc.

5

Thomas seyde tot hem, HERE, wy en weten niet waer ghi henen gaet, Ende hoe mogen wi den wech weten? Iesus seide tot hem,

6

Ic ben den ^a wech, ende de waerheyt, ende dat leuen, Nyemant en coemt tot den vader dan door mi,

a Christus heet den wech om dat wi den toeganc door hem totten vader hebben, dye waerheyt, want hi niet lieghen en mach, dat leuen om dat hi allen dat leuen gheuet. act. xvij f.

7

Waert dat ghi mi kende, so kende ghi mijnen vader ooc, ende van nv aen kent ghy hem, ende hebt hem gesien.

8

Philippus seyde tot hem, HERE toont ons den vader so ghenoeget ons.

9

⁺Iesus seyde tot hem, Aldus lange ben ic bi v, ende ghi en hebt mi niet gekent? Philippe, wie mi gesien heeft, die heeft den vader gesien,

+ B vers 9

10

Ende hoe segt ghi dan, toont ons den vader? En gelooft ghy niet, dat ic inden vader, ende die vader in mi is? Die woorden die ic tot v spreke, die en spreke ick niet van miseluen, Mer die vader die in mi woont, die doet die wercken,

11

Geloofdi mi, dat ic inden vader ende die vader in mi is, Waert niet alsoo, ghelooft mi nochtans om der wercken wille.

12

Voorwaer voorwaer ic segge v, wie in mi gelooft, die sal die wercken ooc doen, die ic doe,

13

ende sal groter dan dese doen, want ic ga tot den vader, Ende ist dat ghi den vader yet in minen name bidt, dat wil ic doen, op dat die vader inden sone ghepresen werde,

14

Ist dat ghi yet bidt in mijnen name, dat wil ic doen. *

15

† Hebdi mi lief, so hout mijn geboden,

16

Ende ic wil den vader bidden, ende hi sal v eenen anderen trooster geuen, dat hi bi v blijue eewelic,

17

den geest der waerheyt, die de werelt niet en mach ontfangen, want si en siets niet, ende en kennes niet, Maer ghi kent hem, want hi blijft bi v, ende sal in v sijn,

18

Ick en wil v geen weesen laten, ick come tot v.

19

Het is noch een weynich, ende die werelt en sal mi niet meer sien, Mer ghi sult mi sien, ⁺ Want ic leue ende ghi sult ooc leuen.

+ C vers 19

20

Inden seluen dage sult ghi bekennen, dat ic inden vader ben, ende ghi in mi, ende ic in v, Wie mijn geboden heeft, ende houtse, die is die mi lieft heeft,

21

Ende die mi lief heeft, die sal van mijnen vader lief ghehadt worden, ende ic sal hem lief hebben, en mi hem openbaren. *

22

Iudas seyde tot hem, niet die Iscariothes hiet, HERE, wat ist dan, dat ghi v ons wilt openbaren, ende niet der werelt?

23

Iesus antwoorde ende seyde tot hem.

† Wie mi lief heeft die sal mijn woort houden, mijn vader sal hem lief hebben, ⁺ ende wy sullen tot hem comen, ende woninge bi hem maken,

+ D vers 23

24

Mer wie mi niet lief en heeft, die en hout mijn woort niet, ende dat woordt dat ghi hoort, dat en is niet mijn, mer des Vaders die mi gesonden heeft.

25

Dit heb ick ghesproken die wijle ick bi v gheweest ben,

26

Mer die trooster die heylige geest, den welcken mijn vader in mijnen name seynden sal, die salt v altemale leeren, ende v ingheuen, al dat ick v gheseyt hebbe.

[afbeelding]

27

Den vrede laet ic v, mijnen vrede gheue ic v, ic en gheefs v niet, als hem die werelt geeft. V herte en ver-

[p. *]

schricke niet, noch en vreese niet,

28

Ghi hebt ghehoort dat ick v gheseyt hebbe, ick gae wech, ende come weder tot v, Hadt ghi mi lief, soo soudt ghi v verblijden, dat ick gheseyt hebbe, ick gae totten vader, want die vader is grooter dan ick,

29

Ende nv heb ict v gheseyt, eer dat gheschiet, op dat wanneert nv gheschien sal, dat ghi ghelooft,

30

Ick en sal voortmeer niet veel met v spreken, Want die prince deser werelt comt, ende en heeft aen mi niet,

31

Maer op dat dye werelt bekenne, dat ick den vader lief hebbe, ende dat ick alsoo doe, so mi die vader gheboden heeft. * Staet op laet ons van hier gaen.