Den Bybel met groter neersticheyt ghecorrigeert (Liesveltbijbel 1542)

Hoe die Euangelist die passie oft dat lijden Cristi bescrijft, tot dat Iesus Pylatus ouergeleuert wert.

Dat .xxij. Capittel.

[afbeelding]

1

⁺† DIe feest des soeten broots naecte dwelc Paesschen heet,

+ A vers 1

2

ende die hooge Priesteren ende Scriftgheleerden sochten, ⁺ hoe si hem dooden mochten, mer si vreesden dat volc.

+ matih. xxvi.a.

3

Ende Sathanas was gheuaren in Iudam genaemt Iscarioth, ⁺ dye daer een was wt den ghetale der twaeluen,

+ marci xiiij.a Ioan xi.g

4

ende hi ginc daer in, ende sprac met den hoo-

[p. *]

gen priesteren, ⁺ ende metten ouersten, hoe hy hem woude ouerleueren.

+ Marci. xiiij.a Io. xi.g

5

Ende si werden blijde, ende beloofden hem gelt te geuen,

6

Ende hi geloofde haer dat, ende sochte gelegentheyt, dat hi hem verraden mochte, sonder geruchte.

7

Het quam nv den dach datmen ongeheeft broot adt, op welcken men moeste offeren dat paeschlam,

8

Ende hi sandt Petrum ende Iohannem, ende seide ⁺ Gaet henen ende bereyt ons dat paeschlam, op dat wi dat eten.

+ B vers 8

9

Maer si seyden tot hem. Waer wildy dat wi dat bereyden?

10

Hi seide tot haer, Siet, als ghi ingaet in die stat, sal v te gemoet comen een mensce die draecht een watercruyc, volcht hem na in dat huis daer hi ingaet,

11

ende segt tot den meester vanden huise. Die meester doet v seggen, Waer is die sale, daer in dat ic dat paeschlam eten mach met minen discipulen,

12

Ende hi sal v een grote bereyde sale tonen, daer bereyt dat.

13

Si gingen daer ende vondent also hi haer geseyt hadde, ende bereyden dat paeschlam.

[afbeelding]

14

Ende doen de vre quam sadt hi neder, ende de twaelf Apostelen met hem,

15

ende hi seyde tot haer. Mi heeft hertelic verlangt dit paeschlam met v te eten eer dat ic lide.

16

Want ic segge v, dat ic na dese tijt niet meer daer af eten en sal, tot dat veruult werde in dat rijc Gods.

17

Ende hi nam den kelc danckende ende sprac, Neemt den seluen, ende deelt hem onder v,

18

Want ic segge v, ic en sal niet drincken vanden gewasse des wijnstocx, tot dat rijc Gods comt.

19

⁺Ende hy nam dat broot danckende ⁺ ende brac dat, ende gaft haer, ende seyde. Dat is mijn lichaem dat voor v gegeuen wert, dat doet in mijnder gedenckenissen.

+ C vers 19

+ ma. xiiij c. matthei xxvi.c i.co. xi.c

20

Des seluen gelijc ooc den kelc, na dien dat si tsauonts ghegeten hadden, ende seyde. Dat is den kelc, dat nyeuwe testament in minen bloede dat voor v wtghestort wert.

21

Mer siet, de hant mijns verraders is met mi ouer tafel,

22

ende tis waer, des menschen soon gaet, also van hem besloten is, mer wee den seluen mensche, door welcken hi verraden wert.

23

Ende si begonsten te vragen onder haer seluen, welcke hi doch onder haer ware, die dat doen souden.

24

† Ende daer stont ooc eenen twist onder haer, wie van haer die meeste sijn soude,

25

mer hi seide tot haer, die weerlijcke coningen heerscappen, ende dye gheweldige heetmen genadige heeren,

26

Mer ghi niet also, mer die onder v die meeste is, die sal zijn als die minste, ende die voorgaende als een dienaer, Want welc is die grootste? die ter tafelen sidt, oft die daer dien?

27

Ist niet also, dat die ter tafelen sidt? Ic ben midden onder v, als een die dient,

28

Mer ghi sijt die gene dye bi my gebleuen sijt in mijn aenuechtinge.

29

Ende ic wil v dat rijcke besceyden, gelijc mi mijn vader dat besceiden heeft,

30

op dat ghi eten ende drincken sout aen mijn tafel in mijn rijc, ende sitten op stoelen, ende ordelen die twaelf geslachten van Israel *

31

Die HERE seyde. Simon Simon, Siet, die duuel heeft v begeert, dat hi v mocht siften als terwe,

32

maer ic heb voor v gebeden, dat v geloue niet op en houde, ende als ghi v eens bekeert, so sterct v broeders.

33

Mer hy seide tot hem. HERE, ic ben bereyt met v in de geuanckenisse ende in die doot te gane.

34

Mer Iesus seide. ⁺ Peter, ic seg v, die haen en sal huyden niet crayen, eer ghy mi driemael versaect hebt, dat ghi mi kent,

+ matthei xxvi.d.

