Den Bybel met groter neersticheyt ghecorrigeert (Liesveltbijbel 1542)

¶ Van onser bedinghe, ende vastinghe. Dat wy gheen twee heeren dyenen en moghen. Dat wy nyedt sorchfuldich wesen en sullen voor ons voetsel, ende voor onse cleederen noch voor den naesten toecomenden dach.

Dat .vi. Capittel.

1

⁺SIet toe, dat ghi v aelmoessen niet en geuet voor die menschen, op dat ghi van haer gesien moecht worden, anders soe en sult ghi geenen loon hebben van mijnen vader, die in dye hemelen is.

+ A vers 1

2

Hierom als ghy almoessen gheeft, so en wilt geen trompet voor v laten blasen, ghelijc dye ypocriten in haer synagogen ende op die straten doen, om dat si vanden menscen gepresen mogen worden, Voorwaer ic segge v, dat si haren loon ontfanghen hebben,

3

Ende als ghi v aelmoessen gheeft, soe en laet v slincker hant niet weten wat uwe rechter handt doet,

4

op dat uwe aelmoessen verborgen blijuen, ende uwe vader, diet aensiet int verborgen, die salt v int openbaer loonen. *

5

⁺Ende als ghi bidt, so en sult ghy nyet sijn gelijc dye ypocriten, die geerne staen ende bidden in die sinagogen ende aen dye hoecken der straten, ⁺ om dat si vanden menscen gesien souden worden, voorwaer ic segge v: dat si haren loon ontfangen hebben,

+ B vers 5

+ Matth. xxiij.a.

6

Mer als ghi bidt, so gaet in v slaepcamerken, ende sluyt de dore toe, ende bidt int heymelijc uwen hemelschen vader, ende v vadere, dye dat int verborgen siet, die sal v dat int openbaer loonen.

7

Ende als ghy bidt, ⁺ so en maect niet veel woorden gelijc dye heydenen doen, die daer meynen dat si door vele woorden verhoort worden,

+ Lu. xi.a

8

daeromme, so en wilt de-

[p. *]

sen nyet ghelijc worden, want v vader weet wat v van node is, eer ghi hem bidt,

9

daerom so sult ghi aldus bidden. Onse vader dye in die hemelen is, Gheheylicht worde uwen name,

10

V rijck toecome, Vwen wille ghesciede opter aerden als inden hemel,

11

Geeft ons huiden onse dagelicx broot,

12

Ende vergeeft ons onse sculden, gelijc wi onse schuldenaers vergheuen,

13

Ende en leyt ons nyet in temptacie, Maer verlost ons vanden quaden (Want v is dat rijc, ende die cracht, ende die heerlicheydt inder eewicheydt, Amen.

14

Want ist sake, dat ghi den menschen vergheeft haer misdaden, so sal v hemelsche vader v ooc vergeuen.

15

Mer ist sake, dat ghi den menscen haer misdaden nyet en vergheeft, so en sal uwe hemelsche vader ooc nyet vergeuen uwe misdaden.

16

† Ende als ghi vast, so en wilt nyet droeffelijc sien, gelijc die ypocriten, ⁺ Want dese verduysteren haer aensichten, ⁺ om dat dye menschen daer dore bekennen souden, dat si vasten, Voorwaer segge ic v, si hebben haren loon ontfanghen,

+ C vers 16

+ mar. xi d

17

Mer als ghi vast, soe salft v hooft, ende wasschet v aenschijn,

18

op dat ghy voor dye menschen nyet en schijnt te vasten, ^a maer voor dijnen vader die int verborgen is, ende v vader diet int verborgen siet, sal dy dat loonen int openbaer.

a Hier door bliket dat het warachtich vasten is abstineren van alle valscelichheyt der ende sonden Psalm. xxxiiij. esa. lviij a lu. xij.d

19

Ghi en sult v gheen schatten verghaderen opter aerden, daer si dye roest ende dye motten eten, daer dye dieuen na grauen ende stelen.

20

Mer vergadert v schatten inden hemel, daerse noch roest, noch motten en eeten, ende daer dye dieuen nyet nae en grauen noch en stelen,

21

Want waer uwen schat is daer is v herte. *

22

Die ooge ist licht des ^b lichaems, ist dat dijn ooge simpel is, so sal dijn geheel lichaem claer ende licht zijn,

b Lichaem beteekent de wercken, ende die ooge dat hert

23

ende ist sake dat dijn ooge scalc is, so sal dijn geheele lichaem duyster sijn. Hierom ist sake dattet licht dat in v is, duysternissen sijn, hoe groot sullen dan die duysternissen seluer sijn.

24

† Nyemant en mach twee Heeren dienen, oft hy sal den eenen haten, ende den anderen beminnen, ⁺ oft hi sal den eenen aenhangen, ende den anderen versmaden, Ghi en moecht God nyet dienen ende den Mammon.

+ Lu. xvi.

25

Daerom segghe ic v, en sorcht nyet voor v leuen, wat ghi eten of drincken sult, noch ooc voor v lichaem wat ghy aen doen sult ⁺ En is dat leuen nyet meer dan dye spijse, ende dat lichaem meer dan die cleederen?

+ D vers 25

26

Aensiet dye vogelen onder den hemel, ⁺ want si niet en sayen, noch en mayen, noch in die scueren niet en vergaderen, ende uwe hemelsce vader voetse nochtans, en gaet ghi dese niet verre te bouen?

+ Lu. xij.e

27

Ende wie isser onder v dye sorchuuldelick denckende tot sijnder lengde een elle toe doen mach?

28

waerom sorcht ghi dan voor v cleederen? Aensiet die lelien des ackers, hoe dat si wassen? Si en arbeyden nyet, noch si en spinnen nyet,

29

nochtans segge ic v, dat Salomon in al sijn geheel glorie nyet so gecleet geweest en is, ⁺ ghelijc als een van desen.

+ ij.cor. ix

30

Ende ist sake dat God also cleet een hoy des ackers dat huden is, ende morgen inden ouen gheworpen wort, ende soude hy v dan nyet veel meer doen? O ghi van cleenen geloue,

31

Daerom en suldi nyet sorgen, segghende, wat sullen wy eten, oft wat sullen wi drincken, of waer mede sullen wi gecleet worden?

32

Want die heydenen soecken oft besorgen alle dese, want uwe hemelsce vader weet dat ghi dese alle van noode hebt.

33

Soect alder eerst dat rijc Gods, ende sijn rechtuaerdicheyt, Ende alle dese sullen v toegeworpen worden. *

34

Daerom soe en zijt niet sorchuuldich voor den dach van morgen, want den dach van morgen sal voor hem seluen sorgen, Het is genoech dat elcken dach sijn eygen last heeft.