Den Bybel met groter neersticheyt ghecorrigeert (Liesveltbijbel 1542)

Hoe die vrouwen totten graue quamen, ende tghene dat haer ghebuert was vercondichden, Ende vanden tween die tot Emaus ginghen, ende den HERE int breken des broots bekenden, Hoe Iesus int middel der iongheren stont, ende haer vrede bootscapte hen sijn handen ende voeten wijsde, ende daer ten hemel voer.

Dat .xxiiij. Capittel

[afbeelding]

1

⁺MAer na der Sabbathen een voor den dage quamen si totten graue, ende droegen dye specerie die si bereyt hadden, ende sommige met haer. ⁺

+ A vers 1

+ Io. xx.a Matth. xxviij.a

2

Si vonden den steen af gewentelt vanden graue, ende ginghen daer in, ende en vonden dat lichaem des HEREN Iesu niet.

3

Ende het geschiede doen si daer mede gegaen waren, siet, doen quamen bi haer twee mannen, met blinckende cleederen,

4

Ende si verscricten ende sloegen haer hooft neder ter aerden. Doen spraken si tot haer Wat soect ghy? den leuenden byden dooden?

5

Hi en is hier niet, hi is opghestaen, Gedenct hoe hi v seyde, doen hi noch in Galilea was, ende sprac,

6

Des menscen sone moet ouergeleuert worden, in die handen der sondaren, ende ghecruyst werden, ende na den derden daghe weder opstaen.

7

Ende si gedachten sijnder woorden.

8

Ende si gingen vanden graue, ende vercondichden dat den eluen, ende den anderen alle.

9

Het was Maria magdalena, ende Iohanna, ende Maria Iacobi, ende ander met haer, die dat den Apostelen seyden,

10

Ende haer dochte, dat haer woorden waren gelijc een nieumare, ende si en geloofden haer niet

11

⁺Petrus stont op, ende liep totten graue, ende buychde hem daer in, ende sach die lijnen doecken alleen liggen, ende ginc daer af, bi hem seluen verwonderende van al datter geschiet was. *

[afbeelding]

+ B vers 11

[p. *]

12

† Ende siet, twee wt haer gingen op den seluen dage in een casteel, dat was van Hierusalem tsestich stadien wijt, ⁺ dies naem hiet Emaus,

+ C vers 12

13

ende si spraken met malcanderen van alle die geschiedenissen.

14

Ende het gheschiede doen si so spraken, ende beuraechden hen met malcanderen, doen naecte Iesus tot haer, ende wandelde met haer,

15

Mer haer oogen waren gehouden, dat si hem niet en souden kennen.

16

Hi seyde tot haer, Wat redenen sijn dat, die ghi tot malcanderen spreect, ende wandelt ende sijt truerich?

17

Doen antwoorde een genaemt Cleophas, ⁺ ende seyde tot hem Sijt ghi alleen onder den vreemden tot Ierusalem, die niet en weet wat in desen dagen daer in gheschiet is? Ende hi seyde tot haer, Welcke?

+ gala. ij.a

18

Maer si seyden tot hem, Dat van Ihesu van Nazareth, ⁺ welc was een propheet, machtich van wercken, ende woorden, voor God ende alle volc,

+ D vers 18

19

ende hoe onse hooge priesteren ende ouersten hem ouergeleuert hebben, tot der verdoemenisse des doots, ende ghecruyst,

20

Maer wi hoopten, hy soude Israel verlossen, ende bouen dat alle ist huyden den derden dach, dattet gesciet is.

21

Ooc hebben ons verscrict sommighe van onsen vrouwen die vroech byden graue sijn geweest,

22

ende en hebben sijn lichaem niet geuonden, quamen ende seyden, si hebben een gesicht der enghelen ghesien, dye welcke seggen, Hi leeft.

23

Ende sommige onder ons gingen totten graue, ende vonden dat also, als die vrouwen seyden, Mer hem en vonden si niet.