35

⁺Ende hi seide tot hen, wanneer ic v gesonden hebbe sonder budel, sonder tessce ende schoen, hebt ghi ooc gebrec gehadt? Si seiden niets niet

+ D vers 35

36

Doen seyde hi tot haer, Mer nv, wie eenen buydel heeft, die neme des seluen gelijc ooc de tessce, mer wie niet en heuet, die vercope sinen rock, ende cope een sweert,

37

want ic seg v, het moet volbracht worden aen mi, dat gescreuen staet, ⁺

+ esa. liij.d io. xviij a matthei xxvi.c.

38

hi is onder die misdadige gerekent, want wat van mi gescreuen is, dat heeft een eynde. Mer si seiden, HERE, siet hier zijn twee sweerden Hi seyde tot haer, Het is genoech,

39

ende hi ginc wt, na sijnder gewoonte aenden olijfberch, ende zijn discipulen volchden hem na, in die selue plaetse.

40

Ende als hy daer quam, seyde hi tot haer, Bidt, op dat ghi niet en valt in temptacien.

41

⁺Ende hi is van haer getrocken bi eenen steenworp, ende knielende neder, badt hi ende seyde,

+ E vers 41

42

Vader wilt ghi, so neemt desen kelc van mi, Mer doch niet mijnen, mer uwen wil geschie.

43

Het verscheen hem een Engel vanden hemel, ende stercte hem,

44

Ende het quam dat hy tegen die doot worstelde, ende badt langer, Ende zijn sweet wert als droppelen bloets, nederloopende op de aerde

45

Ende hi stont op vanden ghebede, ende quam tot sinen discipulen, ende vantse slapende van droefheyt,

46

Ende hy seyde tot haer, Wat slaept ghy? Staet op ende bidt, op dat ghi niet in becoringhe en valt.

[afbeelding]

47

Mer doen hi noch sprac, ⁺ Siet die schare ende een vanden twaeluen, genaemt Iudas, ginc voor hen allen Ende hi genaecte Iesum om te cussen,

+ mar. xiiij.c

48

ende Iesus seide tot hem, Iuda, verraet ghi des menscen sone met eenen cusse?

49

Doen dat sagen die bi hem waren wat daer geschien soude, seiden si tot hem, HERE, sullen wi metten sweerde daer in slaen?

50

Ende een van haer sloech des hoogen priesters knecht, ende sloech hem zijn rechter oor af,

51

mer Iesus antwoorde ende seyde, laetse doch begaen, ⁺ Ende hi roerde sijn oore aen ende heelde hem.

+ Ioan. xviij.b

52

Mer Iesus seyde totten hoogen Priesteren ende den ouersten des tempels, ende den outsten die tot hem gecomen waren, Ghi sijt als tot eenen moorder, met sweerden, ende met stocken wtgegaen,

53

ic heb dagelicx bi v inden tempel geweest, ende ghi en hebt geen hant aen mi geslagen, Mer dits v vre ende de macht der duysternissen.

54

Ende si grepen hem ende leyden hem wech, ende brochten hem in des hogen priesters huys, Mer Peter volchde hem van verre

55

Doen ontstaken si een vier midden in die sale, ⁺ ende saten daer te samen, ende Peeter sadt onder haer.

+ math. xx.

56

Doen sach hem een dienstmaecht sitten byden lichte, ende sach op hem, ende sprac, Dese was ooc met hem,

57

Mer hi versaecte hem, ende seyde, wijf ic en kenne hem niet.

58

Ende ouer een cleyne wijle, sach hem een ander, ende seyde. Ghi sijt ooc een van dien.

59

Mer Peter seyde, mensche ick en ben niet, Ende ouer een wile bi een vre, beuestichde dat

[p. *]

[afbeelding]

een ander ende seyde, Voorwaer dese was ooc met hem want hi is een Galileer,

60

⁺Peeter seyde, Mensce, ic en weet niet wat ghi segt. ⁺ Ende terstont doen hi noch sprac craeyde die haen,

+ G vers 60

+ io. xviij d

61

Ende die HERE keerde hem om, ende sach Peeterem aen, Ende Peeter gedacht des HEEREN woort, als hi tot hem gheseyt hadde, Eer dye haen craeyt suldy mi driemael loochenen,

62

Ende Peter ginc wt, ende weende bitterlic.

63

Die mannen dye Iesum hielden, bespotten hem, ende sloegen hem ende decten sijn oogen, ende sloegen hem in dat aensicht, ende vraechden hem ende seyden,

64

Propheteert ons, wie ist die v sloech.

65

Ende veel ander lasteringen seyden si tot hem.

66

Ende doent dach wert, versaemden hen die Outsten des volcx, ⁺ ende die hooge priesteren ende Scriftgeleerden ende leyden hem voor haren raet, ende seyden.

+ Mathei xvi.g

67

Bistu Cristus segget ons. Hi seyde tot haer, Segge ic v dat, so en geloofdijs niet, mer vraech ic v, so en antwoort ghy niet, ende ghi en laet mi niet los.

68

Daerom van nv voortaen sal des menschen sone sitten totter rechter hant der cracht Gods.

69

Doen seyden si alle, Sijt ghi dan die sone Gods? Hi seyde tot hen, Ghi segget, want ic bent, Si seyden,

70

Wat behoeuen wi meer ghetuyghenissen? wi hebben dit selue gehoort wt sinen monde.