Den Bybel met groter neersticheyt ghecorrigeert (Liesveltbijbel 1542)

¶ Vander verrisenisse ons HEREN ende openbaringe, Ende hoe dat hi ghebiet te preken dat Euangelium ouer alle die werelt.

Dat .xvi. Capittel

1

† ENde doen die Saboth verbi was, cochten Maria Magdalena ende Maria Iacobi, ende Salome, specerije, op dat si souden comen ende saluen hem,

2

Ende quamen totten graue, op eenen saboth seer vroech doen

[p. *]

[afbeelding]

die sonne op ginc,

3

ende si spraken onder malcanderen ⁺ Wie sal ons desen steen, van des graefs dore wentelen?

+ matthei. xxviij.a lu. xxiiij a

4

Ende si sagen derwaerts, ende werden gewaer dat die steen af gedaen was, want hi was seer groot,

5

Ende si gingen daer in dat graf ende sagen eenen iongelinc totter rechter hant sitten, die hadde een lanc wit cleet aen, ende si waren beureest,

6

Ende hi sprac tot haer, En verscrict v nyet Ghi soect Iesum van Nazarech, den gecruysten, hy is op gestaen ende en is niet hier, Siet daer die plaetse daer si hem in leiden,

7

Gaet henen ende segget sijnen discipulen ende Petro, dat hi voor v in Galilea gaen sal, daer sult ghi hem sien, als hi v geseyt heeft. *

8

Ende si gingen terstont snellic wt, ende vloden vanden graue. Wandt haer was beuen ende verscrickinge aen gecomen, ende si en seyden niemanden niet, wandt si waren beureest

9

⁺† Doen Iesus op gestaen was, ⁺ vroech aenden eersten dach der sabbathen, verthoonde hi ten eersten Marie Magdalena, van welcker hi seuen geesten hadde wtgedreuen

+ C vers 9

+ matthei. xxviij b. lu. xxiiij b

10

ende si ghinck ende vercondichdet dyen, die met haer geweest waren, die daer rouwe droegen ende weenden,

11

Ende doen die selue hoorden, dat hi leefde, ende hy van haer gesien was, noch en geloofden si niet

12

Daer na doen daer twee wt haer lieden wandelden, openbaerde hi hem onder een ander gesteltenisse, doen si op dat velt gingen,

13

Ende die selue gingen ooc daer, ende vercondichden dat den anderen, dien en geloofden si ooc niet. *

14

† Maer ten laetsten, doen, die elf aen die tafel saten, openbaerde hi haer, ende strafte haer onghelooue, ende haers herten hertheyt, dat si niet gelooft en hadden den genen die hem gesien hadden verresen,

15

Ende hi seide tot haer lieden, Gaet in alle die werelt, ende preect dat Euangelium allen creatueren.

16

Wie daer gelooft ende gedoopt wort, die sal salich worden, mer wie niet en gelooft die sal verdoemt worden,

17

Mer die teekenen die volgen sullen den genen die daer gheloouen sijn dese, In mijnen ^a name sullen si die duuelen wtdriuen, Met nyeuwen tongen spreken,

a Den naem des Heeren beteekent hier sijn heerlickheyt, autoriteyt wijsheit macht ende goetheyt exo. xv a esa xxx f lu. xxiiij g

18

⁺Slanghen verdriuen, al ist dat si yet dootlicx drincken, so en sal dat haer niet scaden Op die crancken sullen si die handen leggen, so salt beter met hen worden. *

+ D vers 18

19

Ende die HERE, na dyen dat hi met hen gesproken had, wert hi op geheuen ten hemel, ende heeft hem ter rechter hant Gods geset,

20

ende si gingen wt, ende predicten ouer al, ende die HERE wracht met haer, ende becrachtichde dat woort met nauolgende teykenen.

Hier eyndet sinte Marcus Euangelie