24

Ende hi sprac tot haer O ghi sotten ende trage van herten, om te geloouen alle dat die propheten gesproken hebben.

25

Moeste Christus niet sulcx lijden, ende also tot sijnder heerlicheyt ingaen?

26

Ende begonst aen van Moyses, ende alle propheten, ende leyde hen alle die scriften wt, die van hem gheseyt waren.

27

Ende si quamen byden casteele, daer si henen ginghen, ende hi stelde hem, als hadde hy willen voorder gaen.

28

Ende si ^a dwongen hem ende seyden. Blijft by ons, want het wil auont worden, ende den dach heeft hem geneycht. Ende hi ginc met hen inne, bi hen te blijuen

a dwingen, dat is hier, hertelicken bidden alsoo datment consenteert. i.regum xxviij.d ge. xix c

29

Het gheschiede doen hi met hen aen die tafel sadt nam hi dat broot ende seyde die seegeninge, ende bract, ende gaft hen.

30

⁺Doen worden haer oogen geopent, ende bekenden hem, ende hi verdwijnde van haer.

+ E vers 30

31

Ende si seyden onder malcanderen, Bernde niet onse herte in ons, doen hi met ons sprac opten wege, als hi ons de scrifte opende?

32

Ende si stonden tot der seluer tijt op, ende keerden weder na Hierusalem, ende vonden die elue versaemt, ende die met hen waren, die welcke seyden.

33

Dye HERE is warachtich op gestaen, ende Symoni gheopenbaert,

34

Ende si vertelden haer wat op den wege gheschiet was, ende hoe hi van haer bekent was, aen dien, dat hi dat broot brack.

[afbeelding]

35

⁺† Maer doen si daer af spraken, quam Iesus selue midden onder haer, ende seyde,

+ F vers 35

36

Hebt vrede. Si verscricten, ende vreesden hen, ende meynden, si sagen eenen geest.

37

Ende hi seyde tot haer, Wat sijt ghi so verscrict ende waerom climmen sulcke ghedachten in v herten?

38

Siet mijn handen ende mijn voeten, ic bent selue, tast mi ende siet, want eenen geest en heeft geen vleesch noch been, als ghi siet dat ick hebbe.

39

Ende doen hi dat seyde, toonde hi haer handen ende voeten.

40

Doen si noch niet en gheloofden, ende haer verwonderden van vruechden, seyde hi tot haer. Hebt ghi hier wat teten?

41

Ende si leyden hem voor een stuck van eenen ghebraden vissche, ende honichzeem,

42

Ende hi nam dat ende adt dat voor hen allen.

43

Ende hi seyde tot haer. Dat sijn die redenen die ic tot v seyde, doen ic noch bi v was, want het moet al veruult werden wat van mi gescreuen is inder wet Moysi, in die propheten, ende in die Psalmen.

44

⁺Doen opende hi hen dat verstant, dat si die scrift verstonden ende seyde tot haer,

+ G vers 44

45

Also ist gheschreuen, ende also moeste Christus lijden, ende opstaen vander doot, op den derden dage,

46

ende laten preken in sinen name, penitentie ende vergheuinghe der sonden, onder alle volcken, * ende beginnen te Iherusalem,

47

Maer ghy sult des alle getuyge sijn

48

† Ende siet, ick wil seynden op v, die toesegginge mijns vaders. Maer ghy sult blijuen, inder stadt van Hierusalem, so langhe dat ghi aenghetrocken werdet met crachte wt den hooghen.

[afbeelding]

49

Hi leydese wt tot Bethanien, ende hief sijn handen op, ende seghendese.

50

Ende het gheschiede doen hijse seegende, ghinc hi van haer, ende voer ten hemel,

51

Ende si baden hem aen, ende keerden weder na Hierusalem met grooter vruechden,

52

ende waren altijt inden tempel, ende loofden ende gebenedijden God. *

Dit is dat eynde vanden Euangelien van sinte Lucas.